Exodus 30

Ilonggo (Ang Biblia (1982))

← Chapter 29 Jump to: Chapter 31 →

1“Maghimo ka sing isa ka halaran nga sonogan sang incienso; gikan sa kahoy nga acasia himoon mo ini.

2Ang iya kalabaon isa ka maniko, kag isa ka maniko ang iya kasangkaron; manginkasilo ini, kag duha ka maniko ang iya kataason; ang iya mga sungay unay sa iya.

3Kag taklapan mo ini sing bulawan nga ulay, ang iya ibabaw kag ang iya mga kilid palibut kag ang iya mga sungay; kag himoan mo ini sing molde nga bulawan palibut.

4Kag himoan mo ini sing duha ka argolya nga bulawan; sa ubus sang iya molde himoon mo sila sa duha ka magtimbang nga kilid sini, kag goloan sila sang mga yayongan sa pagdala sini.

5Himoon mo ang mga yayongan gikan sa kahoy nga acasia, kag taklapan sila sing bulawan.

6Kag ibutang mo ini sa atubangan sang kumbung nga yara sa luyo sang kaban sang pagpamatuud, sa atubangan sang pakilooyan nga yara sa ibabaw sang pagpamatuud, diin magapakigkita ako sa imo.

7Kag si Aaron magasonog sa ibabaw sini sing incienso nga mahamut; agaaga sa nagaaman sia sang suga sonogon niya ini,

8kag sa pagsindi ni Aaron sang mga suga sa kahaponon, sonogon niya ini, incienso nga dalayon sa atubangan sang Ginoo sa bug-os ninyong mga kaliwatan.

9Dili kamo maghalad sa sini sing incienso nga dibalaan, ukon halad-nga-sinonog, ukon halad-nga-kalan-on; kag dili kamo mag-ula sing halad-nga-ilimnon sa ibabaw sini.

10Si Aaron magahimo sing katumbasan sa ibabaw sang mga sungay sini sing makaisa sa tuig; sa dugo sang halad-tungud-sa-sala nga sa katumbasan makaisa sa tuig himoon niya ang katumbasan nga sa iya sa bug-os ninyong mga kaliwatan; ini labi gid kabalaan sa Ginoo.”

11Ang Ginoo nagsiling kay Moises,

12“Kon mag-isip ka sang kadamuon sang katawohan sang Israel, niyan ang tagsa ka tawo maghatag sing gawad tungud sa iya kalag sa Ginoo kon isipon mo sila, agud nga wala sa ila sing kamatay kon isipon mo sila.

13Ini ihatag nila, ang tagsatagsa nga nagasaylo sa ila nga naisip: tunga sa siclo sono sa siclo sang santuario (ang siclo duha ka pulo ka gera), tunga sa siclo nga halad sa Ginoo.

14Ang tagsatagsa nga nagasaylo sa ila nga naisip, kutub sa duha ka pulo ka tuig pa ibabaw, magahatag sang halad sa Ginoo.

15Ang manggaranon dili maghatag sing kapin, kag ang imol dili maghatag sing kubus, sa tunga sa siclo, kon maghatag sila sang halad sa Ginoo.

16Kag batonon mo ang cuarta sang katumbasan gikan sa katawohan sang Israel, kag ipat-ud ini sa pag-alagdan sang layanglayang nga tiliponan; agud nga manginhandumanan ini sa katawohan sang Israel sa atubangan sang Ginoo, sa paghimo sing katumbasan tungud sa inyo mga kalag.”

17Ang Ginoo nagsiling kay Moises,

18“Maghimo ka man sing batiya nga saway, nga ang iya tulungtungan saway, nga palanghinawan. Kag ibutang mo ini sa ulut sang layanglayang nga tiliponan kag sang halaran, kag butangan mo ini sing tubig,

19sa sini magpanghinaw si Aaron kag ang iya mga anak sang ila mga kamut kag sang ila mga tiil.

20Kon magsulud sila sa layanglayang nga tiliponan, magpanghinaw sila sang tubig, agud nga indi sila mapatay; ukon kon magpalapit sila sa halaran nga sa pag-alagad, sa pagsonog sing halad tungud sa kalayo sa Ginoo.

21Magpanghinaw sila sang ila mga kamut kag sang ila mga tiil, agud indi sila mapatay: manginpalatukuran ini nga dayon sa ila, bisan sa iya kag sa iya mga kaliwatan sa bug-os nilang mga kaliwatan.”

22Labut pa, ang Ginoo nagsiling kay Moises,

23“Kuha ka nga sa imo sang pili nga mga pahumut sang lasaw nga mira nga lima ka gatus ka siclo, kag sang canela nga mahamut nga katunga sini, bisan duha ka gatus kag kalim-an, kag sang calamo nga mahamut duha ka gatus kag kalim-an,

24kag sang casia lima ka gatus, sono sa siclo sang santuario, kag sang lana sang olivo isa ka hin;

25kag himoon mo ini nga balaan nga lana nga ihalaplas, pahumut nga ginsimbog sono sa kinaadman sang manugpahumut; manginbalaan ining lana nga ihalaplas.

26Kag haplasan mo sini ang layanglayang nga tiliponan kag ang kaban sang pagpamatuud,

27kag ang latok pati ang tanan niyang gamit, kag ang candelero kag ang tanan niyang gamit, kag ang halaran sang incienso,

28kag ang halaran sang halad-nga-sinonog pati ang tanan niyang gamit kag ang batiya kag ang iya tulungtungan;

29pakabalaanon mo sila, agud nga sila manginlabi gid kabalaan; ang bisan ano nga nagatandug sa ila manginbalaan.

30Kag haplasan mo si Aaron kag ang iya mga anak, kag pakabalaanon sila, agud nga mag-alagad sila sa akon sa pagkasacerdote.

31Kag magsiling ka sa katawohan sang Israel, ‘Ini manginbalaan kong lana nga ihalaplas sa bug-os ninyong mga kaliwatan.

32Sa unud sang tawo dili ini pag-ibobo, kag dili kamo maghimo sing bisan anong kaangay sini, sono sa mga sangkap niya; balaan ini, kag manginbalaan sa inyo.

33Ang bisan sin-o magsimbog sing bisan ano kaangay sini ukon ang bisan sin-o magbutang sini sa dumuloong, utdon sia gikan sa iya katawohan.’”

34Kag ang Ginoo nagsiling kay Moises, “Kuha nga sa imo sing mga pahumut, ang estacte, kag onica, kag galbano, mga pahumut nga may incienso nga ulay (sa tagsatagsa sa alangay nga timbang),

35kag himoon mo ining incienso, isa ka pahumut sono sa kinaadman sang manugpahumut, nga naunawan sing asin, ulay kag balaan;

36kag bukbukon mo sing mapino ang iban sa ila, kag ibutang ang iban sini sa atubangan sang pagpamatuud sa sulud sang layanglayang nga tiliponan diin magapakigkita ako sa imo; manginlabi gid kabalaan ini sa inyo.

37Kag ang incienso nga himoon mo sono sa mga sangkap sini, dili kamo maghimo nga sa inyo; manginbalaan ini sa inyo sa Ginoo.

38Ang bisan sin-o nga maghimo sang kaangay sina sa pagsinghut sa iya utdon sia gikan sa iya katawohan.”

← Chapter 29 Jump to: Chapter 31 →