Jeremiah 32

Lugbara (E’yo Siza Alatararu Munguniri BIBLIA)

← Chapter 31 Jump to: Chapter 33 →

1E’yo eceapi Yeremia vu, engapi Yehova vu eli mudri Zedekia opi Yudaarini opi nyazurisiri, ’di eli mudri drini aro Nebukadrezani opi nyazuri’i,

2Isu de o’du ’dasi asikari ongulumuru opi Babuloniari vile ’diyi ace Yerusalemuni kuru, te ’ba ombe nabi Yeremiani ku ci irii asikari opi ma ta mbapi ’diyini ovupi opi Yudaari vile joari ma dria.

3A’disiku isu Zedekia opi Yudaari ombe ndra eri ku ci, kini, Mi e’yo ondri a’di e’yosi ya? mini ’yoria kini Yehova ’yo ’dini: Mi ne, ma nga aku amboru ’dori fe opi Babuloniari ma dria, azini eri nga eri bi ra;

4te Zedekia opi Yudaari ngani i pa ’ba Kalideyaa ’diyi ma driasi ku, re yi nga eri fe opi Babuloniari ma dria ada, eri nga e’yo ’yo eri be tisi tisi, azini mile eriniri nga eri mile ne;

5eri nga Zedekiani ji Babulonia, eri nga ovu ’dale cazu kpere o’du mani ngazu eri andrizuria, Yehova ’yo ra; emi ka tro omba ’ba ’ba Kalideyaa ’diyi be ti, emi ngani drileba isu ku.

6Te Yeremia ’yo ra, E’yo Yehovani eca ma vu kini:

7Mi ne, Hanameli Salumu mi adroi ma mvi nga emu mi vu, ’yozu, Mi je amvu mani ovupi Anatotiari miniru, a’disiku e’yo eri onzezuri mini.

8’Dini Hanameli ma adroi ma mvi nga eca ma vu asikari opi agei tepi ’diyi ma irii dria, ekile Yehovani ’yole ’borile, te eri nga ’yo ma tia, Ma zi mi tia, mi je amvu mani ovupi Anatotia angu Benyamininiari, a’disiku azita fe eri mi dri awuafaru, azini e’yo eri onzezuri eri mini; mi je eri miniru fo! Ma nga di ni ani ’diri ovu e’yo Yehovani.

9Ma je ani amvu Anatotia nderi Hanameli ma adroi ma mvi bo, ma o’bi ani dahabu nde eri dri, sekeli dahabuni mudri drini aziri.

10Te ma ti dri waraga ajeniri ma dria, ma bi tini oderisi ecetaru, ma omve ’ba e’yo nde ma eti ndrepi ’diyi ra, ma o’bi dahabu ma nziza eri dri ratili afa o’bizurisi.

11Ma ’du ani waraga aje jezuri ra, waraga tini bile oderisi ecetaru ekile azita pini lele adriza ’bani berileri, azini tini bile kuri be iritro;

12ma fe waraga aje nde jezuri Neria Maseya mvi ma mvi Baruki dri, Hanameli adroi ma mvi pi ma milia, ’ba e’yo eti ndrepi yi ma dri tipi waraga aje nde jezuri ma dria ’diyi pie, ’ba Yahudini dria ripi irii asikari opi agei tepi ’diyiniri ma dria ’diyi pie.

13Ma azi e’yoni Baruki ma tia yi ma milia kini,

14Yehova asikari ongulumuruni Mungu Israeliniri ’yo ’dini: Mi ’du waraga aje jezu ’diyi, waraga aje jezu tini bile ’bo ’diri, azini waraga tini bile ku ’diri be, mi ’ba yi imvu ma alia, yi ma ovu ’dani o’du kakau.

15A’disiku Yehova asikari ongulumuruni Mungu Israelini ’yo ’dini: ’Ba yi nga jo piyi je dika o’du azinisi amvu pie, amvu zabibuni pie, angu ’doria ra.

16Ma ka waraga aje jezuri fe Baruki Neria mvi dri ’bo, ma zi Yehova tia kini:

17Yehova Mungu la! Mi ne, mi ’ba ’ba piyi nyaku be okpo mini amborurisi, azini wu mini ejuzarurisi ’bo E’yo azini mini ecozu ani kuni yo,

18mi yiki li pi ’bapi ’ba alifu kakau vu, mi e’yo onzi ’ba ma atapini omvipi anzi yini yi ma vutia ’diyi ma agatiari’i; Mungu amboru okpo beri, runi Yehova asikari ongulumuruniri’i,

19amboru e’yo amazasi, okporu e’yo ’yezasi; mile erini zi yi mgboru anzi ’bani ma geri oluzu dria, eri ma ofe e’yo ’ba dria dri alu alu ekile yi ma gerini ovulerile ani, ’yeta yini ma efi kaza vusi;

20mi ’ba ndra eceta taliru e’yo osuza be angu Misirinia, ecazu kpere andru Israeli ma eselia azini ’ba azini ma eselia indi dria, mi isu ndra ru amboru ekile erini ovule andrurile.

21Mi ofu ndra suru mini Israelini angu Misiriniasi eceta pisi, e’yo osuza be, dri okporu pie, wu mini eluleri pie, e’yo uri fepi turi pie;

22mi fe ndra yi dri angu mini ndra oyoni sole fezu yi ma a’bipi dri ’diri, adaru angu rapi lesu pisi anyu beri’i;

23te yi efi ra, yi bi eri yiniru. Te yi erini mi o’duko ku, yi acini azita mini ma vutia ku; yi ’yeni e’yo azini aluni e’yo dria mini azile yi tia ’yezu ’diyi ma eselia ku. E’yo ’disi mi fe e’yo onzi ’diyi dria eca yi ma ruaa ani.

