Jeremiah 44

Lugbara (E’yo Siza Alatararu Munguniri BIBLIA)

← Chapter 43 Jump to: Chapter 45 →

1E’yo ecapi Yeremia vu ’ba Yahudini dria angu Misirinia, ovupi Migidoli pia, Tapanihesi pie, Nofu pie, angu Patirosini pie ’diyi ma e’yosiri, kini,

2Yehova asikari ongulumuruni Mungu Israeliniri ’yo ’dini: Emi ndre e’yo onzi mani ejile Yerusalemu ma dria azini aku amboru Yudaa ’diyi ma driari dria ’bo. Te emi ndre, o’du andru ’dorisi yi andruru, ’ba alenia aluni yo,

3e’yo: onzi yini ’yele ma engazu ani adrasirisi, yini mule obiese vele, azi ngale Mungu andini yini nile ku ’diyi dririsi; Mungu nde ’diyi yi nini ndra ku yi’i, emi pie, emi a’bipi pie.

4Te ti, ma pe ndra ati’ba mani nabiru ’diyi ma ti emi vu ra, mani ’ engazu drio drio yi ti peria, kini, Emi ma ’ye afa onzikanyaru mani ngule onzi ’diri ku fo!

5Te yi erini ku, coni vini yi ma bile yi ojazu e’yo onzi yini, yini obiese vezu Mungu andini driri, kuzu ku indi.

6E’yo ’disi ma osu aoko mani pi adra mani be, adra nde ko ti ve aku amboru Yudaa ’diyi pi ma alia, gboko Yerusalemua ’diyi be; yi eca ezazaru azini andruru ekile yini ovule o’du andru ’dorisirile.

7Te curu’do Yehova Mungu asikari ongulumuruni Mungu Israeliniri ’yo ’dini: Emi ’ye e’yo onzi amboru ’dori emi ngolupi ma idri vu a’disi ya, agupi piyi ma dri jazu, oku pie, mva wereri pie, odekua ba ndrupiri pie dria Yuda ma eseliasi, ’bani acezu emini aluni ku ’donini?

8Emi asi mani enga adraru azi emi drini ’yele ’diyisi, emini obiese vele Mungu andini dri angu Misirini, emini muzu ovuzu ’dale ani’baruriarisi a’disi ya, emi dri jazu ani, emi ma ovu atriaru, azini o’dataru suru nyaku drisi dria ’diyi ma eselia.

9E’yo onzi emi a’bipini pi, opi Yudaa ’diyi ma e’yo onzi pie, oku yini ’diyi ma e’yo onzi pie, emi ngulupi ma e’yo onzi pie, oku emini ’diyi ma e’yo onzi pie, yini ’yele angu Yudania azini gboko Yerusalemua ’diyia ’diyi ma tavi avi emi dri ra ya?

10Ecazu kpere curu’do yi doni yi e’yere afu kokoru ku, yi runi vini ku, yi acini azita mani kani e’yo mani azile, mani ’bale emi drilia emi a’bipi be ’diyi ma alia aluni ku.

11E’yo ’disi Yehova asikari ongulumuruni Mungu Israeliniri ’yo ’dini: Emi ne, ma nga ma mile ’ba emi ruaa emi ’yezu onzi, kpere mani ’ba Yudaa ’diyi ma dri jazu driaria.

12Ma nga ’ba Yudani ecepi jolokoru, yi ma mile ’bapi muzo angu Misirinia ovuzu ani’baru ’dale ’diyi o’du ra, yi nga dri ja dria ra; yi nga o’de angu Misiria ra; yi nga dri ja sei pisi liki be; yi nga odra ra e’dozu ’ba nyirisi cazu ’ba ’warasi sei pisi liki be; yi nga ofu afa ngule onziriru, e’yo osuzaru, atriaru, azini o’dataru.

13A’disiku ma nga panga onzi fe ’ba ovupi Misiria ’diyi dri, mani ndra panga fele Yerusalemu dririle, sei pisi, liki pie, azo muani be,

14’dini ’ba Yudaa acepi jolokoru mupi angu Misirinia ovuzu ani’baru ’dale ’diyi ngani apa, kani ace, mvizu ani angu Yuda vini lele mvizu vunia ovuzu kari’bai-u ’daleria aluni ku; a’disiku ’ba ngapi emvipini yo, pe lu kiri ’ba apapi ra ’diyi a’dule.

15O’du ’dasi agupi dria nipi kini yi vile oku ’diyi adri obiese ve Mungu andini dri ’diyi, oku pa sopi ogogo ’diyi be dria, yi ongulumu amboru, yi bani ’ba dria ovupi angu Misiria Patirosia ’diyi, nga e’yo omvi Yeremia tia kini:

16E’yo te mini olule ama tia Yehova ma rusi ’diri ama econi a’izaru ku.

