Jeremiah 35

Lugbara (E’yo Siza Alatararu Munguniri BIBLIA)

← Chapter 34 Jump to: Chapter 36 →

1E’yo ecapi Yeremia vu engapi Yehova vu o’du Yehoyakimu Yosia mvi opi Yudaarinisiri eri ’dini, kini:

2Mi mu ori’ba Rekabuni ’diyi vu, mi ’yo yi be, mi eji yi jo Yehovania cazu kpere jo aliza azinia; mi fe patiefi su yi dri mvuzu.

3Te ma nga di Yeremia Habazinia mvi ma mvi Yaazaniani ’du, adripi erini pie, anzi erini pie dria, ori’ba Rekabuni ’diyi pie dria.

4Ma nga di yi eji jo Yehovania, kpere anzi Hanani gidalia ’ba Munguniri ma mvini ma jo alizari ma alia, jo nde ovupi ’ba opiru ma jo alizari ma tia, jo aliza Maaseya Salumu mvi ’ba jotile agei tepirini ma driari’i.

5Ma nga obi patiefi su be ’diyi ’ba ori’ba Rekabu anziyini ’diyi ma palaa, kerea pie; ma ’yo yi tia, Emi mvu ilpatiefi su ki!

6Te yi ’yo ra, Ama ngani patiefi su mvu ku, a’disiku ama ati Yonadabu Rekabu mvi’i lazi ama tia kini, Emi ma mvu patiefi risu anzi emini be ’dani ku;

7emi ma si vini jo ku, ma ri ori ku, emi ma sa zabibuni amvua ku, emi ma ovu afa nde be ku; te o’du eminia dria emi ma adri hema ma alia, ’dini emi ma ovu ani eli kakau angu emini ovuzu alenia ani’boruri ma alia beni,

8Te ama eri o’duko Yonadabu Rekabu mvi ama atini, e’yo dria erini azile ama tiari ma alia ra, ama ma mvu patiefi su ku o’du amanisi dria, ama’i, oku amani pie, agupianzi amani pie, ezoanzi amani pie;

9ama ma si vini jo amani ovuzuri ku. Amvu zabibuni amani vini yo, amvu azini yo, ori yo;

10te ama ovu hema ma alia ra, te ama eri ’bo, ama ’ye e’yo dria ekile Yonadabu ama atini azile ama tiarile ra.

11Te eri eca ndra ’dini Nebukadreza opi Babuloniarini eturia efiria angu ’diria, ama ’yo ra, Ama emu, ama tu Yerusalemua amani asikari ongulumuru ’ba Kalideyani ’diyi pi rule asikari ongulumuru ’ba Suriaa ’diyini berisi. Ama ovu di Yerusalemua ani.

12O’du ’dasi e’yo Yehovani nga eca Yeremia vu kini:

13Yehova asikari ongulumuruni Mungu Israeliniri ’yo ’dini: Mi mu, mi ’yo ’ba Yudaa ’diyi pi ma tia ’ba ovupi Yerusalemua ’diyi be, Emi ngani imbata a’i, e’yo mani erizu ku ya? Yehova ’yo ra.

14E’yo Yonadabu Rekabu mvini azile anzi ini tia, kini yi ma mvu patiefi su kuri, yi ’ye ra; ecazu kpere andru yi mvuni ku, yini azita yi ma atini erile rarisi. Te ma’i, ma ’yo e’yo emi tia ra, mani engaria o’biti drio drio e’yo ’yoria, te emi erini e’yo mani ku.

15Ma pe ati’ba mani nabiru ’diyi ma ti dria emi vu ’bo, mani engaria o’biti drio drio yi ti peria, kini, Emi emvi curu’do, emi dria alu alu geri emini onziri kuzu, emi ede ’yeta emini, emi bi Mungu andini ma vuti azi ngazu yi dri ku, te emi nga di ovu ani angu mani fele emi dri emi a’bipi beri ma alia ra. Te emi coni emi bile ma vu ku, emi erini e’yo mani ku indi.

16A’disiku Yonadabu Rekabu mvi ma anzipi eri azita yi ma atini azile yi tiari ra, te suru ’dori erini e’yo mani ku.

17E’yo ’disi Yehova Mungu asikari ongulumuruni Mungu Israeliniri ’yo ’dini: Mi ndre, ma nga e’yo onzi dria mani olule yi ma ruaari eji Yuda pi ma ruaa ’ba ovupi Yerusalemua ’diyi be dria; a’disiku ma ’yo e’yo yi tia ’bo, te yi erini nga ku, azini ma omve yi ’bo, te yi a’ini nga ku.

18Yeremia nga di ’yo ori’ba Rekabuni ma tia kini, Yehova asikarili ongulumuruni Mungu Israeliniri ’yo ’dini: Emini azita emi ati Yonadabuni inzilerisi, emini e’yo erini azile emi tia ’diyi ma ta mbale driarisi, emini e’yo ’yele dria erini azile emi tia ’borileri,

19e’yo ’disi Yehova asikari ongulumuruni Mungu Israeliniri ’yo ’dini: ’Ba ngapi pa sopi ma driliari ngani Yonadabu Rekabu mvini ece ’dani ’dani ku.

← Chapter 34 Jump to: Chapter 36 →