Jeremiah 12

Lugbara (E’yo Siza Alatararu Munguniri BIBLIA)

← Chapter 11 Jump to: Chapter 13 →

1Yehova la, mani agata garia isu mi ovu mini kilili; te ti, ma le nga e’yo nze mi be. ’Ba azi onzi ’yepi ’diyi ma geri ovu drilebaru a’disi ya? ’Ba lokiri ’yepi tu ’diyi dria ovu ’yaa a’disi ya?

2Mi sa yi ra, ada yi ma ola fi ’bo; yi zo ra, ada yi ’ya efi ra; yi ma tiani, mi ogogo, te yi ma asiruri beni, mi ziri.

3Te mi ni ma ra, Yehova la; mi ndre ma, mi ma asi O’bi’i kani eri ovu mi vu ngoniru ya. Mi ofu yi amve eki1e kabilo ’bani ngale olilerile, azini mi oti yi o’du ’bani ngazu yi olizurisi.

4Anguni nga owu azini ase angu dria ma aliari nga ’wi kpere ngopi ya? Ezata ’ba ovupi angu nde ma alia ’diyinirisi anyapa pi ja dri aria pie ’bo, yini ’yole, Eri ngani asiza amani ndre ku-risi.

5Mi ka nzu ’ba nzupi pasi ’diyi be, yi ka fe mi ande ani ra, mi eco nzuzu akanya be ngoni ngoni ya? Azini mi ka tro ovu e’yere angu asi anzuruniri ma alia ti, te mi nga a’di ’ye pari Yoridanini tizuria ya?

6Ka tro mi adripi, azini ’ba engapi mi ati vile joa ’diyi ti, yi’i yi ’ye mi vu lokirisi; yi’i yi otre mi vutia o’duko urusi; mi ma a’i yi ku, yi ka tro e’yo onyiru ’yo mi vu ti.

7Ma ku jo mani ’bo, ma ’be awuruso mani ’bo; ma fe ’ba ma asini lele turi ari’ba erini ma dria ’bo.

8Awuruso mani oja i ma dri ekile kami oce aliarile, eri owu ma dri aruzu; e’yo ’disi ma ngu eri onzi.

9Awuruso mani ovu ma dri ekile aria za nyapi wura be korekorerile ya? Aria za nyapi ’diyi oku yi eri ma ageia kurukuru dri aruzu eri be ra ya? Mi mu, mi oku anyapa asea ’diyi dria; mi eji yi, ’dini yi ma nya ra.

10’Ba ’ba ocepi ’diyi karakarau eza amvu mani zabibuni ’bo, yi oro angu mani va pasi, yi ’ba angu onyiru mani ovuzu roko piriniriru ’bo.

11Yi fe eri ovuzu andruru; eri wu ma vu erini ovuria androru ’dinirisi. Angu dria ovu di andruru, ’ba alunini e’yoni ’bale i asia kurisi.

12’Ba afa opapi ’diyi eca pari uru dri be pirini roko driaria ’diyi ma dria dria; sei Yehovanirini ’ba nyale engazu angu ma kalati aluria kpere angu ma kalati aziniriarisi; ’ba rua ari be asi anzuru isupini aluni yo.

13Rizuruni, ri anyani, te lozaruni lo oci’i, yi ecandi yi ma ngulupi ti, te yi isuni orodri ku. Yi nga ovu drinzasi afa kaza yini ma e’yosi adra okporu Yehovanirisi.

14Yehova ’yo ’dini ’ba onzi ma ma ejelea dria, awuruso mani fele suru mani Israeli driri elopi ’diyi ma dri aruzu: Mi ndre, ma nga yi onze angu yiniarisi, ma nga ori’ba Yudani onze yi ma eseliasi indi.

15Te eri inga eca ’dini, ma ka yi onze ’bo, ma inga emvi yiki ’bazu yi vu, ma nga yi cii dika, ’ba dria alu alu awita yiniri vu, ’ba dria alu alu angu yini vu.

16Te eri nga eca ’dini, yi ka suru mani ma geri oni asi driasi, oyo sozu ma rusi kini, Ekile Yehovani ovule idrirurile, ’dini, ekile ndra yini suru mani imbale oyo sozu Baali ma rusirile, ka’dini yi nga ovu edrezaru suru mani ma eselia,

17Te yi ka ga eriko si, nzezuni ma nga suru nde nze ra, drini jazu ra, Yehova ’yoni.

← Chapter 11 Jump to: Chapter 13 →