Jeremiah 28

Lugbara (E’yo Siza Alatararu Munguniri BIBLIA)

← Chapter 27 Jump to: Chapter 29 →

1Eri nga eca ’dini, eli nde ’dasi, Zedekia opi Yudaarini e’doria opi nyaria, eli su ma mba towirisi, Hanania Azuri mvi nabi ovupi Gibeoniari nga e’yo ’yo ma be jo Yehovani ma alia, ’ba edeta edepi ’diyi pi ma drilia ’ba dria be, kini,

2Yehova asikari ongulumuruni Mungu Israeliniri ’yo ’dini kini: Ma nye opi Babuloniari ma kulumbu ’bo.

3De nga eli iri deni yi dria ku, ma nga afazu Yehova vile joa Nebukadineza opi Babuloniarini opale pari ’dori ma aliarisi jile Babulonia ’diyi omvi pari ’doria dria ra.

4Ma nga vini Yekonia Yehoyakimu mvi opi Yudaari eji dika pari ’doria, ’ba Yudaa ndra obile ati’baru mupi Babulonia ’diyi be dria, Yehova ’yo ra, a’disiku mani ngale opi Babuloniari ma kulumbu nyolerisi.

5Etu ’dasi nabi Yeremia nga ’yo nabi Hanania ma tia, ’ba edeta edepi ’diyi pi ma milia ’ba pa sopi Yehova vile joa ’diyi be dria;

6nabi Yeremia ’yo, Amena! Yehova ma ’ye ’dini fo; Yehova ma ’ye e’yo mini ondrile ’diyi fo, afazu Yehova vile joa ’diyi pi omvizu Babuloniasi ejizu pari ’doria, ’ba ’bani ndra obile ati’baro ’diyi be dria.

7Te di, mi ma eri curu’do e’yo mani ’yole mi bilia azini ’ba dria ma bilia ’diri.

8Nabi andra ma drilia azini mi drilia oko ’diyi, yi ondri e’yo angu kakau ma dria, azini suru ambo ambo ’diyi ma dria, e’yo omba pinisi e’yo onzi pie, azo muani pie.

9Nabi e’yo asi anzuruni ondripiri, e’yo nabi nderini ka nga i ’ye ra, ’ba nga nabi nde ni kini ada Yehova epe tininiri ndo.

10Vutinia nabi Hanania nga pati kulumbururi tru nabi Yeremia ma ombelekoarisi, nga eri nye ra,

11Hanania nga di ’yo ’ba nde ma drilia dria kini, Yehova ’yo ’dini: De Inga eli pi pi iri deni yi ku, ma nga kulumbu Nebukadineza opi Babuloniarini nye ’dinile, suru dria ma ombelekoarisi ra, Nabi Yeremia nga di mu i parisi ra.

12Etu ’dasi e’yo Yehovani nga di eca Yeremia vu, nabi Hananiani pati kulumbururi te ovupi nabi Yeremia ma ombelekoari anyozu ’boria, kini:

13Mi mu, mi olu e’yo Hanania tia kini: Yehova ’yo ’dini: Mi nyo kulumbu patiruri ’bo, te parinia mi nga afa kulumbu ayaruni ede’i.

14A’disiku Yehova asikari ongulumuruni Mungu Israeliniri ’yo ’dini: Ma ’ba kulumbu ayaru suru ’diyi ma ombelea dria, yi ma nga azi Nebukadineza opi Babuloniari dri ani, te yi nga azi nga eri dri ra, ma fe anyapa asea ’diyi eri dri indi.

15Nabi Yeremia nga di ’yo nabi Hanania ma tia, Mi eri nga te, Hanania, Yehova peni mi ti ku, te mi fe suru ’dorini asi ’bazu e’yo inzoruri ma dria.

16E’yo ’disi Yehova ’yo ’dini: Mi ndre, ma nga mi ofu nyaku ma driarisi ra, Mi nga dra eli ’dosi, mini e’yo ’bani ani mbuzu Yehova ma ruaasi amveri ’yole’irisi.

17Ka’dini nabi Hanania dra di eli nde ma mba aziririsi ra,

← Chapter 27 Jump to: Chapter 29 →