Exodus 27

Ilonggo (Ang Biblia (1982))

← Chapter 26 Jump to: Chapter 28 →

1“Himoon mo ang halaran nga kahoy nga acasia, lima ka maniko ang kalabaon kag lima ka maniko ang kasangkaron; ang halaran manginkasilo, kag tatlo ka maniko ang kataason.

2Kag himoan mo sang iya mga sungay sa apat niya ka pamusud; ang iya mga sungay unay sa iya, kag taklapan mo ini sing saway.

3Maghimo ka sang iya mga alabohan, kag sang iya mga pala, kag sang iya mga batiya, kag sang iya mga kaw-it sa unud kag sang iya mga bagahan; ang tanan niyang gamit himoon mo nga saway.

4Himoan mo ini sing isa ka saladang, nga saway nga pinuna; kag sa ibabaw sang saladang maghimo ka sing apat ka argolya nga saway siya apat ka pamusud.

5Kag ibutang mo ini sa idalum sang sanipa palibut sang halaran sa ubus sa bagay nga ang pinuna maglambut tubtub sa katunga sang halaran.

6Kag maghimo ka sing mga yayongan nga sa halaran, mga yayongan nga kahoy nga acasia, kag taklapan sila sing saway;

7kag ang mga yayongan igolo sa mga argolya, sa bagay nga ang mga yayongan yara sa duha ka kilid sang halaran, kon dalhon ini.

8Himoon mo ini nga guyko, nga dagpakan sing mga tapi; sono sa ginpakita sa imo sa bukid, himoon sing subong sini.

9“Maghimo ka sang luwang sang kayangkayang. Sa kilid nga nabagatnan may mga bungbung nga lino nga manipis nga binolong nga sa luwang nga isa ka gatus ka maniko ang kalabaon sa isa ka kilid;

10ang ila mga haligi duha ka pulo kag ang mga boho nga palatindugan duha ka pulo, nga naaporohan sing saway, apang ang mga panga sang mga haligi kag ang ila mga pikit sa liogliog pilak.

11Kag amo man sa kilid nga naaminhan sa kalabaon may mga bungbung nga isa ka gatus ka maniko ang kalaba, ang ila mga haligi duha ka pulo kag ang ila mga boho nga palatindugan duha ka pulo, nga naaporohan sing saway, apang ang mga panga sang mga haligi kag ang ila mga pikit sa liogliog pilak.

12Kag sa kasangkaron sang luwang sa kilid nga nakatundan may mga bungbung nga kalim-an ka maniko, nga may napulo ka haligi kag napulo ka boho nga palatindugan.

13Ang kasangkaron sang luwang sa kilid nayon sa nasidlangan kalim-an ka maniko.

14Ang mga bungbung sang isa ka kilid sang gawang napulog lima ka maniko, nga may tatlo ka haligi kag tatlo ka boho nga palatindugan.

15Sa pihak nga kilid may mga bungbung nga napulog lima ka maniko, nga may tatlo ka haligi kag tatlo ka boho nga palatindugan.

16Sa gawang sang luwang may isa ka lipon nga duha ka pulo ka maniko, nga asul kag purpura kag escarlata kag lino nga manipis nga binolong, ang buhat sang manugborda; ang iya mga haligi apat nga ang ila mga boho nga palatindugan apat.

17Ang tanan nga mga haligi sang luwang palibut pikitan sa liogliog sing pilak; ang ila mga panga pilak, kag ang ila mga boho nga palatindugan naaporohan sing saway.

18Ang kalabaon sang luwang isa ka gatus ka maniko, ang kasangkaron kalim-an bisan diin, kag ang kataason lima ka maniko, nga nabungbungan sing lino nga manipis nga binolong kag ang ila mga boho nga palatindugan naaporohan sing saway.

19Ang tanan nga gamit sang kayangkayang sa tanan nga pag-alagdan, kag ang tanan nga palpal niya kag ang tanan nga palpal sang luwang manginsaway.

20“Kag sogoon mo ang katawohan sang Israel nga dalhan ka nila sing lana sang olivo nga lunsay nga nalubak nga sa suga, sa pagpasiga sang suga sing dalayon.

21Sa layanglayang nga tiliponan, sa gowa sang kumbung nga yara sa atubangan sang pagpamatuud, si Aaron kag ang iya mga anak nga lalaki mag-atipan sini sa atubangan sang Ginoo kutub sa kahaponon tubtub sa kaagahon. Ini manginpalatukuran nga dayon sa bug-os nilang mga kaliwatan tungud sa katawohan sang Israel.

← Chapter 26 Jump to: Chapter 28 →