Joshua 13

Luganda (BIBU1) (BIBULIYA ENTUKUVU)

← Chapter 12 Jump to: Chapter 14 →

1Yoswa bwe yali akaddiye ng'ayise mu myaka, Omukama n'amugamba nti: “Okaddiye, era oyise mu myaka, sso ate ensi ekyali nnene nnyo etennawambibwa.

2Eno ye nsi ekyasigalidde: ensi yonna ey'Abafilisitiini n'ey'Abagessuri yonna,

3okuva ku mugga Sikori ebuvanjuba wa Misiri, okutuuka ku nsalo ya Ekuroni emambuka, ensi ebalibwa ng'ey'Abakanaani ey'abafuzi abataano Abafilisitiini, e Gaza, Asudodi, Esukeroni, Gati, ne Ekuroni; Abavvi bali emaserengeta.

4Ensi yonna ey'Abakanaani okuva ku Ara eky'Abasidoni, okutuuka ku Afeki, ne ku nsi y'Abaamori,

5n'ensi y'Abagebali wamu n'ensi yonna eya Lebanoni ebuvanjuba, okuva ku Baali-Gaadi, wansi w'olusozi Kerumoni okutuuka ku Lebo-Kamati.

6“Bonna abatuuze b'omu nsozi okuva ku Lebanoni okutuuka ku Misurefoti-Mayimu, kwe kugamba abatuuze bonna Abasidoni, abo nze nzija kubagobawo mu maaso g'Abayisirayeli. Ggwe ensi gigabanyizeemu Abayisirayeli ku kalulu ng'obusika nga bwe nakulagira.

7Kale nno gigabanyizeemu ebika omwenda n'ekyokubiri ky'ekika kya Manasse ng'obusika.”

8Ebika ekya Rubeni ne Gaadi wamu n'ekyokubiri ky'ekika kya Manasse baali bafunye obusika okuva ku Musa, nga Musa omuweereza w'Omukama bwe yali abubawadde ebuvanjuba wa Yorudani:

9okuva ku Aroweri, ekiri ku lubalama lw'Ekiwonvu Arunoni, okuva ku kibuga ekiri mu makkati g'ekiwonvu n'otwaliramu n'emiseetwe gyonna egy'e Medeba okutuusa e Diboni,

10n'ebibuga byonna ebya Sikoni kabaka w'Abaamori, eyafugiranga e Kesuboni, okutuuka ku nsalo y'Abammoni,

11ssaako Gileyaadi n'ensi y'Abagessuri n'Abamaakati, n'olusozi Kerumoni lwonna, ne Basani yenna okutuuka e Saleka,

12kwe kugamba obwakabaka bwonna obwa Ogi mu Basani, eyafugiranga mu Asutaroti ne Edureyi, eyali akyasigaddewo mu Barefa abasembayo. Musa yabakuba n'abawamba.

13Naye Abayisirayeli tebaazikiriza Bagessuri n'Abamaakati. N'olw'ekyo Abagessuri n'Abamaakati bakyali n'Abayisirayeli n'okutuusa ku lunaku lwa leero.

14Kyokka ekika kya Leevi teyakiwa busika; wabula ebitambiro by'Omukama Katonda wa Yisirayeli ebiweerezebwa n'omuliro, bwe busika bwabwe, nga bwe yali abagambye.

15Musa yawa ekika kya Rubeni ng'agoberera amasiga gaabwe, ensi eno:

16baava ku Aroweri ku lubalama lw'Ekiwonvu Arunoni, ku kibuga ekiri mu makkati g'ekiwonvu, n'omuseetwe gwonna okutuuka e Medeba,

17n'okweyongerayo okutuuka e Kesuboni n'ebibuga byakwo eby'oku museetwe, omuli Diboni, Bamoti-Baali, ne Beti-Baali-Mewoni;

18Yawazi, Kedemoti ne Mefaati;

19Kariyatayimu, Sibuma ne Zereti-Sakari ku lusozi olw'omu kiwonvu,

20Beti-Pewori, enkonko za Pisuga ne Beti-Yesimoti,

21ebibuga byonna eby'omu museetwe n'obwakabaka bwonna obwa Sikoni, kabaka w'Abaamori, eyali afugira e Kesuboni. Musa yali amuwangudde n'abaami abaali bafuga Midiyaani: Evi ne Rekemu Zuru, Kuru, ne Reba, abaami ba Sikoni abaabeeranga mu nsi eyo.

22Okwongereza ku balala Abayisirayeli be baali basanjaze, mwe mwali ne Balaamu mutabani wa Bewori, omulaguzi.

23Ensi y'ab'ekika kya Rubeni ng'ekoma ku mugga Yorudani. Ekyo kye kitundu ab'ekika kya Rubeni kye baafuna mu masiga gaabwe, ebibuga n'ebyalo byabyo.

24Musa yawa ekika kya Gaadi, be bazzukulu ba Gaadi, ng'agoberera amasiga gaabwe,

25ne bafuna ekitundu ky'e Yazeri n'ebibuga byonna ebya Gileyaadi, n'ekyokubiri ky'ensi y'Abammoni, okutuukira ddala ku Aroweri ekiriraanye Rabba,

26ate n'okuva e Kesuboni okutuuka e Ramati-Mizupa ne Betonimu, era n'okuva e Makanayimu okutuukira ddala ku nsi y'e Debiri.

27Mu kiwonvu baafuna Beti-Aramu, Beti-Nimura, ne Sukkoti ne Zafoni, ekitundu ekisigadde eky'obwakabaka bwa Sikoni, kabaka wa Kesuboni. Kino kye kitundu eky'ebuvanjuba wa Yorudani, ekigoba Yorudani okutuukira ddala ku nsonda eya wansi w'ennyanja ya Kinnereti.

28Ekyo kye kitundu bazzukulu ba Gaadi kye baafuna mu masiga gaabwe, ebibuga n'ebyalo byabyo.

29Musa yali awadde ekyokubiri ky'ekika kya Manasse, kwe kugamba ekyokubiri ky'ekika ky'abazzukulu ba Manasse, omugabo ng'agoberera amasiga gaabwe,

30ne bafuna ekitundu okuva e Makanayimu, Basani yenna, obwali obwakabaka bwa Ogi, kabaka wa Basani, ebyalo byonna ebya Yayiri ebiri mu Basani; byonna awamu bye bibuga nkaaga.

31Ekyokubiri ekya Gileyaadi, Asutaroti ne Edureyi, ebyali ebibuga by'obwakabaka bwa Ogi mu Basani, byaweebwa ekyokubiri ky'ab'essiga lya Makiri, mutabani wa Manasse, ng'agoberera amasiga gaabwe.

32Obwo bwe busika Musa bwe yali agerese mu nsenyi za Mowabu, emitala wa Yorudani ebuvanjuba wa Yeriko.

33Naye ekika kya Leevi Musa teyakiwa busika, kubanga Omukama Katonda wa Yisirayeli yennyini bwe busika bwabwe, nga bwe yali abagambye.

← Chapter 12 Jump to: Chapter 14 →