2 Kings 5

Luganda (BIBU1) (BIBULIYA ENTUKUVU)

← Chapter 4 Jump to: Chapter 6 →

1Naamani yali muduumizi w'eggye lya kabaka wa Aramu; yali muntu mukulu mu maaso ga mukama we, ng'assibwamu ekitiibwa, kubanga Omukama yali awadde Aramu obuwanguzi bungi ng'ayita mu ye. Yali musajja mutabaazi omuzira, kyokka nga mugenge.

2Kati nno ebikwanga byali bivudde mu Aramu ne bigenda okunyaga mu Yisirayeli; eyo ne biwambayo omuwala omuto kati eyali omuzaana wa muka Naamani.

3Omuwala n'agamba mugole we nti: “Singa nno mukama wange agendako ew'omulanzi mu Samariya! Oyo yandimuwonnyezza ekigenge kye.”

4Naamani n'agenda ewa mukama we n'amugamba nti: “Omuwala eyava mu nsi ya Yisirayeli, agamba bw'ati ne bw'ati.”

5Kabaka wa Aramu n'amugamba nti: “Kituufu, genda. Nzija kuweereza kabaka wa Yisirayeli ebbaluwa.” Naamani n'agenda, ng'atutte ne talenta kkumi eza ffeeza, sekeli kakaaga eza zaabu, n'emizingo gy'ebyambalo eby'emikolo kkumi.

6Ebbaluwa gye yatwala ewa kabaka wa Yisirayeli yali esoma bw'eti: “Ebbaluwa eno bw'ekutuukako, manya nti nkusindikidde omuweereza wange Naamani omuwonye ekigenge kye.”

7Kabaka wa Yisirayeli bwe yasoma ebbaluwa, n'ayuza ebyambalo, n'agamba nti: “Ndi Katonda nti nsobola okutta ne nzizaamu obulamu, ono kyavudde ansindikira omuntu awonyezebwe ekigenge? Mulabe ono annoonyaako luyombo.”

8Elisa omuntu wa Katonda bwe yakiwulira nti kabaka wa Yisirayeli ayuzizza ebyambalo bye, n'amutumira ng'agamba nti: “Lwaki oyuzizza ebyambalo byo? Muleke ajje gye ndi ategeere nti mu Yisirayeli mulimu omulanzi.”

9Naamani n'ajja n'embalaasi ze n'ebigaali bye n'ayimirira ku mulyango gw'ennyumba ya Elisa.

10Elisa n'amutumira omubaka amugambe nti: “Genda onaabe emirundi musanvu mu Yorudani, omubiri gwo gujja kuddawo olongooke.”

11Naye Naamani n'asunguwala, n'agenda ng'atolotooma nti: “Mbadde ndowooza nti anaafuluma n'ajja gye ndi, n'ayimirira n'akoowoola erinnya lya Mukama Katonda we, n'ayisa omukono gwe awali ekigenge, n'amponya ekigenge kyange.

12Emigga Abana ne Farupari egya Damasiko tegisinga bulungi mazzi gonna aga Yisirayeli? Sandisobodde kunaaba mu gino ne nziramu okulongooka?” N'afunyamu n'agenda ng'anyiigombye.

13Abaweereza be ne basembera w'ali, ne bamugamba nti: “Kitange, singa omulanzi abadde akugambye kukola kintu kisingawo, tewandikikoze? Leero nno alabisa kati ng'akugambye bugambi nti: ‘Naaba, oddewo olongooke?’ ”

14N'akkirira, ne yennyika mu Yorudani emirundi musanvu ng'omuntu wa Katonda bwe yali amugambye, omubiri gwe ne gulongooka, nga kawerette ng'ogw'omwana omuto.

15Naamani n'ekibinja kye kyonna ne bakomawo ew'omuntu wa Katonda, n'ayimirira mu maaso ge, n'agamba nti: “Kati mmanyidde ddala nti teri Katonda walala wonna mu nsi, wabula mu Yisirayeli mwokka. Kale nno, nkwegayiridde, kkiriza okusiima okuva ew'omuweereza wo.”

16Ye n'ayanukula nti: “Mazima Omukama gwe mpeereza nga mulamu, sijja kubaako kye ntwala.” Ne bwe yamusindirira, teyakkiriza n'akatono.

17Naamani n'agamba nti: “Oba tootwaleko, nkwegayiridde, omuweereza wo muweeyo ku ttaka eryenkana ennyumbu bbiri lye zisobola okutwala, kubanga omuweereza wo takyaddayo kuweereza bitambiro byokye oba bitone balubaale, wabula Omukama.

18Kino kyokka Omukama ky'aba asonyiwa omuweereza wo: mukama wange bw'aliyingira mu kiggwa kya Rimmoni asinzize eyo, ate engeri gye yeesigama ku mukono gwange, olwo nange ndivunnama mu kiggwa kya Rimmoni; bwe ndiba nvunnamye mu kifo ekyo, Omukama ansaasire nze omuweereza wo olw'ekigambo ekyo.”

19Elisa n'amusiibula nti: “Genda mirembe.” Naamani ng'atambuddeko akabanga,

20Gekazi omuweereza w'omuntu wa Katonda n'agamba nti: “Mukama wange amaze galeka ati Naamani ono Omwaramu, n'atakkiriza ku bye yaleeta. Mazima Omukama nga mulamu, ka mmuwondere mbeeko ke mmuggyako.”

21Gekazi n'awondera Naamani. Naamani bwe yamulaba ng'adduka ajja gy'ali, n'abuuka ku kigaali kye, n'agenda okumusisinkana, n'amubuuza nti: “Byonna biri bulungi?”

22Ye n'agamba nti: “Biri bulungi, wabula Mukama wange antumye nkugambe nti: ‘Abavubuka babiri okuva mu bannakibiina ky'abalanzi bakantuukako nga bava mu nsozi za Efurayimu. Baweeyo talenta emu eya ffeeza n'emizingo ebiri egy'ebyambalo.’ ”

23Naamani n'amugamba nti: “Ekisinga obulungi, twalira ddala talenta bbiri.” N'asindirira Gekazi azikkirize. N'asiba talenta bbiri mu nsawo ey'omu ngalo, n'emizingo gy'ebyambalo ebiri, n'abikwasa abaweereza be babiri, ne babitwala nga bakulembeddemu Gekazi.

24Bwe yatuuka ku kasozi, n'abitikkula ku baweereza, n'abaako w'abissa mu nnyumba, n'asiibula abasajja, ne bagenda.

25N'ayingira, n'ayimirira mu maaso ga mukama we. Elisa n'amubuuza nti: “Gekazi, ova wa?” N'ayanukula nti: “Omuweereza wo tannabaako w'alaga.”

26Elisa n'amugamba nti: “Omwoyo gwange tegwabaddewo omusajja bwe yavudde ku kigaali kye okukusisinkana? Buno bwe budde okufuna ffeeza, oba okutwala ebyambalo, ennimiro z'oliva n'ez'evviini, endiga, ente, abaddu n'abazaana?

27Kati ekigenge kya Naamani kikunywerereko n'ezzadde lyo emirembe gyonna.” Gekazi n'ava w'ali nga mugenge, nga mweru ng'omuzira.

← Chapter 4 Jump to: Chapter 6 →