Jeremiah 38

Lugbara (E’yo Siza Alatararu Munguniri BIBLIA)

← Chapter 37 Jump to: Chapter 39 →

1Sefatia Matani mvi pi, Gedalia Pasuri mvi pie, Yukali Selemia mvi pie, Pasuri Malakiya mvi pie, yi eri e’yo Yeremiani ’yole ’ba dria ma tiari kini,

2Yehova ’yo ’dini, ’Ba ovupi ’dani aku amboru ’dori ma aliari nga dra seisi, abirisi, azo muanisi indi; te ’ba fupi amve ’ba Kalideya ’diyi vuri nga ovu idriru; idri erini nga ovu afa pale ombaarile eri dri, eri nga adri idriru ra.

3Yehova ’yo ’dini, Ada ada, yi nga aku ’dori fe asikari ongulumuru opi Babuloniari vile ’diyi ma dria ra, eri nga eri bi ra.

4Etu ’dasi ’ba opiru ’diyi nga ’yo opi amboru tia, Ama zi mi tia, ma fu agu ’dori, a’disiku eri fe ’ba ombaru ecepi aku amboru ’dori ma alia ’diyi pi ma dri ovu akazaru, ’ba nde ’diyi be dria, erini e’yo ’dini ’diyi ’yole yi ma tiarisi. A’disiku agu ’dori ndani suru ’dori dri drileba ku, te drileonzi’i.

5Opi Zedekia nga di ’yo, Emi ndre, eri emi dria; te opi econi afa azini ’yezaru emi ogazu ku.

6’Dini yi nga Yeremiani ’du ’be ’bile gale arujoru Malikiya opi amboru ma mvi vile, ovupi asikari opi agei tepi ’diyi ma irii driari ma alia; yi nga Yeremiani osi va bakasi. Isu de yi ovuni ’bile nde ma alia ku, te orita a’dule; te Yeremia nga di fi orita ma alia.

7Te Ebedi-meleki Etiopiau nzele ranyaru, ovupi opi amboru vile joari, ka e’yo yini Yeremiani ’bazu ’bilia ’bori eri ra-etu ndesi isu de opi ri kalitile Benyaminini ma alia-

8Ebedi-meleki nga fu opi ma joarisi, nga ’yo opi ma tia kini,

9Opi mani opi amboru la, ’ba ’diyi ’ye onzi e’yo dria yini ’yele nabi Yeremia vu, yini eri ’bele ’biliarisi; te vini eri nga dra pari erini ovuzuri ma alia abiri ma e’yosi, a’disiku enya aceni aku amborua aluni ku.

10Opi nga di e’yo azi Ebedi-meleki ma tia kini, Mi ’du mi be ’ba kali na ngazu ’dia, ma ese nabi Yeremiani uru engazu ’biliarisi, de nga eri drani ku.

11Ebedi-meleki nga di ’ba nde ’diyi ’du eri be, fi jo opini ovupi pari lonyi ma ta mbazuri ma etiaria, nga di bongo deza ’diyi pi bongo irikoru yali yali ’dini ’diyi be o’du ra, nga di yi osi va ’bilia Yeremia vu bakasi,

12Ebedi-meleki ’ba Etiopiaari nga ’yo Yeremia tia, Mi ’ba bongo deza ’diyi bongo irikoru yali yali ’diyi be mi wubileko etia baka etia, Yeremia nga di ’ye ’dinile ra,

13’Dini yi ese Yeremiani ani urule bakasi, nga di eri e’du ’biliarisi ani; te Yeremia nga di adri asikari opi agei tepi ’diyi ma Irii dria.

14Vutinia opi ambo Zedekia nga ’bo ti pe Yeremiani ejizu i vu, jotile esele nari ’bani fizu jo Yehovaniari ma alia. Opi nga ’yo Yeremia tia, Ma nga e’yo zi mi tia; mi ma oci e’yo ma dri aluni ku.

15Te Yeremia nga ’yo Zedekia ma tia kini, Ma ka e’yo nde e’da mini ra, mi ngani ma fu ku adaru ya? Azini ma ka ondua fe e’yo ama mini ra ti, mi ngani ma eri ku,

16’Dini opi Zedekia so oyo Yeremia be oyokolosi, kini, Ekile Yehova orindi amani ’bapirini ovule idri berile, ma ngani mi fu ku, ma ngani mi fe vini ’ba ndapi mi fupi ’diyi ma dria ku.

17Yeremia nga di ’yo Zedekia ma tia ani, Yehova Mungu asikari ongulumuruni, Mungu Israeliniri ’yo ’dini, Mi ka fi mu ’ba opiru opi amboru Babuloniari ma palaa ’diyimu, ka’dini mi nga ovu idriru, azini yi ngani aku amboru ’dori ve acisi tu; mi nga ovu idriru ori’ba mini be.

18Te mi ka fi ’ba opiru opi Babuloniani ma palaa ’diyiniru ku, yi nga aku amboru ’dori fe ’ba Kalideyaa ’diyi ma dria, yi nga eri ve acisi ra, te mi ngani apa yi ma dria ku.

19Opi amboro Zedekia nga di ’yo Yeremia tia kini, Ma ru ’ba Yahudini apapi ra fipi ’ba Kalideyaa ’diyiniru ’diyi ra, yi kazu ma fezu yi ma dria ku,yi kazu ma ’bazu aparakaru ku,

20Te Yeremia ’yo ra kini, Yi ngani mi fe ku. Ma matu ’ba mi vu, e’yo mani ’yole mi tiari ma alia mi inzi Yehova ma o’duko, ’dini e’yoni nga ovu mi dri drilebare, azini mi nga ovu idriru ani.

21Te mi ka ga fuko si, e’yo Yehovani ecele ma dri ’bori eri ’di’i:

22Mi ndre, oku dria acepi opi Yudani ma joa ’diyi, ’ba yi nga yi ofu ’ba opiru opi Babulonini ma palaa ’diyi vu, te oku nde ’diyi nga ’yo ra, Agyi mini mi nizu yi be tu ’diyi ici mi ’bo, yi aga mi ra; te curu’do mi pani firia orita ma alia ’borisi, yi oja yi, mvi vile ra.

23Azini yi nga oku mini piyi ofu dria anzi mini be ’ba Kalideyaa ’diyi vu, te mi ngani apa yi ma driasi ku, te opi Babuloniari nga mi bi ra; azini mi nga fe ’bani aku amboru ’ dori vezo acisi.

24Zedekia nga di ’yo Yeremia tia kini, ’Ba aluni ma ni e’yo ’diyi mi tia ku, ka’dini mi ngani dra ku.

25Te ’ba opiru ka eri kini ma olu e’yoni mi be ’bo, yi ka nga emu mi vu ’yozu kini, Mi olu di e’yo mini ’yole opi tiari amani, mi ma oci eri ama dri ku; ’dini ama ngani mi fu ku; mi olu vini e’yo opini ’yole mi tiari indi;

26mi nga di ’yo yi tia, Ma ’ba matu opi vu eri ma omvi ma Yonatani vile joa ku, ma kazu drazu ’dasi ku.

27Te ’ba opiru ’diyi nga di emu Yeremia vu dria, nga zi tinia, azini leri olu e’yo ’diyi dria yi ma tia ekile lopini azilerile. Yi nga di e’yo ku ’yozu eri be ja ani, e’yoni ovule erizaru kurisi,

28’Dini Yeremia, ovu asikari opi agei tepi ’diyi ma irii dria ecazu o’du yini Yerusalemuni bizurisi.

← Chapter 37 Jump to: Chapter 39 →