Jeremiah 51 — Lugbara (E’yo Siza Alatararu Munguniri BIBLIA)

1Yehova ’yo ’dini: Emi ndre, ma nga oli ’ba dri japiri eji Babuloni pi ma ruaa, ’ba ovupi Lebi-kamaia ’diyi

2azini ma nga ’ba jururu ma ti le Babulonia, yi nga eri ndri kobisi, yi nga fe angu erini ma ovu pirini, a’disiku o’du candini ma alia yi nga eri ace kuru kuru.

3’Ba ’ye gbipi osusiri ma nzo eri ma osu ku, eri ma enga i bongo erini ayaru ombaniri be i ruaa ku. Emi ma ku vini karile erini ku; emi ma ja asikari erini ongulumuru ma dri dria dria.

4Yi nga o’de va fuzaru kai ’ba Kalideyaa ’diyi ma angua, ’ba osole lekeke ’diyi gboko erinia indio

5A’disiku Mungu erini, Yehova asikari ongulumuruniri, kuni Israelini, kani Yuda’i ku.

6Emi apa Babuloni ma aliarisi, ’ba alu alu ma pa i ngulupi ma idri fo! Emi ma ja dri e’yo onzi erini ma ’alia ku, a’disiku eri o’du Yehovani arioti ofezuri’i, eri nga arioti ofe eri ma ruaa ra.

7Babuloni ovu ndra kerea meleru Yehova ma dria, fepi anzi wudrikuru driani atizuri; suru ndu ndu mvu patiefi su erini ’bo, e’yo ’disi suru nde ’diyi yi aza ani.

8Babuloni e’de va coti, ja dri ’bo; emi ga lulu erisi! Emi ’du aro triza rua suza erinisi; kani eri rua nga ati ani ra yani.

9Ama le ndra Babulonini ati ra, te eri ovuni nga atizaru ku. Ama ku eri, ama ma mu alu alu ama vile angua; eri ma e’yo lizani cale kpere ’buarisi, azini erini ovule engazaru ’bu iriti beriarisi.

10Yehova ofu onyi amani ’bo; ama ma emu, ama ma olu Zionia azi Yehova Mungu amanirini ’yeleri ma e’yo.

11Emi ji ’ye si ndri ndri! Emi bi gombere kiri kiri! Te Yehova enga opi Mediaa ’diyi ma asi ’bo, a’disiku ega egata Babuloni ma ruaa eli dri jazu, a’disiku e’yo ndeni ovule arioti ofeza Yehovanirisi, arioti ofeza hekalu erini ma e’yosiri’i.

12Emi ma ’du bendera uru omba ’bazu abi kaliru Babuloniari be; emi ede angu agei teza ma e’yo okporu; emi ’ba ’ba angu agei tepi ’diyi yi ma paria; emi ede ’ba ari’ba mbapi ndindiru ’diyi; Yehovani e’yo ndra erini ’yole ’ba ovupi Babulonia ’diyi ma ruaari egale ’bo, azini ’yele indirisi.

13Mi’i ovupi yi kakau ma dria, lonyi be turi la, asiza mini eca ’bo, li mini ma o’bizani.

14Yehova asikari ongulumuruniri so oyo i ma ngulupi ma rusi ’bo kini: Adaru ma nga fe mi ma ga tre ’basi ekile o’doasirile, yi nga ali cere o’be mi ruaa,

15Eri ’ba ndra nyaku i okposi, eri fe angu wudrikuruni pa sozu ondua inisi, eri aja ’bu e’yo vaza inisi indi.

16Eri ka e’yo ’yo i o’dukosi, yi ombupi ombu ’buari ma awuni ekuni, eri fe apurusani engazu tuzu nyaku ma kalatia dria. Eri ovi ede ozoo dri, eri ofu oli pari erini lonyi ta mbazu’diviarisi.

17’Ba dria alu alu eca anyapale nita kokoru; onduou mele dipi okaari dria alu alu isu drinza wura inzile inzi erini dilerisi; a’disiku wura erini edele aya akapi acisiri eri inzoni, ava yi ma alia aluni yo.

18Yi afa tokoni, azi ’ba abazaniri’i; o’du Munguni yi andrizurisi yi nga dri ja ra.

19Awita Yakoboniri ovuni afa ’diyile ku, a’disiku eri afa dria edepiri’i, azini Israeli ovu suru eri ma yilaniri’i; runi Yehova asikari ongulumuruniri’i.

20Mi ogara mani ombaniri’i, azini afa mani omba ’bazu ’diyi: ma nga misi ’ba jururu onyo nyingiriki; misi ma nga suru dri ja ra;

21misi ma nga akanya pi onyo nyingiriki ’ba nzupi driniari be;

22te misi ma nga gari ombani onyo nyingiriki ’ba nzupi aleniari be; misi ma nga agupi piyi onyo okuyi be; misi ma nga ’ba deza pi onyo ’ba o’di be; misi ma nga karilau pi onyo nyingiriki zamva be;

23te misi ma nga ’ba kabilo ocepiri pi onyo nyingiriki kabilo o’biru erini ’diyi be; misi ma nga ’ba amvu ’yapiri onyo nyingiriki kulumbu tiniri be; misi ma nga ’ba ’ba dri cepi ’diyi onyo nyingiriki ’ba ’ba dri cepi yi ma palaa ’diyi be.

