Jeremiah 36

Lugbara (E’yo Siza Alatararu Munguniri BIBLIA)

← Chapter 35 Jump to: Chapter 37 →

1Te eri nga eca ’dini eli su Yehoyakimu Yosia mvi opi Yudaarini opi nyazurisi, e’yo ’diri eca Yeremia vu engazu Yehova vurisi, kini:

2Mi ’du mini enyi traza bukururi, mi si alenia e’yo dria mani ’yole mi tia ’bo Israeli pi ma ruaa Yuda pie, suru dria pie, engazu o’du mani ndra e’yo ’yozu mi berisi engazu o’du Yosianirisi ecazu kpere andru ’diyi.

3Kani ori’ba Yudani nga e’yo onzi dria mani egale ma asia ’yezu yi ma ruaari ma e’yo eri ra yani, yi ma emvi dria alu alu geri yini onziri kuzu ani; ma ma wu e’yo onzi yini pi ezata yini be beni,

4O’du ’dasi Yeremia nga Baruki Neria mvini omve ra, te Baruki nga di e’yo dria Yehovani ’yole Yeremia ma tia efupi Yeremia ma tilia ’diyi si enyi traza bukururi ma dria.

5Yeremia nga di e’yoni azi Baruki ma tia kini, Oga ma ’bo; ma econi fizaru jo Yehovaniria ku;

6e’yo ’disi mi mu mi’i, mi ma la e’yo Yehovani efupi ma tilia mini sile enyi traza bukururi ma aliari, ’ba dria ovupi Yehova vile joa o’du nyaka ’dazurisi ’diyi ma bilia. Mi ma la vini e’yo nderi ’ba Yudani efupi yi ma aku ambo ambo ’diyiasi ’diyi ma bilia indi.

7Kani yi nga matu ’ba Yehova ma drilia yani, yi ma emvi ’ba dria alu alu geri yini onziri kuzu ani, a’disiku aoko pi adra aciru be Yehovani olule suru ’dori ma driari eri amboru.

8Baruki Neria mvi nga e’yo dria ’ye ekile nabi Yeremiani azile eri tiarile, eri la e’yo Yehovani bukua jo Yehovaniri ma alia ra.

9Te eri nga eca ’dini eli towi Yehoyakimu Yosia mvi opi Yudaarini opi nyazurisi, mba oromi ma alia, ’ba dria ovupi Yerusalemua ’diyi, ’ba dria efupi aku ambo ambo Yudani ’diyiasi, fipi Yerusalemua ’diyi, nga o’du nyaka ’dazu Yehova ma driliari eku ra.

10O’du ’dasi Baruki nga e’yo Yeremiani la buku alia jo Yehovani ma alia ’ba dria ma bilia, jo aliza Gemaria Safani mvi ’ba waraga sipiri vile ovupi irii uruleruri ma dria, pari fizu kalitile o’diru jo Yehovaniaria.

11Gemaria Safani mvi ma mvi Mikaya ka e’yo Yehovani yini lale buku aliari eri dria ’bo,

12eri nga di fi opi vile joa kpere ’ba waraga sipiri ma jo aliza ma alia; te mi ne, ’ba opiru dria ri ’dale: yi Elisama ’ba waraga sipiri pi, Delaya Semaya mvi pie, Elinatani Akibori mvi pie, Gemaria Safani mvi pie, Zedekia Hanania mvi pie, ’ba opiru ’diyi be dria,

13Mikaya nga di e’yo dria erini erile Barukini buku laria ’ba nde ma biliari olu yi ma tia.

14E’yo ’disi ’ba opiru ’diyi dria nga Yehudi ma ti pe Baruki vu-Yehudi nderi ovu Selemia Kusi mvi ma mvi Netania ma mvi’i-kini, Mi ’du enyi traza mini lale ’ba nde ma biliari mi dria, mi emu. Baruki Neria mvi nga di enyi traza ’du i ma dria, nga emu yi vu ani.

15Yi ’yo tinia, Mi ri va, mi la eri ama ’bilia fo! Ka’dini Baruki nga e’yo nde la yi ma bilia.

