Joshua 20

Luganda (BIBU1) (BIBULIYA ENTUKUVU)

← Chapter 19 Jump to: Chapter 21 →

1Omukama n'agamba Yoswa nti: “Gamba Abayisirayeli nti:

2‘Musseewo ebibuga eby'obuddukiro bye nabalagira nga mpita mu Musa,

3buli yenna asse omuntu mu butanwa nga tagenderedde gy'anaasanganga obuddukiro ku awoolera eggwanga olw'omusaayi.

4Bw'addukiranga mu kimu ku bibuga ebyo, ayimiriranga ku muzigo gw'omulyango gw'ekibuga n'asooka yennyonnyolako eri abakadde b'ekibuga ekyo. Olwo balimukkiriza n'ayingira mu kibuga, ne bamuwa w'anaabeeranga.

5Awoolera eggwanga olw'omusaayi bw'awonderanga eyatta, tebamuwangayo mu mikono gye, kubanga teyagenderera kutta munne; tekyava mu bukyayi mu kusooka.

6Omuntu eyatta, ateekwa okusigala mu kibuga ekyo okutuusa ng'awozeseddwa mu maaso g'ekibiina, n'okutuusa nga kabona omukulu eyaliwo mu budde obwo amaze okufa. Olwo eyatta omuntu alisobola okuddayo mu maka ge, mu kibuga kye kye yali adduseemu.’ ”

7Awo kwe kwawula ebibuga: Kedesi mu Galilaaya, mu nsozi za Nafutali, Sekemu, mu nsozi za Efurayimu, ne Kiriyati-Aruba, oba Keburoni, mu nsozi za Yuda.

8Emitala wa Yorudani ne ebuvanjuba wa Yeriko baalonda Bezeri, ekiri mu ddungu, ku museetwe, mu kika kya Rubeni, Ramoti mu Gileyaadi, mu kika kya Gaadi, ne Golani mu Basani, mu kika kya Manasse.

9Bino bye bibuga ebyayawulirwa Abayisirayeli bonna, n'abagwira abaalinga mu bo, buli yabanga asse omuntu mu butanwa mwe yaddukiranga asobole okuwona awoolera eggwanga olw'omusaayi, okutuusa ng'amaze okuwozesebwa ekibiina.

← Chapter 19 Jump to: Chapter 21 →