24Azini ma nga e’yo onzi yini ’yele emi milia Zioni ma alia ’diyi dria ofe Babuloni pi ma ruaa ’ba dria ovupi Kalideyaa ’diyi be, Yehova ’yo ra.

25Mi ndre, ma omba ’ba mi be, mi oni ’ba dri japiri la, Yehova ’yo ra, mi angu wudrikuru dria dri japiri mi’i; ma nga ma dri eju mi dria, ma nga mi gu oni driarisi va, ma nga mi ’ba ovuzu oni vezaru.

26Yi ngani oni o’du mi alia ’bazu jo kala ku, kani oni jo ma eti ’bazuriru ku indi, te mi nga ovu andruru ’dani ’dani, Yehova ’yo ra.

27Emi ma ’ba bendera uru angu nde ma alia, emi ma vu guka ’ba jururu ma eselia; emi ede ’ba jururu omba ’bazu eri be, emi omve suru omba ’bazu eri be, Araratini, Mini pie, Asikenazi pie; emi pe ’ba asikari dri cepiri omba ’bazu eri be, emi fe akanya ma efu tu uru ekile ombi rua mbapi ’bo ’diyile.

28Emi ede ’ba jururu eri ma ruaa, opi ’ba Mediaa ’diyini pie, ’ba yi dri cepi ’diyi pie, ’ba dri cepi yi ma palaa ’diyi pie, angu yini nyale opiruri pie dria.

29Te angu nde ma rua ya ya rua suza be, a’disiku e’yo Yehovani egale ’yele Babuloni ma ruaari so pa ’ dani ’dani, angu Babuloni ojazu andruru ’ba kokoru.

30’Ba ombaru Babulonia ’diyi ga omba ’bako si, yi ovu ’dani pari okporu yini yi ma ta mbazuria; okpo yini de ira, yi oja yi si yi ekile okuyile; du pari erini ’bani adrizu ’diyi ma ti, ve acisi ra, onyo vini pati erini katalaru ’diyi ra.

31’Ba alu nzupi e’yo beri nga nzu dri fu i agyi aziniri be, ojio alu nga dri fu ojio aziniri be, e’yoni ecezu opi Babuloniari dri kini, Bi aku amboru eriniri kalasi dria ’bo;

32obi kiji zozu ’diyi ndru ndru mbele, odu vini omi ti acisi ’bo, ’ba ombaru ’diyi ovu urisi tu.

33A’disiku Yehova asikari ongulumuruni Mungu Israeliniri ’yo ’dini: Babuloni zi ovu ekile akuma ’bani anya cozu o’du anya cozurisirile; ace nga were o’du anya lozaniri nga eca erini ra.

34Nebukadreza opi Babuloniari nya ma ’bo, eri ekpa ma ’bo; eri ’ba ma ovuzu imvu ale be piriniriru, eri ki ma ekile uri amboruni afa kilerile ’bo; eri ma ale tra afa mani aluzaru ’diyisi, eri ogbe ma ’bo.

35’Ba ovupi Zioniari nga ’yo ra, kini, E’yo onzi yini ’yele eganasi ma vu azini ori’ba mani vuri ma ovu Babuloni ma dria. Azini Yerusalemu nga ’yo indi kini, Ari mani ma ovu ’ba Kalideyaa ’diyi ma dria fo!

36E’yo ’disi Yehova ’yo ’dini: Mi ndre, ma nga e’yo mini ma aza ko e’yo nzezasi, ma nga mi arioti ofe ma nga fe miri erini ma nzu ra, yi a’di erini ma nzu indi;

37te Babulonini nga i oja nguru ngururu, pari obalako pini ovuzuriru, e’yo osutaru ’ba dri,onzoaru, ’ba kokoru.

38Yi nga ono tualu kami aludu ’diyile; yi nga wu okposi kami anzile.

39Yi ka nga enga aciru ma nga omu ’ba yi dri, ma nga fe yi ma ati ati, yi ma ovu ayikosi beni, lazu o’du kozu ’dani ’dani engakokoru, Yehova ’yo ra.

40Ma nga yi eji va ekile kabilo anzi olizaru ’diyile, ekile kabiloago pile ndriago be.

41Bi Sesakini ’doni! Bi angu wudrikuru driani inzileri ndru mbeleru ’doni! Babuloni eca andruru suru ndu ndu ma eselia ’doni!

42Miri ti uru Babuloni ma dria; yi erini mbupi mbu kakau ’diyi a’bu eri ma dri ci.

43Aku amboru erini ’diyi eca andruru, angu a’wiru angu roko driariru, angu ’bani ovuzu alenia yoriru, te ’ba ma ori aluni agani ’dasi ku.