24Mi ne, ’ba otro nyaku abi kaliru ma ruaa yini ani tuzu fizu aku amboru ’doria eri bizu ’bo, aku amboru ovu fezaru ’ba Kalideyaa omba ’bapi eri be ’diyi ma dria, sei pi ma e’yosi, liki pie, dra muani pie. E’yo mini ’yoleri ’ye i trotro pari ’daa ’bo, te mi ne, mi ndre eri mi milesi.

25Te mi ’yo vini ma tia ’bo, Yehova Mungu la, kini, Mi je amvu nde silingisi, mi omve ’ba e’yo nde ndrepi ’diyi-de isu fe aku amboru nderi ’ba Kalideyaa ’diyi ma dria ’bo.

26Etu ’dasi e’yo Yehovani nga eca Yeremia vu kini:

27Mi ndre, ma Yehova, Mungu ’ba dria rua ari be ’diyiniri’i; e’yo azini okporu mani li ecozu ani kuni indi ya?

28E’yo ’disi Yehova ’yo ’dini: Mi ndre, ma nga aku amboru ’dori fe ’ba Kalideyaa ’diyi pi ma dria, Nebukadreza opi Babuloniari be, eri nga eri bi ra.

29’Ba Kalideyaa omba ’bapi aku amboru ’dori be ’diyi nga emu eri ma ti du acisi, nga eri eve ra, jo pie dria ’bani ani jo nde ’diyi ma dri senderu ma dria obiese vezu Baali dri, ’bani edeta afa mvuzasiri osuzu Mungu andini ’diyi dri, fezu aokoni ma nyazu.

30A’disiku anzi Israelini piyi anzi Yudani be, kiri yi ’ye e’yo ovupi onzi ma miliari a’dule, engazu ewu yini ovuzu ’ba o’dirurisi; te anzi Israelini yi kiri fe mani ovuzu adrasi ’yeta yi ma drini ’yelerisi a’dule, Yehova ’yoni.

31A’disiku engazu o’du yini eri sizurisi ecazu kpere andru, aku amboru ’dori ovu ma dri afa aoko fepi ma dri ma asi engazu adraruri’i; ma ma adi eri ani ma miliasi ra,

32e’yo onzi dria Israeli anziyi pini ’yele Yuda anziyi be ma asi engazu adraruri ma e’yosi -yi’i, opi yini pie, opianzi yini pie, atalau yini edeta edepi ’diyi pie, nabi yini pie, ’ba Yudaa ’diyi pie, ’ba ovupi Yerusalemua ’diyi pie.

33Yi oja yi ma nguku ma vu’i, te andreti’i ku; te mani ndra yi imbazu ma’iri ti, engazu o’biti drio drio yi imbazu ti, yi coni nga yi ma bile imbata a’izu ku.

34Te yi ’ba afa yini mani ngule onzi ’diyi jo omvele ma rusiri ma alia, eri ezazu.

35Yi si pari uruleru Baalini ovupi Hinomu mvi vile e’bu ma alia ’diyi, yi ma fe agianzi yini ezoanzi yini be ma aga aci ma alesi Moleki dri ani; te ma azini yi e’yo ’diri ’yezu ku, ma egani vini ma asia yi nga e’yo nde ma asini ngule onziri ’ye ’dini ku, fezu Yudani e’yo onzi ’yezu.

36E’yo ’disi Yehova Mungu Israeliniri ’yo ’dini aku amboru ’dori ma e’yosi, emini e’yoni ’yozu kini, Fe eri opi Babuloniari ma dria sei pisi, tiki pie, azo muani be ’bo:

37Mi ndre, ma nga yi oku engazu angu dria mani yi drozu aoko mani pisi, asi veza mani pie, adra mani aciruri be ’diyi ma aliasi ra; te ma nga yi eji dika pari ’doria, ma nga fe yi ma adri e’yo ’yaasi.

38Yi nga di ovu ’ba mani, ma di nga ovu Mungu yini.

39Ma nga yi dri asi alu fe geri alu be, yi ma ru ma ’dani ’dani ani, e’yo onyiru ejizu yi ma ruaa, azini anzi yi ma vutia ’diyi ma ruaa indi ani.

40Ma nga aziza ’dani ’daniri azi yi be, ’yozu ma nga yi ’ye onyiru, ma ngani ma oja yi vusi yi kuzu ku; ma nga ruta ma ruzuri ’ba yi ma asia, ’dini yi ma ku ma ku beni.

41Ada, ma nga ovu ayikosi e’yo yinisi mani yi ’yezu onyiru, azini ma nga yi isi angu ’doria ada ada, ma asi driasi ma orindi driasi indi.

42Te Yehova ’yo ’dini: Ekile ndra mani e’yo onzi amboru ’dori dria ejile dria suru ’diri ma ruaa, ’dinile indi ma nga e’yo onyiru dria mani azile yi beri eji yi ma ruaa dria indi.

43Yi nga vini amvu je angu ’do emini ’yole kini, Eri andruni, ’ba anyapa be alenia yo; fe eri ’ba Kalideyaa ’diyi ma dria ’bo-ri ma alia.

44’Ba yi nga amvu je silingisi, yi nga yi ma dri ti waraga aje jezu ’diyi ma alia, yi nga yi bi ci oderisi ecetaru, yi nga ’ba e’yo eti ndrepi ’diyi omve, angu Benyaminini pi ma alia, pari Yerusalemu ageia ’diyi pia, aku amboru Yudaa ’diyi pie, aku amboru oni eselia ’diyi pie, aku amboru angu eleria ’diyi pie, aku amboru angu alaza urulerua ’diyi pie; a’disiku ma nga ati’ba yini omvi dika, Yehova ’yoni.

← Chapter 31 Jump to: Chapter 33 →