2 Kings 16

Luganda (BIBU1) (BIBULIYA ENTUKUVU)

← Chapter 15 Jump to: Chapter 17 →

1Mu mwaka ogw'ekkumi n'omusanvu ogwa Peka mutabani wa Remaliya, Akazi mutabani wa Yotamu kabaka wa Yuda n'afuuka kabaka,

2Akazi yatandika okufuga nga wa myaka amakumi abiri; yafugira mu Yeruzaalemu emyaka kkumi na mukaaga. Teyakola kituufu mu maaso ga Mukama Katondawe nga Dawudi jjajjaawe bwe yakola,

3wabula yagoberera amakubo ga bakabaka ba Yisirayeli. Era yawonga ne mutabani we mu muliro, n'akola ebyenyinyalwa eby'amawanga Omukama ge yali agobeddewo abantu ba Yisirayeli.

4Yatambiranga n'okunyookeza obubaani mu bifo ebigulumivu ne ku busozi na buli wansi wa muti oguggumizza.

5Olwo Rezini kabaka wa Aramu ne Peka mutabani wa Remaliya kabaka wa Yisirayeli baayambuka okutabaala Yeruzaalemu, ne bazinda Akazi, naye tebaasobola kumuwangula.

6Mu budde obwo kabaka wa Edomu n'anunula Elati n'akiddiza Edomu. Yagobamu Abayudaaya, Abeedomu ne basenga mu Elati, ne babeera omwo n'okutuusa olunaku lwa leero.

7Akazi n'atuma ababaka ewa Tigulati-Pileeseri kabaka wa Assuri, bamugambe nti: “Nze ndi muweereza wo, mutabani wo. Jjangu eno, omponye mu mikono gya kabaka wa Aramu ne mu gya kabaka wa Yisirayeli abannumbye.”

8Akazi n'akuŋŋaanya ffeeza ne zaabu eyasangibwa mu Kiggwa ky'Omukama ne mu nkuluze z'olubiri lwa kabaka, n'amuweereza kabaka wa Assuri ng'ebirabo.

9Ne kabaka wa Assuri n'akkiriza, era n'alumba Damasiko, n'akiwamba. Abatuuze baamu n'abawaŋŋangusiza e Kiri, ne Rezini n'amutta.

10Olwo kabaka Akazi n'agenda okusisinkana Tigulati-Pileeseri kabaka wa Assuri mu Damasiko. Akazi bwe yalaba omwaliiro ogwali mu Damasiko n'aweereza ewa Wuriya kabona ekifaananyi n'entereeza yonna ey'enzimba yaagwo.

11Wuriya kabona n'azimba omwaliiro ng'agoberera entereeza yonna kabaka Akazi gye yali aweerezza ng'ayima e Damasiko, n'amaliriza nga kabaka Akazi tannadda okuva e Damasiko.

12Kabaka bwe yava e Damasiko n'alaba omwaliiro, n'asembera gye guli n'aweererezaako ebitambiro.

13Yaweereza ebitambiro bye ebyokye n'ebitone bye eby'obuwunga; yayiwa ekitone eky'okuyiwa, n'amansira ku mwaliiro omusaayi gw'ekitambiro eky'okussa ekimu.

14Omwaliiro ogw'ekikomo ogwali mu maaso g'Omukama yaguggya mu maaso g'Ekiggwa, kwe kugamba, okuva wakati w'omwaliiro omuggya n'Ekiggwa ky'Omukama, n'agussa ku luuyi lw'omwaliiro omuggya olw'emambuka.

15Era kabaka Akazi n'alagira Wuriya kabona nti: “Ku mwaliiro omunene kw'oba oweererezanga ekitambiro ekyokye eky'oku makya n'ekitone eky'obuwunga eky'akawungeezi, ekitambiro kya kabaka ekyokye n'ekitone kye eky'obuwunga, ebitambiro ebyokye eby'abantu bonna mu ggwanga, n'ebitone byabwe eby'obuwunga n'eby'okuyiwa. Mansira ku mwaliiro gwonna omusaayi gwonna ogw'ebitambiro ebyokye n'ebitone. Gwo omwaliiro ogw'ekikomo nnaagweyambanga okwebuuza.”

16Wuriya kabona n'akola byonna nga kabaka Akazi bwe yali abiragidde.

17Kabaka Akazi yaggya ku butandaalo enzizi, era n'ebinaabirwamu n'abiggyako. Ennyanja ey'ekikomo yagiggya ku nte ez'ekikomo ezaali zigiwanirira n'agissa awaaliriddwa amayinja.

18Olw'okubeera kabaka wa Assuri yaggyawo ekidaala kya sabbaato ekyali kizimbiddwa ku Kiggwa n'ekkubo lya kabaka w'ayingirira eryali ebweru w'Ekiggwa ky'Omukama.

19Ebirala mu bifaayo bya Akazi ne bye yakola byawandiikibwa mu Kitabo ky'Ebyafaayo bya Bakabaka ba Yuda.

20Akazi n'agalamira ne bajjajjaabe, n'aziikibwa wamu nabo mu Kibuga kya Dawudi; mutabani we Kezekiya n'amusikira ku bwakabaka.

← Chapter 15 Jump to: Chapter 17 →