Exodus 25

Ilonggo (Ang Biblia (1982))

← Chapter 24 Jump to: Chapter 26 →

1Ang Ginoo nagsiling kay Moises,

2“Ipamolong sa katawohan sang Israel, nga magkuha sila nga sa akon sing dolot; sa tagsa ka tawo nga may kabubut-on sa iya tagiposoon batonon ninyo ang akon dolot.

3Kag amo ini ang dolot nga kuhaon ninyo sa ila: bulawan, pilak, kag saway,

4asul kag purpura kag escarlata kag lino nga manipis, kag bulbul sang mga kanding,

5mga panit sang carnero nga lalaki nga nalugum sing mapula, mga panit sang kanding, kahoy nga acasia,

6lana nga sa suga, mga pahumut nga sa lana nga ihalaplas kag sa incienso nga mahamut,

7mga bato nga onice, kag mga bato nga inugtampok, nga sa efod kag sa hapin sa dughan.

8Kag himoan nila ako sing santuario, agud nga ako makapuyo sa tunga nila.

9Sono sa tanan nga ginpahayag ko sa imo nahanungud sa huwaran sang kayangkayang, kag sang tanan niyang mga gamit, himoon mo gid ini sing subong.

10“Maghimo sila sing kaban nga kahoy nga acasia; duha ka maniko kag tunga ang iya kalabaon, isa ka maniko kag tunga ang iya kasangkaron, kag isa ka maniko kag tunga ang iya kataason.

11Kag taklapan mo ini sing ulay nga bulawan, sa sulud kag sa gowa taklapan mo ini, kag maghimo ka sa ibabaw sini sing molde nga bulawan palibut.

12Kag magsalsal ka nga sa sini sing apat ka argolya nga bulawan, kag itakud sila sa iya apat ka pamusud, kag duha ka argolya sa isa ka kilid sini, kag duha ka argolya sa pihak nga kilid sini.

13Maghimo ka sing mga yayongan nga acasia, kag taklapan sila sing bulawan.

14Kag igolo mo ang mga yayongan sa mga argolya sa mga kilid sang kaban, sa pagdala sang kaban.

15Ibilin sa mga argolya sang kaban ang mga yayongan; dili sila paghusloon sa sini.

16Kag ibutang mo sa sulud sang kaban ang pagpamatuud nga ihatag ko sa imo.

17Niyan maghimo ka sing pakilooyan nga bulawan nga ulay; duha ka maniko kag tunga ang iya kalabaon, kag isa ka maniko kag tunga ang iya kasangkaron.

18Kag maghimo ka sing duha ka querubin nga bulawan; himoon mo sila sa bulawan nga sinalsal, sa duha ka ukbung sang pakilooyan.

19Maghimo ka sing isa ka querubin sa isa ka ukbung, kag isa ka querubin sa pihak nga ukbung; himoon ninyo ang mga querubin nga unay sa pakilooyan sa iya duha ka ukbung.

20Ang mga querubin magahumlad sang ila mga pakpak sa ibabaw, nga nagalandong ang ila mga pakpak sa pakilooyan, nga ang ila mga nawung nagaatubangay; ang mga nawung sang mga querubin nagatamud sa pakilooyan.

21Kag itungtung mo ang pakilooyan sa kaban; kag sa sulud sang kaban ibutang mo ang pagpamatuud nga ihatag ko sa imo.

22Didto magapakigkita ako sa imo, kag magapakighambal ako sa imo gikan sa ibabaw sang pakilooyan, sa tunga sang duha ka querubin nga yara sa ibabaw sang kaban sang pagpamatuud, sang tanan nga butang nga isogo ko sa imo nga sa katawohan sang Israel.

23“Kag maghimo ka sing latok nga kahoy nga acasia; duha ka maniko ang iya kalabaon, kag isa ka maniko ang iya kasangkaron, kag isa ka maniko kag tunga ang iya kataason.

24Taklapan mo ini sing ulay nga bulawan, kag himoan ini sing molde nga bulawan palibut.

25Kag himoan mo ini sing sanipa nga dapal kasangkad palibut; kag himoan mo ini sing molde nga bulawan sa palibut sang iya sanipa.

26Kag himoan mo ini sing apat ka argolaya nga bulawan, kag itakud ang apat ka argolya sa apat ka pamusud nga yara sa iya apat ka tiil.

27Ang mga argolaya malapit sa sanipa, nga bulutangan sang mga yayongan sa pagdala sang latok.

28Himoon mo ang mga yayongan nga kahoy nga acasia, kag taklapan sila sing bulawan, kag tungud sa ila madala ang latok.

29Kag himoan mo sang iya mga pinggan kag mga gamit nga sa incienso, kag sang iya mga saro kag mga yahong nga sa pagbobo sang mga halad; himoon mo sila gikan sa ulay nga bulawan.

30Kag sa ibabaw sang latok ibutang mo ang tinapay nga pahayag sa atubangan nakon sa gihapon.

31“Kag maghimo ka sing candelero nga ulay nga bulawan. Himoon ang candelero sa sinalsal nga bulawan, ang iya tiil kag ang iya puno; ang iya mga gokop, ang iya mga puskol, kag ang iya mga bukad mangin-unay sa sini;

32kag may anum ka sanga nga magagowa sa iya mga kilid, tatlo ka sanga sang candelero sa isa ka kilid niya sini kag tatlo ka sanga sang candelero sa pihak nga kilid sini;

33tatlo ka gokop nga ginhimo kaangay sang mga bulak sang almendro, ang tagsa may isa ka puskol kag isa ka bukad, sa isa ka sanga, kag tatlo ka gokop nga ginhimo kaangay sang mga bulak sang almendro, ang tagsa may isa ka puskol kag isa ka bukad, sa pihak nga sanga—amo ini sa anum ka sanga nga nagagowa sa candelero;

34kag sa candelero apat ka gokop nga ginhimo kaangay sang mga bulak sang almendro, nga may ila nga mga puskol kag mga bukad,

35kag isa ka puskol sa ubus sang duha ka sanga nga unay sa iya, kag isa ka puskol sa ubus sang duha ka sanga nga unay sa iya, kag isa ka puskol sa ubus sang duha ka sanga unay sa iya, nga sa anum ka sanga nga nagagowa sa candelero.

36Ang ila mga puskol kag ang ila mga sanga unay sa sini, ang bug-os sini unay nga sinalsal nga bulawan nga ulay.

37Kag maghimo ka sa sini sing pito ka suga; kag ibutang ang mga suga sa bagay nga maghatag sing kapawa sa atubangan sini.

38Ang iya mga inugpapalong kag ang ila mga alagbonan mangin-ulay nga bulawan.

39Sa isa ka talanton nga bulawan nga ulay himoon ini, pati ini tanan nga gamit.

40Kag tan-awa nga himoon mo sila sono sa huwaran nila, nga ginpakita sa imo sa bukid.

← Chapter 24 Jump to: Chapter 26 →