Jeremiah 14

Lugbara (E’yo Siza Alatararu Munguniri BIBLIA)

← Chapter 13 Jump to: Chapter 15 →

1E’yo Yehovani ecapi Yeremia vu ewu etukanisiri eri ’di’i:

2Yudani awua, kalitileni dri ci candisi; yi ri va bongo iniru be, awu Yerusalemuni tu uru.

3’Ba ’wara yini yi ’ba soroa ’diyi ma ti pe yia; yi eca yi ’bilea, te yi isuni yi ku, yi emvi imvu be pirini; yi ovu drinzasi, yi aba aba, yi a’bu yi ma dri ci.

4’Ba amvu ’yapi ’diyi ovu drinzasi, yi a’bu yi ma dri ci, nyakuni i ogalerisi, ozooni ’dile angu ndea kurisi.

5Ada, eba asiari ti mva, te ku eri ra, iribini ovule yorisi.

6Akanya asea ’diyi pa so oni dri nditiriru ’diyi ma dria, yi ava se okposi obalakole; yi ma mileni ni ni ase ibiruni ovule yorisi.

7Ka tro e’yo onzi amani ’diyi yi e’yo onzi ndu nze ama ruaa ti, mi ma nga azi ru mini ma e’yosi, Yehova la; ojaza amani mvizu vile yi ovu kakau, ama eza mi vu ra yo.

8Mi asi teza Israeliniri la! Mi’i ’ba nde ’diyi opapi ewu candinisiri, mi ma ovu angu ma alia ani’bole, ekile ’ba acipi ad i ojapi kalaa lazu ini alusirile a’disi ya?

9Mi ma ovu ekile ’ba osupi osurile, ekile ’ba okporu ecopi ’ba papi kurile a’disi ya? Te di Yehova la, mi ovu ama eselia, omve ama ru minisi; mi ku ama ku fo!

10Yehova ’yo ’dini suru ’dorisi: Yi le acizu abazaru ’dini, yi ogani yi ma pa ku; e’yo ’disi Yehova a’ini yi ku, eri nga e’yo onzi yini ega curu’do, eri nga yi co ezata yinisi.

11Yehova ’yo ma tia kini: Mi zi ’ba ’doyi dri ku.

12Yi ka nyaka ’da ra, ma ngani wuta yini eri ku; azini yi ka edeta vezaru pi fe edeta anyafurasiri be, ma ngani yi a’i ku; te ma nga yi ma dri ja seisi, liki pie, azo muani pie.

13Ma nga di ’yo, Wowo, Opi Yehova la! mi ndre, ’ba nabiru ’diyi, ’yo yi tia, Emi ngani sei ndre ku, liki ngani emi fu ku indi, te ma nga asi anzuru ada adari fe emi dri pari ’dori ma alia.

14Vutinia Yehova ’yo ma tia kini: Nabi yi e’yo nze inzosi ma rusi; ma peni yi ma ti ma’i ku, ma azini vini e’yo yi ma tia ma’i ku, ma ’yoni e’yo yi be ku indi. Yi afa ndreza inzoruri ma e’yo nze emi tia, andri ndriza be, afa tokori pie, lokiri yi ma ngulupi ma asiari pie.

15E’yo ’disi, nabi e’yo nzepi nabiru ma rusi de isu ma peni yi ma ti ma’i ku, te ti yi ’yo ra, Sei pi abiri be ngani ovu angu ’dori ma alia ku-’diyi ma e’yosi Yehova ’yo ’dini: Nabi ’diyi nga dri ja sei pisi liki be ra.

16Te ’ba nde yini e’yo ondrile yi ma tia ’diyi, yi nga yi ma avu o’be amve geri Yerusalemuni ma alia, abiri pisi sei be, ’ba ngapi yi sapini yo--yi’i, oku yini pie, agupianzi yini pie, ezoanzi yini pie; a’disiku ma nga e’yo onzi yini osu yi ma dria.

17Azini mi nga e’yo ’diri ’yo yi tia: Mile mani ma osu mindre ini rra, etu zu, ma deru ku, a’disiku ’ba mani ma zamva aliriaruri ovu cozaru bile be onzi, nyibileko be amboru tu,

18Ma ka fu aku ageisi amve, mi ndre, ’ba yini ofule seisi ’diyi ma avu indi! Te ma ka fi akua, mi ndre, ’ba ovupi azoru likisi ’diyi indi! Te nabi pi ’ba edeta edepiri be yi aci kelekele co angu nde ma alia, e’yo nikokoru.

19Mi ’be Yudani ’be ya? Mi asi ngu Zionini onzi ya? Mi co ama, te rua atiza ovuni amani ku, adisi ya? Ama te asi anzuru ra, te onyi ecani aluni ku; ama te ewu rua atizuri ra, te mi ndre, kiri asi otiza.

20Yehova la, ama a’i ezata amani, e’yo onzi ama atapini be ra, amani ezale mi vu rarisi.

21Te ru minirisi, mi ma ngu ama onzi ku; mi ma eza oguna opini diza miniriniri ku; mi ma ega, mi ma nyo aziza mini azile ama beri ku.

22Afa toko toko ’ba jururuni inzile ’diyi ma azi eco ozoo fezaru ra ya? ’Bu eco ozoo ’dipi guguri fezaru ra ya? Eri mi’i ku ya, Yehova Mungu amaniri la? E’yo ’disi ama te mi vu, mini afa ’diyi ’yele dria mi’irisi.

← Chapter 13 Jump to: Chapter 15 →