Exodus 19

Ilonggo (Ang Biblia (1982))

← Chapter 18 Jump to: Chapter 20 →

1Sa ikatlong lati sang paggowa sang katawohan sang Israel gikan sa duta sang Egipto, sa among adlaw nag-abut sila sa kamingawan sang Sinai.

2Kag sang nagtaliwan sila gikan sa Refidim kag nag-abut sa kamingawan sang Sinai, nagpahamtang sila sing dologan sa kamingawan; kag ang Israel nagpahamtang sing dologan didto sa atubang sang bukid.

3Kag si Moises nagtukad pakadto sa Dios, kag ang Ginoo nagtawag sa iya gikan sa bukid, nga nagasiling, “Amo ini ang isiling mo sa panimalay ni Jacob, kag sugiri ang katawohan sang Israel:

4Kamo nakakita sang ginhimo ko sa mga Egiptohanon, kag kon paano nga gindala ko kamo sa ibabaw sang mga pakpak sang aguila kag gindala kamo sa akon.

5Busa karon, kon magtuman kamo sang akon tingug kag magbantay sang akon katipan, manginkaugalingon kamo nakon sa tunga sang tanan nga mga katawohan; kay ang bug-os nga duta akon,

6kag kamo manginginharian nga mga sacerdote sa akon kag pungsud nga balaan. Ini amo ang mga polong nga ipamolong mo sa mga anak sang Israel.”

7Gani si Moises nag-abut kag nagpatawag sang mga tigulang sang katawohan, kag ginpahayag sa atubangan nila ini tanan nga polong nga ginsogo sa iya sang Ginoo.

8Kag ang bug-os nga katawohan nagsabat sing dungan kag nagsiling, “Ang tanan nga napamolong sang Ginoo himoon namon.” Kag ginsugid ni Moises sa Ginoo ang mga polong sang katawohan.

9Kag ang Ginoo nagsiling kay Moises, “Yari karon, ako nagakari sa imo sa isa ka madamul nga panganud agud nga ang katawohan makabati sa nagahambal ako sa imo, kag magtoo man sa imo sa gihapon.” Niyan ginsugid ni Moises ang mga polong sang katawohan sa Ginoo.

10Kag ang Ginoo nagsiling kay Moises, “Balik ka sa katawohan kag pakabalaana sila karon nga adlaw kag buwas, kag magbunak sila sang ila mga bayo,

11kag maghanda sa ikatlong adlaw; kay sa ikatlong adlaw ang Ginoo magapanaug sa itololok sang bug-os nga katawohan sa ibabaw sang Bukid nga Sinai.

12Kag magabutang ka sing mga dulunan sa katawohan sa palibut, nga nagasiling, ‘Andam kamo nga indi kamo magtaklad sa bukid ukon magtandug sang dulunan sini; ang bisan sin-o nga magtandug sa bukid patyon;

13wala sing kamut nga magtandug sa iya, kondi sia batohon ukon panaon; bisan ini sapat ukon tawo, indi sia mabuhi.’ Sa pagtonog sing malawig sang budyong, magatukad sila sa bukid.”

14Gani si Moises nagdulhog gikan sa bukid pakadto sa katawohan, kag ginpakabalaan ang katawohan; kag nagbunak sila sang ila mga bayo.

15Kag nagsiling sia sa katawohan, “Handa kamo sa ikatlong adlaw; dili kamo magpalapit sa babayi.”

16Sa kaagahon sang ikatlong adlaw may mga daguub kag mga kilat, kag gal-um nga madamul sa ibabaw sang bukid, kag tonog sang budyong nga tama kabaskug, gani nagkurug ang bug-os nga katawohan nga yara sa dologan.

17Niyan ginpagowa ni Moises ang katawohan gikan sa dologan sa pagsugata sa Dios; kag nagtindug sila sa kunsaran sang bukid.

18Kag ang Bukid nga Sinai naputus sang aso, bangud nga ang Ginoo nagpanaug sa ibabaw sini sa kalayo; kag ang aso sini nagtub-ok subong sang aso sang horno, kag ang bug-os nga bukid nagkurug sing mabaskug gid.

19Kag sang nagdugang kabaskug ang tonog sang budyong, si Moises nagpamolong, kag ang Dios nagsabat sa iya sa daguub.

20Kag ang Ginoo nagpanaug sa ibabaw sang Bukid nga Sinai, sa putokputokan sang bukid; kag gintawag sang Ginoo si Moises sa putokputokan sang bukid, kag si Moises nagtukad.

21Kag ang Ginoo nagsiling kay Moises, “Dulhog ka kag paandami ang katawohan, basi nga maglakbang sila sa pagtolok sa Ginoo kag madula ang madamu sa ila.

22Kag ang mga sacerdote man nga nagapalapit sa Ginoo magpakabalaan sang ila kaugalingon, basi nga ang Ginoo magtupa sa ila.”

23Kag si Moises nagsabat sa Ginoo, “Ang katawohan indi makatukad sa Bukid nga Sinai; kay ikaw nagtulin sa amon, nga nagasiling, ‘Butangi sing mga dulunan sa palibut sang bukid, kag pakabalaana ini.’”

24Kag ang Ginoo nagsiling sa iya, “Dulhog ka, kag magtukad nga nagadala kay Aaron; apang ang mga sacerdote kag ang katawohan dili maglakbang sa pagtukad pakadto sa Ginoo, basi nga magtupa sia batok sa ila.”

25Gani si Moises nagdulhog pakadto sa katawohan kag nagsugid sa ila.

← Chapter 18 Jump to: Chapter 20 →