Exodus 31

Ilonggo (Ang Biblia (1982))

← Chapter 30 Jump to: Chapter 32 →

1Ang Ginoo nagsiling kay Moises,

2“Tan-awa, gintawag ko sa ngalan si Bezalel nga anak ni Uri, ang anak ni Hur, sang kabikahan ni Juda:

3kag ginpuno ko sia sang Espiritu sang Dios, sa kaalam kag sa paghangup, sa ihibalo kag sa tanan nga bagay sang buluhaton,

4sa pagpadugi sing sinampaton nga mga buluhaton, sa pagsalsal sa bulawan, sa pilak, kag sa saway,

5sa paglagari sang mga bato nga inugtampok, kag sa paggutib sang kahoy, sa pagpangabudlay sa tanan nga bagay sang buluhaton.

6Kag yari karon, gintangdo ko upud sa iya si Oholiab, ang anak ni Ahisamac, sang kabikahan ni Dan; kag ginbutangan ko sing kaalam ang mga tagiposoon sang tanan nga sampaton, agud nga maghimo sila sang tanan nga ginsogo ko sa imo:

7ang layanglayang nga tiliponan, kag ang kaban sang pagpamatuud, kag ang pakilooyan nga yara sa ibabaw sini, kag ang tanan nga gamit sang Layanglayang,

8ang latok kag ang iya mga gamit, kag ang candelero nga bug-os pati ang tanan niyang gamit, kag ang halaran sang incienso,

9kag ang halaran sang halad-nga-sinonog pati ang tanan niyang gamit, kag ang batiya kag ang iya tulungtungan,

10kag ang mga panapton nga nahimo sing matahum, ang balaan nga mga panapton nga kay Aaron nga sacerdote kag ang mga panapton sang iya mga anak, sa pag-alagad sa pagkasacerdote,

11kag ang lana nga ihalaplas kag ang incienso nga mahamut nga sa balaan nga duug. Himoon nila sono sa ginsogo ko sa imo.”

12Kag ang Ginoo nagsiling kay Moises,

13“Isiling sa katawohan sang Israel, ‘Bantayan ninyo ang akon mga inugpahuway, kay tanda ini sa tunga nakon kag ninyo sa bug-os ninyong mga kaliwatan, agud nga mahibaloan ninyo nga Ako, nga Ginoo, nagapakabalaan sa inyo.

14Bantayan ninyo ang inugpahuway, bangud nga balaan ini sa inyo; ang tagsatagsa nga nagapasipala sini patyon; ang bisan sin-o nga nagahimo sing bisan anong buluhaton sa iya, inang kalag utdon gikan sa tunga sang iya katawohan.

15Sa anum ka adlaw himoon ang buluhaton; apang sa adlaw nga ikapito amo ang inugpahuway sang maligdong nga pahuway, balaan sa Ginoo; ang bisan sin-o nga nagahimo sing bisan anong buluhaton sa adlaw nga inugpahuway patyon.

16Busa bantayan sang katawohan sang Israel ang inugpahuway, sa pagtuman sang inugpahuway sa bug-os nilang mga kaliwatan, subong nga katipan nga dayon.

17Tanda ini sa gihapon sa tunga nakon kag sang katawohan sang Israel nga sa anum ka adlaw ginhimo sang Ginoo ang langit kag ang duta, kag sa ikapitong adlaw nagpahuway sia, kag nahaulian.’”

18Kag sang nakatapus sia sa pagpakighambal sa iya sa Bukid nga Sinai, ginhatag niya kay Moises ang duha ka tapitapi sang pagpamatuud, mga tapitapi nga bato, nga nasulatan sang tudlo sang Dios.

← Chapter 30 Jump to: Chapter 32 →