44Te ma nga e’yo li Beli ma dria Babulonia, ma nga afa erini okile ’diyi ofu eri ma tiliasi ra. ’Ba jururu ’diyi ngani ra eri vu dika ku; ada, abi kaliru Babuloniari nga asu ra.

45Suru mani la, emi ma fu eri ma aliarisi ra! Emi alu alu ma pa emi adra aciru Yehovanirisi!;

46Asi emini ma ovu urisi ku, emi maru e’yo kuza emini ngale erile angu nde ma aliari ku; a’disiku e’yo kuza azini nga efu eli alusi, vutinia e’yo kuza azini nga efu eli azinisi, angu nga ovu osazaru ombasi, opini dri aruzu opi azini be.

47E’yo ’disi o’duni nga emu ra o’du ndesi ma nga e’yo li wura opale eguasi ’bani inzile inzi Babulonia ’diyi ma dria; angu erini nga ovu drinzasi dria, azini ’ba yini fule kai kai ’diyi nga o’de va eri ma alia.

48O’du ’dasi ’bu pi nyaku be, afa alenia ’diyi be dria, nga ongo ngo ayikosi Babuloni ma dri inzazu; a’disiku ’ba afa opapi ’diyi nga emu eri ma ruaa engazu angu andralaruria, Yehova ’yo ra.

49Ekile ndra Babulonini fezu ’ba Israelini o’dezu varile, ’dini ’ba ofule angu drisi dria ’diyi nga o’de va Babulonia indi.

50Emi apapi sei ma sisi ’bo ’diyi, ma emi ma mu drile, emi ma so pa pari alua ku! Emi ega Yehovani de emi ziri, emi fe e’yo Yerusalemuni ma fi emi asisilea:

51Ama ovu drinzasi amani o’data erile ’borisi; drinza ase ama mile ci, a’disiku ’ba jururu fi pari alatararu jo Yehovania ’diyi ma alia ’bo

52E’yo ’disi, emi ne, o’du yi nga eca; ra, Yehova ’yo ra, o’du ndesi ma nga e’yo li eri ma wura opale eguasi inzile inzi ’diyi ma dria, te ’ba erini ’ye ebi be ’diyi nga owu angu erini ma eselia dria.

53Babuloni ka te tro tu ’bua ti, ka te tro pari izuru okpo erinirini ’ba okporu ti, te ti ’ba afa opapi ’diyi nga emu eri vu engazu ma vurisi, Yehova ’yo ra.

54O’duko wutani efupi Babuloniasiri! Azini dri jaza amboruni efupi ’ba Kalideyaa ’diyi ma anguasiri ’doni!

55A’disiku Yehovani Babulonini eza, eri o’duko amboruri ma ti asu eri ma aliarisi. Yi yini ombupi ombu ’diyi owu ekile yi kakauni owulerile, awu yini ma o’duko efu;

56a’disiku ’ba ’ba dri japiri eca eri i

57Te ma nga fe ’ba opiru erini ’diyi pi ma ati ati, ’ba onduaru erini ’diyi pie, ’ba erini ’ba dri cepi ’diyi pie, ’ba erini ’ba dri cepi yi ma palaa ’diyi pie, ’ba erini ombaru ’diyi pie; yi nga la o’du kozu ’dani ’dani, yi ngani enga ku, Opi amboru, runi Yehova asikari ongulumuruniri’i yoni.

58Yehova asikari ongulumuruniri ’yo ’dini: Yi nga abi kaliru walaru Babulonia ogu va teketeke, yi nga kalitile erini izuru ’diyi ve acisi. ’Ba jururu nga azi nga afa tokosi, suru ndu ndu nga azi nga aci nde dri, yi nga ande ra.

59E’yo nabi Yeremiani azile Neria Maseya mvi ma mvi Seraya ma tia, erini muria Babulonia Zedekia opi Yudaari be, eli erini opi nyazurini cazu surisi. Isu Seraya nderi ovu ’ba jo opini ma driliari’i.

60Yeremia nga e’yo onzi ngapi ecapi Babuloni ma driari si buku ma alia dria ci, adani e’yo sile Babuloni ma e’yosi ’diyi dria.

61Te Yeremia nga di ’yo Seraya ma tia, Mi ka nga ca Babulonia ’bo, mi ma ece ku e’yo ’diyi lazu dria,

62azini mi ma ’yo, Yehova la, mi ’yo pari ’dori ma e’yo ’bo, eri dri jazu afa ma adri alenia ku ani, ’ba piyi anyapa be, te eri ma ovu andruru ’dani ’dani.

63Te eri nga eca ’dini, mi ka buku ’diri la de ’bo, mi ma ombe oni eri ma ruaa ci, mi ma ’be di eri yi ara Ufirate ina alia agadua birri,

64te mi ma ’yo ’dini, Babulonini nga ’de ’dini, eri ngani enga dika aluni ke, candi mani ngale ejile eri ma ruaarisi. E’yo Yeremiani ca ’dipi.