Joshua 11

Luganda (BIBU1) (BIBULIYA ENTUKUVU)

← Chapter 10 Jump to: Chapter 12 →

1Yabini, kabaka wa Kazori bwe yawulira ebyo, n'atumira Yobabu kabaka wa Madoni, ne kabaka wa Simuroni, ne kabaka wa Akusafu,

2n'eri bakabaka b'emambuka mu nsozi, ne mu Araba emaserengeta ga Kinnereti, ne mu Sefela, ne mu Nafoti-Dori ebugwanjuba,

3n'eri Abakanaani ebuvanjuba n'ebugwanjuba, Abaamori, Abakitti, Abaperizzi, Abayebusi mu nsi y'ensozi, n'Abakivi abaabeeranga wansi w'olusozi Kerumoni mu nsi y'e Mizupa.

4Ne basitula bonna, amagye gaabwe gonna n'embalaasi wamu n'ebigaali bingi nnyo, ng'abatabaazi bangi, butabalika ng'omusenyu ogw'oku lubalama lw'ennyanja.

5Bakabaka abo bonna ne bakuŋŋaana ne basiisira wamu ku mazzi g'e Meromu, balwanyise Yisirayeli.

6Awo Omukama n'agamba Yoswa nti: “Tobatya, kubanga enkya mu budde nga buno, abo bonna nzija kubassa mu maaso ga Yisirayeli nga bamaze okuttibwa; embalaasi zaabwe ojja kuzisala enteega, n'ebigaali obyokye omuliro.”

7Yoswa n'agenda ku mazzi ga Meromu, wamu n'eggye lyonna, n'abazinduukiriza.

8Omukama n'abawaayo mu mikono gya Yisirayeli. Baabakuba, ne babawondera okubatuusa e Sidoni Omunene n'e Misurefoti-Mayimu ne mu Kiwonvu ky'e Mizupa ebugwanjuba; yabakubira ddala okutuusa nga tewali n'omu asigaddewo.

9Yoswa yakola ng'Omukama bwe yali amulagidde: embalaasi zaabwe n'azisala enteega, n'ebigaali n'abyokya.

10Mu budde obwo Yoswa n'awamba Kazori, ne kabaka waakyo n'amutta n'ekitala; Kazori kye kyali ekibuga ekikulu eky'eŋŋoma zino zonna.

11Yatta bonna abaabeerangamu okubasaanyizaawo ddala. Buli kirimu akassa kyonna yakizikiriza, n'ekibuga n'akyokya omuliro.

12Yoswa n'awamba ebibuga byonna ebya bakabaka ebyetooloddewo ne bakabaka baabyo n'abawangula, n'abisaanyaawo nga Musa omuweereza w'Omukama bwe yali alagidde.

13Naye Yisirayeli teyayokya bibuga byali ku ntuumu; kimu kyokka, Kazori, Yoswa kye yazikiriza n'omuliro.

14Bye baanyaga mu bibuga bino n'ebisolo by'awaka Abayisirayeli baabyetwalira, naye bo abantu baabatta bonna, obutatalizaawo n'omu; buli alimu akassa baamutta.

15Omukama kye yali alagidde omuweereza we Musa, ne Musa kye yalagira Yoswa, Yoswa kye yakola; teyalekayo wadde akagambo kati ku ebyo Omukama bye yali alagidde Musa.

16Bw'atyo Yoswa n'awamba ensi yonna: ensi ey'ensozi, ne Negevu yenna, n'ensi yonna eya Goseni, Sefela, Araba, ensozi za Yisirayeli n'emiseetwe ensozi gye zisembera.

17Okuva ku lusozi Kalaki, olugenda lugulumira okweyunga ku Seyiri, okutuuka ku Baali-Gaadi mu Kiwonvu kya Lebanoni wansi w'Olusozi Kerumoni. Bakabaka baabwe bonna yabakwata, n'abakuba n'abatta.

18Yoswa yamala ebbanga ggwanvu ng'alwanyisa bakabaka abo.

19Tewali kibuga kyakola ndagaano na Bayisirayeli okuggyako Abakivi abaabeeranga mu Gibewoni; abalala bonna Yisirayeli yabakwata mu ntalo.

20Kubanga Omukama ye yagugubya emitima gyabwe balwanyise Yisirayeli, balyoke bazikirizibwe ddala, baleme kusaasirwa n'akatono, basaanyizibwewo, ng'Omukama bwe yali alagidde Musa.

21Mu budde obwo Yoswa n'agenda n'atta Abaanaki mu nsozi z'e Keburoni, mu Debiri, mu Anabu, mu nsozi za Yuda ne mu nsozi zonna eza Yisirayeli. Yoswa bonna n'abazikiriza n'ebibuga byabwe.

22Mu Baanaki teyalekawo n'omu mu nsi ya Yisirayeli, okuggyako abaali mu bibuga Gaza, Gati ne Asudodi be baawonawo.

23Yoswa n'awamba ensi yonna ng'Omukama bwe yali agambye Musa, n'agiwa Yisirayeli ng'obusika bwabwe ng'agoberera ebika byabwe n'ebitundu byabwe. Awo ensi n'eweerako ku ntalo.

← Chapter 10 Jump to: Chapter 12 →