16Te eri nga eca ’dini, yi ka e’yo dria eri ’bo, yi olu yi milia milia urisi; yi ’yo Baruki tia, Ada ama nga e’yo ’diyi olu opi tia dria ra.

17Yi zi vini Baruki tia kini, Mi olu nga amani, mi si e’yo efupi eri ma tiliari ngoni ngoni ya?

18Baruki nga e’yo omvi ’yo yi tia, Eri olu e’yo ’diyi dria ma tia tilesi kililiru, ma si ani e’yo nde yi vinosi buku ma alia ’di’i.

19’Ba opiru nga di ’yo Baruki tia, Mi mu, mi zi ra, emi Yeremia be, ’ba aluni ma ni pari emini ovuzuri ku.

20Vutinia yi fi opi vu irii dria, de isu yi mba enyi traza nderi ma ta Elisama ’ba waraga sipiri vile jo aliza ma alia; yi olu e’yo dria opi ma bilia ra.

21Ka’dini opi nga Yehudi ma ti pe enyi nderi ejizu, eri nga eri e’du Elisama ’ba waraga sipiri vile jo aliza ma alia; te Yehudi nga eri la opi ma bilia ra, ’ba opiru pa sopi opi ma ageia ’diyi ma bilia dria indi,

22Opi ri jo ’bani ’a’azu alenia ayisiri ma alia mba oromisi, isu de vini aci indi ajiko aci ’bazuri ma alia eri ma drilialeru.

23Te eri nga eca ’dini, Yehudi ka enyi ma woke la na kani su ’bo, opi li eri elisi, ’be di eri aci ajiko aliari ma alia, de nga enyi traza veni de dria aci ajiko aliarisi ku.

24Te yi runi aluni ku, asini afa suza yini ku indi, kani opini, kani ati’ba erini e’yo ’diyi dria eripi ’diyi ti.

25Azini vini indi, Elinatani pi Delaya pie, Gemaria pie, yi ’ba ndra matu opi vu eri ma eve enyi traza nderi ku, te eri leni yi eri ku

26Opi azi Yerameeli opi mvi pi ma tia, Seraya Azireli mvi pie, Selemiai Abideli mvi pie, Baruki ’ba waraga sipiri pi bizu Yeremia be ra, te Yehova ozi yi ra.

27O’du ’dasi e’yo Yehovani eca Yeremia vu, opi ka enyi traza e’yo Barukini sile Yeremiani olule eri tia ’diyi be ruaniari ve de ’bo:

28Mi ’du mini enyi traza aziniri, mi si alenia e’yo ndraka ovupi sizaru enyi oko Yehoyakimu opi Yudaarini eveleri ma alia ’diyi dria.

29Te Yehoyakimu opi Yudaari ma e’yosi mi nga ’yo, Yehova ’yo ’dini kini: Mi eve enyi ’dori ra, ’yoria kini, Mi si alenia kini, Opi Babuloniari nga emu ecekokoru angu ’dori ma dri jazu, eri nga fe ’ba ma de yi alenia anyapa pie dria ra-’dini a’di e’yo efisi ya?

30E’yo ’disi Yehova ’yo ’dini Yehoyakimu opi Yudaari ma e’yosi, kini, Eri ngani ovu ’ba be rizu oguna Daudiniri ma dria ku, yi nga avuni ’be amve etusi etuni eri vezu, inisi egbeni eri fuzu.

31Azini ma nga panga onzi fe eri dri, ori erini pie, ati’ba erini pie, e’yo onzi yinisi; te ma nga e’yo onzi dria mani olule yi ma ruaa ’bo, te yini erile kuri, cii yi ma ruaa, ’ba ovupi Yerusalemua ’diyi pie, ’ba ovupi Yudaa ’diyi be.

32Yeremia nga di enyi traza aziniri ’du ra, fe eri Baruki Neria mvi ’ba waraga sipiri dri ani; Baruki nde nga e’yo dria ovupi buku Yehoyakimu opi Yudaarini evele acisi ’bori ma alia efupi Yeremia ma tiliari osi alenia; o’ba vini drinia e’yo azini e’yo nde ’diyile kakau indi.

← Chapter 35 Jump to: Chapter 37 →