Exodus 6

Ilonggo (Ang Biblia (1982))

← Chapter 5 Jump to: Chapter 7 →

1Apang ang Ginoo nagsiling kay Moises, “Karon makita mo ang akon himoon kay Faraon; kay sa makusug nga kamut magatugut sia sa pagpalakat sa ila, hoo, sa makusug nga kamut sobolon niya sila pagowa sa iya duta.”

2Kag ang Dios nagsiling kay Moises, “Ako ang Ginoo.

3Ako nagpahayag kay Abraham, kay Isaac, kag kay Jacob, subong nga Dios nga Makaako, apang sa akon ngalan nga Ginoo wala ako magpakilala sa ila.

4Ako man nakapakigkatipan sa ila, sa paghatag sa ila sang duta sang Canaan, ang duta diin nagpuyo sila subong nga mga manlulugayaw.

5Labut pa nabatian ko ang pag-ugayong sang katawohan sang Israel nga gin-ulipon sang mga Egiptohanon kag ako nakadumdum sang akon katipan.

6Busa isiling sa katawohan sang Israel, ‘Ako ang Ginoo, kag pagowaon ko kamo gikan sa idalum sang mga lulan sang mga Egiptohanon, kag luwason ko kamo sa kahiolipnan nila, kag tubson ko kamo sa butkon nga inuntay kag sa dalagku nga mga paghukom,

7kag angkonon ko kamo nga akon katawohan, kag ako mangin-inyo Dios; kag magakilala kamo nga Ako ang Ginoo nga inyo Dios, nga nagpagowa sa inyo gikan sa idalum sang mga lulan sang mga Egiptohanon.

8Kag dalhon ko man kamo sa duta nga ginsumpa ko nga ihatag kay Abraham, kay Isaac, kag kay Jacob; ihatag ko ini sa inyo nga kaugalingon. Ako ang Ginoo.’”

9Si Moises nagpamolong sing subong sa katawohan sang Israel; apang wala sila magpamati kay Moises, bangud sang ila samad nga espiritu kag sang ila mapintas nga kahiolipnan.

10Kag ang Ginoo nagsiling kay Moises,

11“Sulud ka, hambala si Faraon nga hari sang Egipto nga pagowaon niya ang katawohan sang Israel gikan sa iya duta.”

12Apang si Moises nagsiling sa Ginoo, “Yari karon, ang katawohan sang Israel wala magpamati sa akon; paano bala niyan nga magpamati sa akon si Faraon, nga ako dicircuncidado sa mga bibig?”

13Apang ang Ginoo nagpamolong kay Moises kag kay Aaron, kag gintulinan sila nahanungud sa katawohan sang Israel kag kay Faraon nga hari sang Egipto sa pagpagowa sang katawohan sang Israel gikan sa duta sang Egipto.

14Ini sila amo ang mga pangolo sang ila mga kabaranggayan: ang mga lalaking anak ni Ruben, nga panganay ni Israel: si Hanoc, si Palu, si Hezron kag si Carmi; ini sila amo ang mga panimalay ni Ruben.

15Ang mga lalaking anak ni Simeon: si Jemuel, si Jamin, si Ohad, si Jaquin, si Zohar, kag si Saul, nga anak sang Canaanhon nga babayi; ini sila amo ang mga panimalay ni Simeon.

16Ini sila amo ang mga ngalan sang mga lalaking anak ni Levi sono sa ila mga kaliwatan: si Gerson, si Coat, kag si Merari, ang mga tinuig sang kabuhi ni Levi isa ka gatus kag katloan kag pito ka tuig.

17Ang mga lalaking anak ni Gerson: si Libni kag si Simei, sono sa ila mga panimalay.

18Ang mga lalaking anak ni Coat: si Amram, si Izar, si Hebron kag si Uziel, ang mga tinuig sang kabuhi ni Coat isa ka gatus kag katloan kag tatlo ka tuig.

19Ang mga lalaking anak ni Merari: si Mali kag si Musi. Ini sila amo ang mga panimalay sang mga Levinhon sono sa ila mga kaliwatan.

20Si Amram nagpangasawa kay Jocabed nga utud sang iya amay kag sia nag-anak sa iya kay Aaron kag kay Moises, ang mga tinuig sang kabuhi ni Amram isa ka gatus kag katloan kag pito ka tuig.

21Ang mga lalaking anak ni Izar: si Core, si Nefeg, kag si Zicri.

22Kag ang mga lalaking anak ni Uziel: si Misael, si Elzafan, kag si Sitri.

23Si Aaron nagpangasawa kay Elisabet, ang anak ni Aminadab kag babaying utud ni Nason; kag sia nag-anak sa iya kay Nadab, kay Abiu, kay Eleazar, kag kay Itamar.

24Ang mga lalaking anak ni Core: si Asir, si Elcana, kag si Abiasaf; ini sila amo ang mga panimalay sang mga Corinhon.

25Si Eleazar, nga anak ni Aaron, nagpangasawa sang isa sang mga anak ni Putiel; kag sia nag-anak sa iya kay Finees. Ini sila amo ang mga pangolo sang mga kabaranggayan sang mga Levinhon sono sa ila panimalay.

26Ini sila amo yadtong Aaron kag Moises nga sa ila nagsiling ang Ginoo: “Pagowaa ang katawohan sang Israel gikan sa duta sang Egipto sono sa ila mga kasoldadosan.”

27Ini sila amo ang nagpamolong kay Faraon nga hari sang Egipto sa pagpagowa sang katawohan sang Israel gikan sa Egipto, ini sila amo yadtong Moises kag Aaron.

28Sa adlaw sang nagpamolong ang Ginoo kay Moises sa duta sang Egipto,

29ang Ginoo nagsiling kay Moises, “Ako ang Ginoo; sugiri si Faraon nga hari sang Egipto sang tanan nga ginasiling ko sa imo.”

30Apang si Moises nagsiling sa Ginoo, “Yari karon, ako dicircuncidado sa mga bibig; paano bala niyan ang pagpamati sa akon ni Faraon?”

← Chapter 5 Jump to: Chapter 7 →