Jeremiah 42

Lugbara (E’yo Siza Alatararu Munguniri BIBLIA)

← Chapter 41 Jump to: Chapter 43 →

1O’du ’dasi ’ba asikari ma drilia ’diyi dria, Yohanani Karea mvi pie, Yezania Hosaya mvi pie, ’ba nde be dria engazu ’ba soroa ’diyi vu cazu ’ba amboru agapi ’diyi vu, nga di esi ogogo,

2yi nga ’yo nabi Yeremia ma tia kini, Ama zi mi tia, mi ku matu ’baza amani ma ovu a’izaru mi milia, azini mi zi Yehova Mungu mini amasi fo, ama’i ’ba acepi jolokoru ’diyisi dria (a’disiku ama ndra karakarau, te ama ace curu’do lamiru ’do, ekile mi mileni ama ndrelerile),

3Yehova Mungu mini ma ece geri ama dri amani acizuri, azini e’yo ovupi ama dri lonyiru ’yezuri.

4Nabi Yeremia nga di ’yo yi tia, Ma eri emi ’bo; mi ndre, ma nga Yehova Mungu eminiri zi ekile emini ’yolerile, azini eri nga eca ’dini, e’yo ngoni ngori ti Yehovani ngale omvile eminiri, ma nga olu emini ra; ma ngani e’yo azini oci; emi dri aluni ku.

5Yi nga di ’yo Yeremia tia, Yehova ma nze e’yo ’diri ma eti ama eselia mi pie, ada ada erini ndrelerile, ama ka e’yo dria ’ye ekile e’yo Yehova Mungu minirini mi ti pele ama vu eri berile trotro ku.

6E’yo nderi ka nga ovu onyiru, kani onzi, ama nga Yehova Mungu amani, amani mi ti pele vuniari ma o’duko inzi ra, ’dini ama ma ovu drileba be ani, amani Yehova Mungu amani ma o’duko eriria.

7Te eri nga di eca ’dini o’du mudri ka aga ’bo, e’yo Yehovani nga eca Yeremia vu ra.

8Eri nga di Yohanani Karea mvini omve i vu, ’ba asikari ma drilia ovupi eri be ’diyi pie, ’ba nde ’diyi pie dria, engazu ’ba nyirisi cazu ’ba ’wara vu,

9eri ’yo yi tia, Yehova Mungu Israelini emini ma ti pezu vunia matu ’baza emini jizu eri ma driliari ’yo ’dini kini:

10Emi ka nga adri ’dani angu ’dori ma alia, ma di nga emi si uru, ma ngani emi anzu va ku; ma nga emi isi ra, ma ngani emi onze ku; a’disiku ma ma asi oja e’yo onzi mani ’yele emi ruaa ’bori ma e’yosi

11Emi ma ovu urisi opi Babulonia emini rulerisi ku; emi ma ru eri ku, Yehova ’yo ra, mani ovule emi be emi pazu azini emi arizu eri ma driarisi,

12Azini ma nga yiki ’bai emi vu, ’dini eri ma ovu yikisi emi vu ani, emi omvizu emi vile angua ani.

13Te emi ka ’yo ra kini, Ama ngani adri angu ’doria ku; emini Yehova Mungu emini ma o’duko inzizu ku ’dini,

14’yozu, Yo, te ama nga mu angu Misiria, pari amani ngazu omba ndrezu ku, kani guka awu erizu ku, kani nyaka ma abirini ama fuzu kuria, ama nga adri ’dale;

15e’yo ’disi emima eri e’yo Yehovani, emi ’ba Yudani acepi jolokoru diyi la, Yehova asikari ongulumu- ’uni Mungu Israeliniri ’yo ’dini kini: Emi ka emi mile ’ba dria fizu Misiria, emi ka mu ovu ’dale,

16ka’dini eri nga eca ’dini, sei emini ruleri nga emi isu angu Misirinia ’daa ra, azini tiki emini ovuzu ani urisiri nga emi vuti dro angu Misirinia ’daa ra; emi nga odra ’dale.

17E’yoni nga ovu ’dini ’ba dria yi ma mile ’bapi lepi mupi Misiria ovuzu ani’boru ’diyi dri, yi nga odra sei pisi, tiki pie, azo muani pie; azini yi ma eselia ’ba ngapi acepi kani i papi e’yo onzi mani ngale ejile yi ma ruaarisini yo.

18A’disiku Yehova asikari ongulumuruni Mungu Israeliniri ’yo ’dini: Ekile mani aoko mani pi osule adra mani be ’ba Yerusalemua ’diyi ma dria ’borile, ’dinile indi ma nga adra mani osu emi dria emi ka nga fi Misiria rarisi. Emi nga ofu afa ngule onzirini, afa osutaru, azini atriaru, azini o’dataru. Emi ngani pari ’dori ndre dika ku.

19Yehova ’yo ’eyo emisi ’bo, emi joloko Yudani ’diyi la, Emi ma mu Misiria ku. Emi ma ni ada, andru ma nze e’yo eti emi tia ’di,

20emi ’ye lokiri emi ngulupi ma idri vu. A’disiku emi pe ndra ma ti Yehova Mungu eminiri vu, kini, Mi zi Yehova Mungu amani ma tia amasi, azini mi ma olu e’yo dria ama tia ekile e’yo Yehova Mungu amanirini ngale ’yolerile, te ama nga ’ye ra,

21Andru ma olu di e’yo nde emi tia ’bo, te emi inzini Yehova Mungu emini ma o’duko, e’yo erini ma ti pezu emi vu aniri ma alia aluni ku.

22E’yo ’disi emi ma ni ada ada, emi nga dra sei pisi, tiki pie, azo muani pie, angu emini lezu muzu alenia ovuzu ani’baru ’daleria ra.

← Chapter 41 Jump to: Chapter 43 →