Exodus 23

Ilonggo (Ang Biblia (1982))

← Chapter 22 Jump to: Chapter 24 →

1“Dili ka magmitlang sang dimatuud nga sugid. Dili ka magbuylog sa malauton, nga mangindimatarung nga saksi.

2Dili ka magsonod sa kadam-an sa paghimo sing malaut; kag dili ka magsaksi sa kasaba, sa pagpalipas sang kadam-an, sa pagpatiko sang katarungan;

3ukon magdampig ka sa imol nga tawo sa iya kasaba.

4“Kon masugata mo ang baka sang imo kaaway ukon ang iya asno nga nagtalang, iuli mo ini sa iya.

5Kon makita mo nga naglup-og tungud sa iya lulan ang asno nga iya sang nagadumut sa imo, dili mo pagpabayaan sia, dapat mo buligan sia agud mahukasan ini.

6“Dili mo pagpatikoon ang katarungan sang imo imol sa iya kasaba.

7Palayo ka sa kabutigan, kag dili pagpatya ang walay sala kag ang matarung, kay ako indi magpakamatarung sang malauton.

8Kag dili ka magbaton sing hamham, kay ang hamham nagabulag sang mga pangolo, kag nagapatiko sang mga polong sang mga matarung.

9“Dili mo pagpiguson ang dumuloong; kamo nakahibalo sang tagiposoon sang dumuloong, kay mga dumuloong kamo sa duta sang Egipto.

10“Sa anum ka tuig sab-ugan mo ang imo duta kag tiponon mo ang iya patubas;

11apang sa ikapitong tuig papahuwayon mo ini kag pabay-an, agud nga makakaon ang imol sang imo katawohan; kag ang mabilin nila kaonon sang talonon nga mga sapat. Sa among bagay himoon mo sa imo katamnan sang uvas, kag sa imo katamnan sang olivo.

12“Sa anum ka adlaw himoon mo ang imo buluhaton, apang sa ikapitong adlaw magpahuway ka; agud nga makapahuway ang imo baka kag ang imo asno, kag ang anak nga lalaki sang imo ulipon nga babayi, kag ang dumuloong, maumpawan.

13Talupangdon ninyo ang tanan nga ginsiling ko sa inyo; kag dili magsambit sang ngalan sang iban nga mga dios, ukon mabatian ini sa inyo baba.

14“Makatlo sa isa ka tuig hiwatan ako ninyo sing isa ka piesta.

15Hiwaton mo ang piesta sang tinapay nga walay tapay; sa pito ka adlaw magkaon ka sing tinapay nga wala sing tapay, sono sa ginsogo ko sa imo, sa pinat-ud nga tion sa bulan sang Abib, kay sa sini naggowa kamo gikan sa Egipto. Walay sin-o nga magaatubang sa akon nga walay dala.

16Hiwaton mo ang piesta sang ani, nga iya sang mga nahaunang bunga sang imo pagpangabudlay, nga ginasab-ug mo sa uma. Hiwaton mo ang piesta sang pagdamisag, sa katapusan sang tuig, kon magtipon ka sang imo mga pinangabudlayan sa uma.

17Makatlo sa isa ka tuig ang tanan mong lalaki mag-atubang sa Ginoong Dios.

18“Dili mo pag-ihalad ang dugo sang akon halad upud sa tinapay nga may tapay, ukon ang sapay sang akon halad pag-ibilin tubtub sa aga.

19“Ang nahauna sang mga nahaunang bunga sang imo duta dalhon mo sa sulud sang balay sang Ginoo nga imo Dios. “Dili mo paglotoon ang tinday sang kanding sa gatas sang iya inang.

20“Yari karon, ginapadala ko ang manugtunda sa una nimo, sa pagbantay sa imo sa dalanon kag sa pagdala sa imo sa duug nga gin-aman ko.

21Talupangdon mo sia kag pamatii ang iya tingug, dili ka magbatok sa iya, kay indi sia magpatawad sang inyo paglapas; kay ang akon ngalan yara sa iya.

22“Apang kon magpamati ka sang iya tingug kag maghimo sang tanan nga ginasiling ko, niyan ako manginkaaway sa imo mga kaaway kag kasumpung sa imo mga kasumpung.

23“Kon ang akon manugtunda magauna sa imo, kag magadala sa imo sa mga Amornon, kag sa mga Hethanon, kag sa mga Pereznon, kag sa mga Canaanhon, sa mga Hevhanon, kag sa mga Jebusnon, kag papason ko sila,

24dili ka magyaub sa ila mga dios, ukon mag-alagad sa ila, ukon maghimo sono sa ila mga binuhatan, kondi laglagon mo sing bug-os sila kag dugmukon ang ila mga haligi.

25Kag mag-alagad kamo sa Ginoo nga inyo Dios, kag sia magapakamaayo sang imo tinapay, kag sang imo tubig; kag kuhaon ko ang balatian gikan sa imo.

26Wala na sing bisan sin-o nga mahologan ukon magbaw-as sa imo duta; tumanon ko ang kadamuon sang imo kaadlawan.

27Ipadala ko ang akon kakugmat sa una nimo, kag lutuson ko ang tanan nga katawohan nga imo abutan, kag patal-ason ko ang tanan mong kaaway gikan sa imo.

28Kag ipadala ko ang alingayo sa una nimo, nga magasobol sa imo atubangan sang Hevhanon, Canaanhon, kag Hethanon.

29Indi ko sila pagsobolon gikan sa atubangan nimo sa isa ka tuig, basi ang duta magmingaw kag magbuad batok sa imo ang mga sapat sang latagon.

30Sa amatamat sobolon ko sila gikan sa atubangan nimo, tubtub nga magdugang ka kag magpanubli sang duta.

31Kag ibutang ko ang imo mga dulunan kutub sa Dagat nga Mapula tubtub sa dagat sang mga Filistinhon, kag kutub sa kamingawan tubtub sa Eufrates; kay itugyan ko sa imo kamut ang mga pumuluyo sang duta, kag sobolon mo sila gikan sa atubangan nimo.

32Dili ka magpakigkatipan sa ila ukon sa ila mga dios.

33Dili sila pagpapuy-on sa imo duta, basi nga pakasalaon ka nila batok sa akon; kay kon mag-alagad ka sa ila mga dios, sa pagkamatuud manginsiod ina sa imo.”

← Chapter 22 Jump to: Chapter 24 →