Exodus 40

Ilonggo (Ang Biblia (1982))

← Chapter 39 Jump to:

1Ang Ginoo nagsiling kay Moises,

2“Sa nahaunang adlaw sang nahaunang bulan patindugon mo ang kayangkayang sang layanglayang nga tiliponan.

3Kag ibutang mo sa sulud sini ang kaban sang pagpamatuud, kag lipnan mo sang kumbung ang kaban.

4Kag ipasulud mo ang latok, kag ipahamtang sing nagakaigo ang mga butang sa ibabaw sini; kag ipasulud mo ang candelero, kag ipahamtang ang iya mga suga.

5Kag ibutang mo ang halaran nga bulawan nga sa incienso sa atubangan sang kaban sang pagpamatuud, kag itakud ang lipon sang ganhaan sa kayangkayang.

6Ibutang mo ang halaran sang halad-nga-sinonog sa atubangan sang ganhaan sang kayangkayang sang layanglayang nga tiliponan,

7kag ibutang mo ang batiya sa ulut sang layanglayang nga tiliponan kag sang halaran, kag sudlan ini sing tubig.

8Kag ipahamtang mo ang luwang sa palibut, kag ibitay ang lipon sang gawang sang luwang.

9Niyan magkuha ka sang lana nga ihalaplas, kag haplason ang kayangkayang kag ang tanan nga yara sa sulud sini, kag pakabalaanon ini kag ang tanan nga kasangkapan sini; kag manginbalaan ini.

10Haplason mo man ang halaran sang halad-nga-sinonog kag ang tanan niyang gamit, kag pakabalaanon ang halaran; kag ang halaran manginbalaan gid.

11Haplason mo man ang batiya kag ang iya tulungtungan, kag pakabalaanon ini.

12Niyan dalhon mo si Aaron kag ang iya mga anak nga lalaki sa ganhaan sang layanglayang nga tiliponan, kag hinawan sila sing tubug,

13kag isuklub mo kay Aaron ang mga panapton nga balaan, kag haplason mo sia kag pakabalaanon sia, agud nga mag-alagad sia sa akon sa pagkasacerdote.

14Dalhon mo man ang iya mga anak nga lalaki kag sukluban sila sing mga bayo,

15Kag haplason mo sila, subong sang paghaplas mo sa ila amay, agud nga mag-alagad sila sa akon sa pagkasacerdote: kag ang paghaplas sa ila mangindayon nga pagkasacerdote sa ila mga kaliwatan.

16Amo ini ang ginhimo ni Moises; sono sa tanan nga ginsogo sa iya sang Ginoo, amo ini ang iya ginhimo.

17Kag sa nahaunang adlaw sang bulan nga nahauna sa ikaduhang tuig, ang kayangkayang ginpatindug.

18Si Moises nagpatindug sang kayangkayang; ginpahamtang ang iya mga boho nga palatindugan, kag ginpatindug ang iya mga tapi, kag gingolo ang iya mga balabag, kag ginbangon ang iya mga haligi;

19kag ginhumlad niya ang layanglayang sa ibabaw sang kayangkayang, kag ginhumlad ang taklap sang layanglayang sa ibabaw sini, sono sa ginsogo sang Ginoo kay Moises.

20Kag ginkuha niya kag ginbutang ang pagpamatuud sa sulud sang kaban, kag gingolo ang mga yayongan sa kaban, kag gintungtung ang pakilooyan sa ibabaw sang kaban;

21kag ginsulud niya ang kaban sa kayangkayang, kag ginbitay ang kumbung sang lipon, kag lipnan ang kaban sang pagpamatuud; sono sa ginsogo sang Ginoo kay Moises.

22Kag ginsulud niya ang latok sa layanglayang nga tiliponan, sa kilid nga naaminhan sang kayangkayang, sa gowa sang kumbung,

23kag ginpahamtang niya sing nagakaigo ang tinapay sa ibabaw sini sa atubangan sang Ginoo; sono sa ginsogo sang Ginoo kay Moises.

24Kag ginbutang niya ang candelero sa layanglayang nga tiliponan, sa atubangan sang latok sa kilid nga nabagatnan sang kayangkayang nayon sa bagatnan,

25kag ginpahamtang niya ang mga suga sa atubangan sang Ginoo; sono sa ginsogo sang Ginoo kay Moises.

26Kag ginbutang niya ang halaran nga bulawan sa layanglayang nga tiliponan sa atubangan sang kumbung,

27kag sa ibabaw sini nagsonog sia sing incienso nga mahamut; sono sa ginsogo sang Ginoo kay Moises.

28Kag gintakud niya ang lipon sang ganhaan sa kayangkayang.

29Kag ginbutang niya ang halaran sang halad-nga-sinonog sa ganhaan sang kayangkayang sang layanglayang nga tiliponan, kag naghalad sa ibabaw sini sang halad-nga-sinonog kag sang halad-nga-kalan-on; sono sa ginsogo sang Ginoo kay Moises.

30Kag ginbutang niya ang batiya sa ulut sang layanglayang nga tiliponan kag sang halaran, kag ginsudlan ini sing tubig nga inugpanghinaw,

31si Moises kag si Aaron kag ang iya mga anak nga lalaki nagpanghinaw sa sini sang ila mga kamut kag sang ila mga tiil;

32kon magsulud sila sa layanglayang nga tiliponan, kag kon magpalapit sila sa halaran nagpanghinaw sila; sono sa ginsogo sang Ginoo kay Moises.

33Kag ginpahamtang niya ang luwang sa palibut sang kayangkayang kag sang halaran, kag gintakud ang lipon sang gawang sang luwang. Gani natapus ni Moises ang buluhaton.

34Niyan ang panganud nagtabon sang layanglayang nga tiliponan, kag ang himaya sang Ginoo nagpuno sang kayangkayang.

35Kag si Moises indi makasulud sa layanglayang nga tiliponan, bangud nga ang panganud nagpabilin sa ibabaw sini, kag ang himaya sang Ginoo nagpuno sang kayangkayang.

36Sang naghayaw ang panganud sa ibabaw sang kayangkayang, ang katawohan sang Israel nagpadayon, sa tanan nilang panlakatan;

37apang kon ang panganud wala maghayaw, niyan wala sila magpanlakatan tubtub sa adlaw nga naghayaw ini.

38Kay ang panganud sang Ginoo yara sa ibabaw sang kayangkayang sa adlaw, kag may kalayo sa sulud sini sa kagab-ihon, sa itololok sang bug-os nga panimalay sang Israel, sa tanan nilang panlakatan.

← Chapter 39 Jump to: