2 Kings 7

Luganda (BIBU1) (BIBULIYA ENTUKUVU)

← Chapter 6 Jump to: Chapter 8 →

1Elisa n'agamba nti: “Muwulire ekigambo ky'Omukama. Omukama kino ky'agamba: ‘Enkya mu budde nga buno, seya y'obuwunga obukuŋŋunte eneeba egula sekeli ya ffeeza emu, ate seya bbiri eza sayiri zijja kugula sekeli ya ffeeza emu ku wankaaki wa Samariya.’ ”

2Omugabe ow'oku kigaali nnyini mukono kabaka kwe yali yeesigamye n'ayanukula omuntu wa Katonda nti: “Omukama ne bw'anaasumulula ebiyiriro by'eggulu, ekyo kinaasoboka okubeerawo?” N'amuddamu nti: “Ojja kukyerabirako n'amaaso go, naye tojja kulyako.”

3Waaliwo abasajja bana abagenge okumpi n'omuzigo gwa wankaaki, ne bagambagana nti: “Kiki ekitutuuza wano okutuusa lwe tunaafa?

4Bwe tugamba nti: ‘Tuyingire mu kibuga,’ enjala gyeri, tujja kufiirayo. Bwe tusigala wano era tujja kufa. Mugire tuddukire mu nsiisira za Aramu tweweeyo. Bwe banaatusaasira, nga tuwonye. Bwe banaatutta, kale tunaafa.”

5Akawungeezi, ne basitula, ne bagenda mu lusiisira lw'Abaaramu. Naye bwe baatuuka ku ndeboolebo z'olusiisira lwa Aramu, tebaasangawo muntu n'omu.

6Anti Omukama yawuliza Abaaramu encaako y'ebigaali omusinde gw'embalaasi n'okuwuuma kw'eggye eddene. Ne bagambagana nti: “Mulabe, kabaka wa Yisirayeli aguliridde bakabaka b'Abakitti ne bakabaka b'Abamisiri bajje batulwanyise.”

7Ne baduma, ne badduka akawungeezi, ne baleka awo weema zaabwe, embalaasi n'endogoyi. Olusiisira ne baluleka nga bwe lwali, ne badduka okwewonya.

8Abagenge bwe baatuuka ku ndeboolebo z'olusiisira, ne bayingira mu weema emu. Ne balya, ne banywa, ne batwala ffeeza, zaabu, n'ebyambalo, ne bagenda babikweka. Ne bakomawo ne bayingira mu weema endala, namwo ne batwalamu ebintu, ne bakweka.

9Naye ne bagambagana nti: “Kye tukola si kituufu; luno olunaku lwa mawulire malungi, ate ffe tugasirikidde. Bwe tunaalinda okutuusa enkya, tujja kubonerezebwa. Mujje tugende tutegeeze mu lubiri lwa kabaka.”

10Ne bagenda, ne bayita abaggazi b'ekibuga, ne babanyumiza nti: “Twagenze mu lusiisira lw'Abaaramu, tewaabaddeyo muntu n'omu, yadde omuntu anyega, wabula embalaasi n'endogoyi ensibe, weema nga zirekeddwa awo zityo.”

11Abaggazi ne baleekaanira waggulu, amawulire ne gatuuka ne mu lubiri lwa kabaka.

12Kabaka n'asituka ekiro, n'agamba abaweereza be nti: “Mbabuulire Abaaramu kye batukoze? Bamanyi nga tufa enjala, kyebavudde bava mu nsiisira ne beekweka ku ttale, nga bagamba nti: ‘Bajja kuvaayo mu kibuga, awo tujja kubakwata nga balamu,’ olwo ffe tuyingire mu kibuga.”

13Omu ku baweereza be n'agamba nti: “Tuddire embalaasi ttaano ezisigadde mu kibuga tuzisindikeyo, tulabe. Ekinaazigwako kinaaba ng'eky'abantu ba Yisirayeli bonna abasigaddewo abasuliridde okufa.”

14Ne baleeta ebigaali bibiri ko n'embalaasi zaakwo; kabaka n'abisindika biwondere eggye lya Aramu, n'agamba abagoba baabyo nti: “Mugende, mulabe.”

15Ne babawondera okutuuka ku Yorudani. Ekkubo lyonna lyali lijjudde ebyambalo n'ebintu by'Abaaramu bye baagendanga basuula nga baduma. Ababaka ne bakomawo, ne bategeeza kabaka.

16Abantu ne bafuluma, ne banyaga olusiisira lw'Abaaramu. Seya y'obuwunga obukuŋŋunte ng'egula sekeli ya ffeeza emu, ate seya ebbiri eza sayiri nga zigula sekeli emu, ng'Omukama bwe yali agambye.

17Kabaka yali atadde ku gw'okulabirira wankaaki omugabe ow'oku kigaali, nnyini mukono kwe yeesigamanga. Abantu baamulinnyiririra awo ku wankaaki, n'afa, ng'omuntu wa Katonda bwe yali ayogedde kabaka lwe yali azze ku nnyumba ye.

18Kyatuukirira ng'omuntu wa Katonda bwe yali agambye kabaka nti: “Enkya mu budde nga buno, seya y'obuwunga obukuŋŋunte eneeba egula sekeli ya ffeeza emu, ate seya bbiri eza sayiri zijja kugula sekeli ya ffeeza emu ku wankaaki wa Samariya.”

19Omugabe ow'oku kigaali yali ayanukudde omuntu wa Katonda nti: “Omukama ne bw'anaasumulula ebiyiriro by'eggulu, ekyo kinaasoboka okubeerawo?” Elisa yali amuzzeemu nti: “Ojja kukyerabirako n'amaaso go, naye tojja kulyako.”

20Ekyo kyennyini kye kyamutuukirira, kubanga abantu baamulinnyiririra ku wankaaki, n'afa.

← Chapter 6 Jump to: Chapter 8 →