17Te ama nga e’yo dria efupi ama tilia ’diyi ’ ra, obiese vezu oku opiru ’buari dri, azini a’bu’bu osuzu eri dri, ekile amani andra ’yele aku amboru Yudaa ’diyi ma alia gboko Yerusalemua ’diyia indi, ama’i, ama a’bipi pie, opi amani pie, ’ba opiru amani ’diyi pierile; a’disiku o’du ’dayisi ama ovu ndra nyaka be tre, ama ndra onyiru, ama ndreni ndra candi leu.

18Te engazu o’du amani obiese kuzu vekokoru oku opiru ’buari dri, azini amani a’bu’bu kuzu osukokoru jarisi indi, afa dria ma alio nde ama ra, ama ja dri sei pisi be.

19Ama ka ndra obiese ve oku opiru ’buari dri, ama ka ndra a’bu’bu osu eri dri, ama ova ndra enya anzuku eri inzizu, kani ama osu a’bu’bu eri dria, agupi amani ’diyi kokoru ra ya?

20Yeremia nga di ’yo ’ba dria ma tia, agupi be oku be, adaru ’ba dria e’yo ’dinileri omvipi eri ma tia ’diyi ma tia kini:

21Obiese emini vele aku amboru Yudaa ’diyi ma alia azini gboko Yerusalemua ’diyia indi, emi’i, emi a’bipi pie, opi emini pie, ’ba opiru emini ’diyi pie, ’ba ovupi angu ndea ’diyi pie driari, Yehova egani ndra e’yoni ku ya? E’yo nderi fini asinia ku ya?

22E’yo ’disi Yehova econi ndra e’yo kuzu ’yekokoru ani ku, e’yo onzi emini ’yele ’diyisi, azini e’yo onzikanyaru erini ngule onzi emini ’yele ra ’diyisi; e’yo ’disi angu emini ofu di androru, osutaru, azini atriaru, ’ba kokoru, Yekile o’du andrusirile ’di.

23Emini obiese velerisi, azini emini ezale Yehova vurisi, emini o’duko Yehovani inzile kurisi, emini acile azita erini pi ma alia e’yo erini azile ’diyi be kurisi, e’yo ’disi candi isu emi ekile o’du andru ’dosirile ’di.

24Yeremia nga ’yo ’ba dria ma tia, oku dria be, kini, Emi eri e’yo Yehovani, emi ’ba Yudani dria ovupi angu Misiria ’diyi la!

25Yehova asikari ongulumuruni Mungu Israeliniri ’yo ’dini, kini: Emi’i oku emini be, emi ’yo e’yo emi tisi ’bo, emi ’ye e’yo nde emi drisi indi, emini e’yozu kini, Ama nga oyo amani sole ’diyi ’ye trotro, ada, obiese vezu oku opiru ’buari dri, azini a’bu’bu osuzu eri dri indio Awa’di ’yeke, emi fe di oyo emini ma so pa kirikiri, emi ’ye di e’yo emini oyo sozu aniri!

26E’yo ’disi emi ma eri e’yo Yeho-vani, emi ’ba Yudani dria ovupi angu Misiria ’diyi la: Emi ne, ma so oyo ru mani ambori ma e’yosi ’bo, Yeho-va ’yo ra, kini, Yudani aluni ngani ru mani omve i tisi kini, Ekile Yehovani ovule idri berile, angu: Misiriaria dria ’dinini ku.

27Emi ne, ma yi ta mba e’yo onzi ejizu yi ruaa, te e’yo onyiruni ku; te ’ba Yudani dria ovupi angu Misirinia ’diyi nga dri ja sei pisi liki be dria, kpere yini yi deria.

28Azini ’ba: ngapi apapi seisi ra ’diyi nga mvi ’ engazu angu Misiriasi cazu angu Yudania lamiru; azini ’ba Yudani mupi ndra angu Misiria ovuzu ’dale ani’baru, acepi jolokoru ’diyi, yi nga ni kini a’di ma e’yoni nga pa soni ya, kani maniri’i, kani yiniri’i.

29E’yo ’diri nga ovu emi dri ecetaru, Yehova ’yo ra, ecezu kini ma nga emi dri panga e’yo onziniri fe emi dri pari ’doria ra, emi ma ni ani e’yo mani ’diyi nga pa so ada emi ruaa, e’yo eti nzezu emi ruaa e’yo onzi ejizu:

30Yehova ’yo ’dini, Emi ne, ma nga Farau Hofira, opi amboru Misiriari fe ari’ba erini ma dria, azini ’ba ndapi eri fupi ’diyi ma dria ra, ekile ndra mani Zedekia opi Yudaari fele Nebukadreza opi Babuloniari ari’bo erini ndapi eri fupiri ma driarile.

← Chapter 43 Jump to: Chapter 45 →