Jeremiah 10

Lugbara (E’yo Siza Alatararu Munguniri BIBLIA)

← Chapter 9 Jump to: Chapter 11 →

1Emi eri e’yo Yehovani ’yole emi tiari, emi ori’ba Israelini la.

2Yehova ’yo ’dini: Emi ma oni geri ’ba jururu ’diyini ku, emi asi ma oti eceta efupi ’bua ’diyisi ku a’disiku ’ba jururu ’diyi ma asini oti oti eceta nde ’diyisi,

3a’disiku e’yo ’ba jururu ’diyini adrile ’yele ’diyi yi toko. Te yi adri pati oce talaari ga; eri onduouni ’yele drisi azini ogarasiri ma dripamvu’i.

4’Ba yi a’bu eri ma rua dahabu pisi mele be; yi eci eri musumari odile opaasi ’diyisi, eri ma oya i ku beni.

5’Ba opa yi, yi si ekile pati itunile, te yi ’yoni e’yo ku; ’ba yi ’du yi ’du ’du yini ecole acile kurisi. Emi ma ru yi ku, yi econi ’yezaru onzi ku, eri ovuni yi alia e’yo onyiru ’yezu ku indi.

6Te ’ba azini i sipi mileni yo fo, Yehova la Mi ovu amboru, ru miniri ovu amboru okpo be.

7’Ba ngapi mi rupi kuri a’di’i ya, mi Opi amboru suruniri la? A’disiku e’yo ’dirini mi sile sirisi; te ’ba dria onduaru ’ba suruni ma eselia ’diyi ti, kani opi nyaza yini ma alia dria ti, ’ba aluni mileni yo.

8Te yi ovu dria anyapale azazaru; imbata wura siribaruniri ’ovu pati duluti tokoni!

9Yi eji dahabu ’bani dile di aya walarileri engazu Tarisisia, azini mele engazu Ufazia. Yi dripamvu onduou pini ’ba mele dipi okaari beri’i; bongo yini wura blururi pisi wura okalakokalaruri beri; yi dria ovu dripamvu onduouni.

10Te Yehova eri Mungu adaruri’i; eri Mungu idriruri’i, Opi ’dani ’daniri’i. Te adra erinisi nyakuni ya ya, suru econi pa sozaru adra erini ma milia ku.

11Emi ma ’yo yi tia kini: Mungu ’bu pi ’bapi nyaku be ku ’diyi nga dri ja nyakuarisi, ’bu etiasi indi.

12Eri’i, eri ’ba ndra nyaku okpo inisi, eri fe wudrikuruni pa sozu ondua inisi, e’yo vaza inisi eri aja ’bu walaru ra,

13Erini i o’duko ofuria, yi osa i awu be ’bua, azini eri fe apurusani enga uru engazu nyaku ma kalatini asizu’diyia. Eri ede ovi ozoo dri, eri oli ofu engazu pari ini afa ta mbazu ’diyia.

14’Ba dria alu alu eca anyapale e’yo vaza kokoru; onduou mele dipi okaa ’diyi alu alu dria isu drinza wura toko yini edele ayasi ’diyisi; a’disiku wura toko yini edele aya rapi acisiri ovu e’yo inzoru, ava yi ma alia yo.

15Yi afa tokoni, afa ’ba icizuri’i; o’du yi cozurisi yi nga dri la ra.

16Te lonyi Yakoboniri ovuni afa ’diyile ku, a’disiku eri ’ba afa dria ’bapiri’I, te Israeli ovu suru eri ma yilaniri’i; ru erini Yehova asikari ongulumuruniri’i. Angu Yudani ’bazu andruru

17Mi oku afa oziza mini engazu angu ma aliarisi, mi ovupi pari acele ombasi kururi ma aliari!

18A’disiku Yehova ’yo ’dini, kini: Mi ndre, o’du ndesi ma nga ’ba ovupi angu nde ma alia ’diyi o’be amve, ma nga yi dri candi fe, ’dini eri ma etumu yi ani.

19Eyawa ma yet ma rua su su ’doni ya! Bile mani ovu onzi tu. Te ma ’yo ra, ’Di candi mani ada, ma di ma asi imba ani ’dani.

20Hema mani eza i ’bo, baka mani dria oce yi ’bo; anzi mani ku ma ’bo, yi yo; ’ba hema mani ajapi dikani yo, ’ba bongo mani o’ipi uruni yo.

21A’disiku ’ba kabilo ocepi ’diyi oja yi anyapale ’bo, yi zini e’yo Yehova ria ku; e’yo ’disi yi isuni drileba ku, kabilo o’biru yini ere yi dria ’bo.

22O’duko e’yo kuzani! Mi ndre, eri emu ra!- iyikiyii amboru engazu angu andraleruria aku amboru Yudaa ’diyi ezazu andruru, yi ’bazu pari obalokoni ovuzuriru.

23Yehova la, ma ni ra geri ’bani ovuni i ngulupi ma alia ku, eri ovuni ’ba acipi aciri ma alia i ma acita otizuni ku.

24Yehova la, mi co ma imbazu, te aga tu ku; adrasi ku, mi kazu ma inizu ku.

25Mi ma osu adra mini suru mi nipi ku ’diyi ma dria, ori’ba mi ru omvepi ku ’diyi ma dria indi; yini Yakobo ma dri jale ’borisi; ada, yi ja eri dri ’bo, yi ini eri teketeke, yi eza pari erini ovuzuri andruru ’bo.

← Chapter 9 Jump to: Chapter 11 →