Exodus 24

Ilonggo (Ang Biblia (1982))

← Chapter 23 Jump to: Chapter 25 →

1Kag nagsiling ang Dios kay Moises, “Tukad ka pakadto sa Ginoo, ikaw kag si Aaron, si Nadab, kag si Abiu, kag ang kapitoan sang mga tigulang sang Israel, kag simba kamo sa malayo.

2Si Moises lamang ang magpalapit sa Ginoo; apang ang iban dili magpalapit, kag ang katawohan dili magtukad upud sa iya.”

3Si Moises nag-abut kag nagsugid sa katawohan sang tanan nga polong sang Ginoo kag sang tanan nga mga pagsolondan; kag ang bug-os nga katawohan nagsabat sa isa ka tingug, kag nagsiling, “Ang tanan nga polong nga napamolong sang Ginoo himoon namon.”

4Kag ginsulat ni Moises ang tanan nga polong sang Ginoo. Kag nagbangon sia sing aga pa, kag nagpatindug sing halaran sa kunsaran sang bukid, kag sang napulog duha ka haligi, sono sa napulog duha ka kabikahan sang Israel.

5Kag nagpadala sia sing mga pamatan-on nga lalaki sang katawohan sang Israel, nga nagdolot sing mga halad-nga-sinonog kag naghalad sing mga halad-sa-paghidait nga mga baka sa Ginoo.

6Kag ginkuha ni Moises ang katunga sang dugo kag ginbutang ini sa mga palanggana, kag ang katunga sang dugo ginwisik niya sa ibabaw sang halaran.

7Niyan ginkuha niya ang tolon-an sang katipan, kag ginbasa sa idulungug sang katawohan; kag nagsiling sila, “Ang tanan nga napamolong sang Ginoo himoon namon, kag kami magmatinumanon.”

8Kag ginkuha ni Moises ang dugo kag ginwisik sa katawohan, kag nagsiling, “Yari karon ang dugo sang katipan nga ginhimo sang Ginoo sono sini tanan nga polong.”

9Niyan nagtukad si Moises kag si Aaron, si Nadab, kag si Abiu, kag ang kapitoan sang mga tigulang sang Israel,

10kag nakita nila ang Dios sang Israel; kag yara sa idalum sang iya mga tiil ang daw nabanigan sang bato nga zafiro, nga daw langit gid katin-aw.

11Kag wala niya pagtakdungi sang iya kamut ang mga puno sang katawohan sang Israel; sila nagtolok sa Dios, kag nagkaon kag nag-inum.

12Ang Ginoo nagsiling kay Moises, “Tukad ka pakari sa akon sa bukid, kag maghulat didto; kag ihatag ko sa imo ang mga tapitapi nga bato, upud ang kasogoan kag ang sogo, nga nasulat ko, sa pagtudlo sa ila.”

13Gani si Moises nagtindug kag si Josue nga alagad niya, kag si Moises nagtukad sa bukid sang Dios.

14Kag nagsiling sia sa mga tigulang, “Hulata ninyo kami diri, tubtub nga magbalik kami sa inyo; kag, yari karon, upud sa inyo si Aaron kag si Hur; ang bisan sin-o nga may kasaba, magdangup sia sa ila.”

15Niyan si Moises nagtukad sa bukid, kag ginputus sang panganud ang bukid.

16Ang himaya sang Ginoo nagpabilin sa ibabaw sang Bukid nga Sinai, kag ang panganud nagputus sini sa anum ka adlaw; kag sa ikapitong adlaw gintawag sang Dios si Moises gikan sa tunga sang panganud.

17Karon sa panolok sang katawohan sang Israel ang dagway sang himaya sang Ginoo kaangay sang kalayo nga nagahalonhon sa putokputokan sang bukid.

18Kag si Moises nagsulud sa tunga sang panganud, kag nagtukad sa bukid. Kag didto si Moises sa bukid sing kap-atan ka adlaw kag kap-atan ka gab-i.

← Chapter 23 Jump to: Chapter 25 →