Exodus 5

Ilonggo (Ang Biblia (1982))

← Chapter 4 Jump to: Chapter 6 →

1Sang olihi si Moises kag si Aaron nag-abut kag nagsiling kay Faraon, “Amo ini ang ginasiling sang Ginoo, ang Dios sang Israel, ‘Tuguti sa paglakat ang akon katawohan, agud nga maghiwat sila sa akon sing piesta sa kamingawan.’”

2Apang si Faraon nagsiling, “Sin-o bala ang Ginoo, nga magpamati ako sa iya tingug kag magpalakat sang Israel? Ako wala makakilala sang Ginoo, kag labut pa indi ko pagpalakton ang Israel.”

3Niyan nagsiling sila, “Ang Dios sang mga Hebreo nagpakigkita sa amon; ginaampo namon, itugut nga maglakat kami sing tatlo ka adlaw nga lalakton sa kamingawan, kag maghalad sa Ginoo nga amon Dios, basi nga sakiton niya kami sing kalalat-an ukon espada.”

4Apang ang hari sang Egipto nagsiling sa ila, “Moises kag Aaron, ngaa bala ginakuha ninyo ang katawohan sa ila buluhaton? Kadto kamo sa inyo mga lulan.”

5Kag si Faraon nagsiling, “Yari karon, ang katawohan sang duta madamu na karon kag ginpapahuway ninyo sila sa ila mga lulan!”

6Sa amo nga adlaw si Faraon nagsogo sa mga agalon sang pangabudlay sang katawohan kag sa ila manugdumala,

7“Kutub karon dili na ninyo paghatagan sing dagami ang katawohan sa paghimo sing tisa; palakta sila kag patiponon sila ila sing dagami.

8Apang kinahanglanon ninyo sa ila ang kadamuon sang tisa nga ginhimo nila tubtub karon, dili ninyo nga mas-a pagbuhinan ini; kay matamad sila; busa nagasingit sila, ‘Palakta kami kag pahalara sa amon Dios.’

9Pabug-ata ang buluhaton sang mga lalaki agud nga magpangabudlay sila sa sini kag dili magsapak sang mga polong nga butig.”

10Gani ang mga agalon sang pangabudlay sang katawohan kag ang ila mga manugdumala naggowa kag nagsiling sa katawohan, “Amo ini ang ginasiling ni Faraon, ‘Ako indi maghatag sa inyo sing dagami.

11Lakat kamo, kuha kamo sing dagami sa diin makita ninyo ini; apang indi gid pagbuhinan ang inyo buluhaton.’”

12Gani ang katawohan naglapta sa bug-os nga duta sang Egipto, sa pagtipon sing ginalaban sa baylo sang dagami.

13Ang mga agalon sang pangabudlay nagsako, nga nagasiling, “Tapusa ang inyo buluhaton, ang inadlaw nga takay, subong sang may dagami pa.”

14Kag ang mga manugdumala sang katawohan sang Israel, nga ginpagahum sa ila sang mga agalon sang pangabudlay ni faraon, ginpamunal, kag ginpamangkot, “Ngaa bala nga wala ninyo pagtapusa ang inyo takay sa paghimo sing tisa karon, subong sang sa tubtub karon?”

15Niyan ang mga manugdumala sang katawohan sang Israel nagkadto kag naghibi kay Faraon, “Ngaa bala ginahimo mo ang subong sini sa imo mga alagad?

16Wala sing dagami nga nahatag sa imo mga alagad, apang nagasiling sila sa amon, ‘Himo kamo sing tisa!’ Kag yari karon, ang imo mga alagad ginapamunal; apang ang sayup yara sa imo kaugalingon nga katawohan.”

17Apang nagsiling sia, “Matamad kamo, matamad kamo; busa nagasiling kamo, ‘Palakta kami kag pahalara sa Ginoo.’

18Lakat kamo karon, kag magpangabudlay; kay wala sing dagami nga ihatag sa inyo, apang magahatag kamo sang amo nga kadamuon sang mga tisa.”

19Ang mga manugdumala sang katawohan sang Israel nakakita nga yara sila sa malaut nga kahimtangan, sang nagsiling sila, “Dili ninyo nga mas-a pagbuhinan ang inyo inadlaw nga kadamuon sang mga tisa.”

20Ginsugata nila si Moises kag si Aaron, nga nagahulat sa ila, sang paghalin nila kay Faraon;

21kag nagsiling sila sa ila, “Ang Ginoo magtolok sa inyo kag maghukom, bangud nga ginhimo ninyo kami nga kangil-aran sa itololok ni Faraon kag sang iya mga alagad, sa pagbutang sing espada sa ila mga kamut sa pagpatay sa amon.”

22Niyan si Moises nagbalik sa Ginoo kag nagsiling, “O Ginoo, ngaa bala nahimoan mo sing malain ining katawohan? Ngaa bala napadala mo gid ako?

23Kay kutub nga ako nagkadto kay Faraon sa pagpamolong sa ngalan mo, nahimoan niya sing malain ining katawohan, kag ikaw wala gid magluwas sang imo katawohan.”

← Chapter 4 Jump to: Chapter 6 →