Exodus 37

Ilonggo (Ang Biblia (1982))

← Chapter 36 Jump to: Chapter 38 →

1Ginhimo ni Bezalel ang kaban gikan sa kahoy nga acasia; duha ka maniko kag tunga ang iya kalabaon, isa ka maniko kag tunga ang iya kasangkaron, kag isa ka maniko kag tunga ang iya kataason.

2Kag gintaklapan niya ini sing bulawan nga ulay sa sulud kag sa gowa, kag ginhimoan ini sing molde nga bulawan palibut.

3Kag nagbasia sia nga sa sini sing apat ka argolya nga bulawan nga sa iya apat ka tiil, duha ka argolya sa isa ka kilid sini kag duha ka argolya sa isa pa ka kilid sini.

4Kag naghimo sia sing mga yayongan nga kahoy nga acasia, kag gintaklapan sila sing bulawan,

5kag gingolo niya ang mga yayongan sa mga argolya sang mga kilid sang kaban, sa pagdala sang kaban.

6Kag ginhimo niya ang pakilooyan gikan sa bulawan nga ulay; duha ka maniko kag tunga ang iya kalabaon, kag isa ka maniko kag tunga ang iya kasangkaron.

7Kag naghimo sia sing duha ka querubin gikan sa pinapa nga bulawan; ginhimo niya sila sa duha ka ukbung sang pakilooyan,

8isa ka querubin sa isa ka ukbung, kag isa ka querubin sa isa pa ka ukbung; ginhimo niya ang mga querubin nga unay sa pakilooyan sa duha niya ka ukbung.

9Ang mga querubin nagahumlad sang ila mga pakpak sa ibabaw, nga nagatabon ang ila mga pakpak sang pakilooyan, nga ang ila mga nawung nagaatubangay; ang mga nawung sang mga querubin nagatamud sa pakilooyan.

10Ginhimo niya ang latok gikan sa kahoy nga acasia; duha ka maniko ang iya kalabaon, isa ka maniko ang iya kasangkaron, kag isa ka maniko kag tunga ang iya kataason;

11kag gintaklapan niya ini sing bulawan nga ulay, kag ginhimoan ini sing molde nga bulawan palibut.

12Kag ginhimoan niya ini sing sanipa palibut nga dapal kasangkad, kag ginhimoan sa sanipa sini sing molde nga bulawan palibut.

13Nagbasia sia nga sa sini sing apat ka argolya nga bulawan, kag gintakud ang mga argolya sa apat ka pamusud sa iya apat ka tiil.

14Ang mga argolya malapit sa sanipa, nga goloan sang mga yayongan sa pagdala sang latok.

15Ginhimo niya gikan sa kahoy nga acasia ang mga yayongan sa pagdala sang latok, kag gintaklapan sila sing bulawan.

16Kag ginhimo niya gikan sa bulawan nga ulay ang mga suludlan nga yara sa latok, ang iya mga pinggan kag mga gamit nga sa incienso, kag ang iya mga yahong kag mga saro nga sa pagbobo sang mga halad.

17Ginhimo man niya ang candelero gikan sa bulawan nga ulay. Ginhimo niya ang candelero gikan sa bulawan nga pinapa; ang iya tiil, ang iya puno, ang iya mga gokop, ang iya mga puskol, kag ang iya mga bukad unay sila sa iya.

18Kag may anum ka sanga nga nagagowa sa mga kilid niya, tatlo ka sanga sang candelero nagagowa sa isa ka kilid niya kag tatlo ka sanga sang candelero nagagowa sa pihak nga kilid niya;

19tatlo ka gokop nga ginhimo kaangay sang mga bulak sang almendro sa isa ka sanga, isa ka puskol kag isa ka bukad, kag tatlo ka gokop nga ginhimo kaangay sang mga bulak sang almendro, sa isa pa ka sanga, isa ka puskol kag isa ka bukad—amo ini sa anum ka sanga nga nagagowa sa candelero.

20Kag sa candelero may apat ka gokop nga ginhimo kaangay sang mga bulak sang almendro, ang iya mga puskol kag ang iya mga bukad,

21kag isa ka puskol sa ubus sang duha ka sanga nga unay sa iya, kag isa ka puskol sa ubus sang duha ka sanga nga unay sa iya, kag isa ka puskol sa ubus sang duha ka sanga nga unay sa iya, sa anum ka sanga nga nagagowa sa iya.

22Ang ila mga puskol kag ang ila mga sanga unay sa iya; ang bug-os niya isa ka pinapa nga buhat sa ulay nga bulawan.

23Kag naghimo sia sang pito ka suga niya kag sang iya mga inugpalong kag sang iya mga alagbonan gikan sa bulawan nga ulay.

24Gikan sa isa ka talanton nga bulawan nga ulay ginhimo niya ini kag ang tanan niya nga mga gamit.

25Ginhimo niya gikan sa kahoy nga acasia ang halaran sang incienso; isa ka maniko ang iya kalabaon, kag isa ka maniko ang iya kasangkaron; kasilo, kag duha ka maniko ang iya kataason; unay sa iya ang iya mga sungay.

26Gintaklapan niya ini sing bulawan nga ulay, ang iya ibabaw, kag ang iya mga kilid sa palibut, kag ang iya mga sungay; kag ginhimoan niya ini sing molde nga bulawan palibut,

27kag ginhimoan niya sing duha ka argolya nga bulawan sa ubus sang molde, sa duha ka magtimbang nga kilid sini, nga goloan sang mga yayongan sa pagdala sini.

28Kag naghimo sia sang mga yayongan gikan sa kahoy nga acasia, kag gintaklapan sila sing bulawan.

29Naghimo sia sang balaan nga lana nga ihalaplas, kag sang ulay nga incienso nga mahamut, sono sa padugi sang manugpahamut.

← Chapter 36 Jump to: Chapter 38 →