Jeremiah 16

Lugbara (E’yo Siza Alatararu Munguniri BIBLIA)

← Chapter 15 Jump to: Chapter 17 →

1E’yo Yehovani eca vini ma vu, kini:

2Mi ma je oku ku, mi ma ti agianzi kani ezoanzi pari ’dori ma alia ku.

3A’disiku Yehova ’yo e’yo agupianzi osipi pari ’dori ma alia ’diyi pi ma e’yosi ezoanzi be, azini andripi yi osipi ’diyi pi ma e’yosi atapi yi tipi angu ’dori ma alia ’diyi be, ’dini kini:

4Yi nga odra dra onzi ’diyisi. ’Ba ngani yi owu ku,ngani yi sa ’bilia ku indi; yi nga ovu ekile ze nyaku ma driarile. Yi nga dri ja sei pisi liki be, avu yini nga ovu aria ’bua ’diyi pi dri zaru nguru nyakua ’diyi be.

5A’disiku Yehova ’yo ’dini: Mi ma fi jo awu wuzuria ku, mi ma mu lulu gazu kani yi owuzu ku indi; mani asi anzuru mani nzele suru Jori driasi ’borisi, Yehova ’yo ra, adaru ma nze yiki ale beri pi asi ndriza leta beri be ’bo.

6’Ba ’wara ’diyi pi nga odra angu ’doria ’ba nyiri ’diyi be; ’ba ngani yi sa ’bilia ku, ngani vini yi owu ku, ngani yi ma rua li, kani yi ma dri’bi fa yi ma e’yosi ku indi.

7’Ba ngani vini ta awa dra ma tia ku, asi yini omizu ’ba drapi ’bori ma e’yosi; yi ngani vini okelea asi anzuruniri fe yi dri ku mvuzu ata yini ma e’yosi kani andri yini ma e’yosi ku indi.

8Azini mi ma fi jo omunia rizu yi pie, nyaka nyazu azini afa mvuzu ku.

9A’disiku Yehova asikari ongulumuruni, Mungu Israeliniri ’yo ’dini: Mi ne, ma nga o’duko ogutani pi fe i de angu ’doasi, va emi milia ewu eminisi, o’duko ayikoni pie, o’duko izioni pie, o’duko amuruani pie dria ra.

10Te eri nga eca ’dini, mi ka e’yo ’diyi dria ece suru ’dori dri, azini yi ka ’yo mi tia, Yehova ’yo e’yo onzi amboru ’dori dria ama ruaa a’disi ya? E’yo onzi amani a’di onzini ya? Ezata amani ezale Yehova Mungu amani vuri ngoni ya?

11mi nga di ’yo yi tia: Emi a’bipini ma kule ’borisi, Yehova ’yo ra, yini acile Mungu andini ma vuti bizu, azi ngazu yi dri, yi ma ru inzizurisi, yini ma kulerisi, azini azita mani ma ta mbale kurisi indi,

12te emi’i, emi ’ye e’yo onzi aga emi a’bipiniri ra; a’disiku, emi ne, emi dria alu alu ad ambo asi onzi eminirini vusi, ’dini emi erini ma ku;

13e’yo ’disi ma nga emi onze angu ’doriasi ra o’bezu angu emini nile emi a’bipi be kuria; emi nga Mungu andini ma azi nga ’dale etu nyamu, ini be rra; te ma ngani asi ndriza ece emi vu ku.

14E’yo ’disi, emi ndre, o’duni nga emu ra, Yehova ’yo ra, o’du ndesi yi ngani ’yo dika, Ekile Yehova anzi Israelini ofupi ejipi angu Misiriasirini ovule idri berile, ’dini ku;

15te yi nga ’yo, Ekile Yehova, anzi Israelini ofupi ejipi angu andraleroriasi, azini angu dria erini yi odrozu ’bo ’diyiasirini ovule idri berile, ’dini. Te ma nga yi eji dika angu ndra mani fele yi ma a’bipi driria.

16Emi ne, ma nga ’ba e’bi okupi ’diyi omve kakau, Yehova ’yo ra, yi nga yi oku e’bile; azini vilerisi ma nga ’ba za ndapi dorea ’diyi omve kakau yi nga yi nda dorea engazu oni amboru ma driasi dria, azini oni were ma driasi dria, azini oni guleasi indi.

17A’disiku ma mile ovu geri yini vusi dria ra; yi ovuni zizaru ma milia ku, ezata yini ovuni zizaru ma milia ku indi.

18Okorisi ma nga e’yo onzi yini pi ma arioti ofe ezata yini be pale iri, yini angu mani ezale afa onzikanyaru mani ngule onzi ’diyi ma avusirisi, azini yini fezu awita mani gazu tre afa yini onzikanyaru mani ngule onzi ’diyisirisi.

19Yehova la, okpo mani, pari okporu mani ma ta mbazuri, pari mani ma zizu o’du inzatanisiri; suru ndu ndu nga eca mi vu engazu nyaku ma kalati asizu ’diyiasi, yi nga ’yo ra: Ama a’bipi a’i yi ma awitaru kiri inzo liza pi e’yo toko toko orodri fepi ku ’diyi be.

20’Ba nga afa ovupi munguru kuri ede i dri adrouru ceni ra ya!

21E’yo ’disi ma nga fe yi ma ni, pale alu ’disi ma nga fe yi ma ni dri mani pi okpo mani be; yi nga ni ra ma ru Yehova’i.

← Chapter 15 Jump to: Chapter 17 →