Luke 21

Luganda (BIBU1) (BIBULIYA ENTUKUVU)

← Chapter 20 Jump to: Chapter 22 →

1Bwe yayimusa amaaso, n'alaba abagagga nga basuula ebirabo byabwe mu ggwanika;

2n'alaba nnamwandu omwavu ng'asuulamu obusente bubiri.

3N'agamba nti: “Mazima mbagamba nti nnamwandu oyo omwavu asuddemu kingi okusinga bonna.

4Kubanga abo bonna bataddemu ebirabo nga baggya ku bibafikkiridde; sso ng'ono mu bwavu bwe ataddemu kyonna ekibadde eky'okumuliisa.”

5Abamu bwe baali bayogera ku Kiggwa nga bwe baakiwoomya n'amayinja amalungi n'ebitone, n'agamba nti:

6“Ebyo bye mulaba, ennaku zirituuka lwe watalisigala jjinja liri ku linnaalyo litalisuulibwa wansi.”

7Awo ne bamubuuza nti: “Muyigiriza, ebyo biribaawo ddi, era kabonero ki akalyoleka ebyo nga binaatera okubaawo?”

8N'abagamba nti “Mwekkaanye, temuwubisibwanga; kubanga bangi balijja mu linnya lyange nga bagamba nti: ‘Nze wuuyo!’ oba nti: ‘Obudde butuuse!’ Temugezanga nno kubagoberera.

9Bwe muliwulira entalo n'obutabanguko, muleme kutengera; ebyo tebirirema kusooka kubaawo, naye yo enkomerero teriba ya mangu ago.”

10Awo n'abagamba nti: “Eggwanga lirisitukira mu linnaalyo, n'obwakabaka mu bunnaabwo.

11Walibaawo musisi ow'amaanyi ne mu bifo ebimu walibaayo enjala ne kawumpuli; walibaawo n'ebitiisa n'obubonero obunene okuva mu ggulu;

12Naye ebyo nga tebinnabaawo, balibakwata, balibayigganya, balibatwala mu sinaagooga ne mu makomera; mulitwalibwa mu maaso ga bakabaka n'abalamuzi okubeera erinnya lyange.

13Kano ke kaliba akadde kammwe okujulira.

14“Emitima gibabe mu nteeko, muleme kweraliikirirawo bwe muneewozaako.

15Kubanga nze ndibawa ebigambo n'amagezi abalabe bammwe bonna bye bataliyinza kwaŋŋanga na kuwakanya.

16Ne bazadde bammwe, baganda bammwe, abeŋŋanda ne mikwano gyammwe balibawaayo, balittamu n'abamu mu mmwe.

17Mulikyayibwa bonna olw'okubeera erinnya lyange.

18Kyokka tewaliba luviiri na lumu lwa ku mutwe gwammwe luzikirira.

19Mu kugumiikiriza kwammwe mwe mulituukira ku bulamu bwammwe.

20“Bwe mulabanga Yeruzaalemu kizindiddwa amagye, olwo mutegeeranga ng'okuzikirizibwa kwakyo kutuuse.

21Olwo abaliba mu Buyudaaya baddukiranga mu nsozi; abali mu kibuga bakyamukanga, ate abo abali mu byalo tebakiyingiranga.

22Kubanga ezo ze nnaku ez'ebibonerezo, ebyawandiikibwa byonna biryoke bituukirire.

23Zibasanze abo abaliba embuto n'abayonsa mu nnaku ezo! Kubanga obuyinike ku nsi n'obusungu ku bantu bano biriba bingi.

24Balittibwa n'obwogi bw'ekitala, ne batwalibwa nga basibe mu mawanga gonna; ne Yeruzaalemu ab'amawanga balikirinnyirira okutuusa ebiro by'ab'amawanga lwe birituukirira.

25“Walirabika obubonero mu njuba ne mu mwezi ne mu mmunyeenye; ate mu nsi amawanga galyeraliikirira olw'okuwuluguma kw'ennyanja n'amayengo;

26abantu balizirika olw'okutya n'okulindirira ebigenda okujjira ensi yonna; kubanga amaanyi ag'omu ggulu galinyeenyezebwa.

27Awo baliraba Omwana w'Omuntu ng'ajjira mu bire n'amaanyi n'ekitiibwa kinene.

28Mulabanga ebyo bitanula okubaawo, muyimiriranga busimba ne mulalamya emitwe gyammwe, kubanga okununulibwa kwammwe kuli kumpi.”

29N'abaleetera olugero nti: “Mutunuulire omukunyu n'emiti gyonna;

30bwe gitandika okutojjera, mutegeera mmwennyini ng'obudde obw'ekyeya bunaatera okutuuka.

31Nammwe nno, bwe mulabanga ebyo byonna bibaawo, mumanyanga ng'obwakabaka bwa Katonda buli kumpi.

32Mazima mbagamba nti ezzadde lino teririggwaawo ebyo byonna nga tebinnatuukirira.

33Eggulu n'ensi biriggwaawo, naye ebigambo byange tebiriggwaawo.

34“Kale mwekuume, sikulwa ng'emitima gyammwe giggweera mu kunywa ne mu butamiivu n'okweraliikirira okw'obulamu buno, olunaku luli ne lubagwako bugwi ng'omutego;

35anti bonna abali mu nsi yonna lulibajjira.

36Awo nno mutunule ebbanga lyonna, nga mwegayirira, musobole okuwona ebyo byonna ebigenda okujja, musobole n'okuyimirira mu maaso g'Omwana w'Omuntu.”

37Emisana yayigirizanga mu Kiggwa, ate ekiro yafulumanga n'agenda asula ku Lusozi lw'Oliva.

38Ku makya abantu bonna baakeeranga ne bagenda mu Kiggwa okumuwulira.

← Chapter 20 Jump to: Chapter 22 →