Jeremiah 23

Lugbara (E’yo Siza Alatararu Munguniri BIBLIA)

← Chapter 22 Jump to: Chapter 24 →

1Candi ’ba kabilo ocepi, kabilo nyamuko mania ’diyi ma dri japi azini erepi ’diyi ’dri! Yehova ’yo ra,

2E’yo ’disi Yehova Mungu Israeliniri ’yo ’ dini ’ba kabilo ocepi nyaka fepi kabilo mani dri ’diyi ma ruaa: Emi ere kabilo mani ’bo, emi dro yi ’bo, emi muni yi andrizu ku. Emi ne, ma nga emi andri ’yeta emini onzikanyaru ’diyi ofezu emi ruaa, Yehova ’yoni.

3Azini ma nga kabilo mani acepi ’diyi ma joloko oku engazu angu drisi dria mani ndra yi odrozu ’diyiasi, ma nga yi eji dika lico yinia; yi nga anzi oti, yi nga ezu tre.

4Te ma nga ’ba yi ocepi ’diyi o’ba yi drilia nyaka fezu yi dri; yi ngani ovu urisi dika ku, yi ma asi ngani oti dika ku, aluni ngani avi ku, Yehova ’yoni.

5Emi mire, o’du yi ’ye emu ’di, Yehova kini, o’du ndesi ma nga arakala onyiruri fe egbi Daudi dri, eri nga angu nya opi amboriru, eri nga ’ye onduasi, eri nga e’yo liza kililiru li, nga e’yo onyiru ’ye indi angu nde ma alia.

6O’du erinisi Yudani nga ovu pazaru azini Israelini nga adri e’yo ’yaasi. Ru erini yini eri omvezuri ’di: Yehova onyi amaniri’i.

7E’yo ’disi, emi ndre, o’duni nga emu ra, Yehova ’yo ra, o’du ndesi yi ngani ’yo, Ekile Yehova anzi Israelini ofupi angu Misiriasirini ovule idrirurile, ’dini ku,

8te, Ekile Yehova ori’ba Israelini ma anzi ofupi yi dri cepi angu andraleruriasi, azini angu dria mani yi drozuriasirini ovule idrirurile. Te yi nga adri yi vile angua.

9Nabi ’diyi ma e’yosi: Ma asi nye i ma alia ’bo, falako mani dria oya oya; ma si ekile ’ba atipi atirile, ekile ’ba ewani fule furile, Yehovasi, azini e’yo ’yoza erini alatararurisi.

10A’disiku angu ga tre ’ba ali o’bapi ’diyisi; angu ovu awu be atrinasi, iribi nyamua roko driari ’wi ’bo. Geri yini acizuri eri onzi, okpo yini ovuni okpo kililiruri ku.

11A’disiku nabi pi atalau edeta edepiri be yi iritro onzi; ada, ma isu e’yo onzi yini kpere jo mani ma alia, Yehova ’yoni.

12E’yo ’disi geri yini nga ovu yi dri pari onzokonzoru angu biza ma alia ’diyile, ’ba nga yi odro odro, yi nga o’de va pari nde ma alia; a’disiku ma nga e’yo onzi ji yi dria adaru eli mani ngazu yi andrizuri’i, Yehova ’yoni.

13Ma ndre vini e’yo azazaru nabi Samaria ’diyi ma eselia: yi ondri e’yo Baalisi, yi fe suru mani Israelinirini abani,

14Ma ndre e’yo onzikanyaru tu nabi Yerusalemua ’diyi ma eselia: yi ali o’ba, yi ad inzo liza ma alia; yi dri mba fe ’ba azi onzi ’yepi ’diyi dri, ’dini ’ba aluni ojani i e’yo onzi kuzu ku; si yi dria ma dri Sodomale, ’ba ovupi aku nde alia ’diyi ekile Gomorale.

15E’yo ’disi Yehova asikari ongulumuruniri ’yo ’dini e’yo nabi ’diyinisi: Emi ndre, ma nga yi dri enyata okaru fe nya, ma nga aro drapi ojileri fe mvu yi dri; a’disiku engazu nabi Yerusalemua ’diyi vurisi e’yo onzi efu angu ma alia dria.

16Yehova asikari ongulumuruniri ’yo ’dini: Emi eri nabi e’yo ondripi emi tia ’diyi ma e’yo ku; yi emi imba e’yo toko tokosi; yi e’yo ndreza engapi yi ngulupi ma asiari ma e’yo olu’i, te ovuni efupi Yehova ma tiliari’i ku.

17Yi ’yo zuzu ’dani ’ba ma ’bapi aparakaru ’diyi ma tia ’dini, kini, Emi nga ovu asi anzuru be ra; azini yi ’yo ’ba dria alu alu acipi ambo i ngulupi ma asiari vusi ’diyi ma tia kini, E’yo onzi ngani eca emi dria ku.

18Te a’dini so pa pari Yehovani e’yo amazuria ’bonini ya, e’yo vazu azini e’yo erini erizu? A’di ’ba asi e’yo mani ma dria ’bonini ya, e’yo nde erizu?

19Emi ne, akuluku Yehovani! Adra erini efu ’bo, ada eri oliriko ’yepi piripiriruri’i; eri nga afi ’ba azi onzi ’yepiri ma dria.

20Adra Yehovani ngani i oja mvi ku de nga eri ’yeni e’yo i asini leleri de pari ’daa ku. O’duni asirialeru emi nga e’yo nderi va kililiru ra.

21Ma peni ndra nabi ’diyi ma ti ma’i ku ti, te yi nzu ra; ma ’yoni ndra e’yo yi tia ma’i ku ti, te yi ondri e’yo ra.

22Te yi ka ndra pa so pari mani e’yo amazuria ra, te’do yi fe suru mani eri e’yo mani ’bo, te’do yi fe yi oja yi geri yini onziri kuzu, azini ’yeta yini onzikanyarori kuzu ja ’bo.

23Yehova kini, Ma Mungu ovupi ogogori’i, azini Mungu ovupi ziriri’i indi ku ya?

24’Ba alu eco i zizaru pari zizaru mani ecozu ani eri ndrezu kuria ra ya? Yehova ’yoni. Ma gani ’bu pi nyaku be tre ma’i ku ya? Yehova ’yoni.

25Ma eri e’yo nabi e’yo inzoru ondripi ma rusi ’diyini oluleri ra kini, Orobi obi te mani, orobi obi te mani!

26E’yo ’diri nga ovu nabi e’yo inzoru ondripi ’diyi ma asia o’du ngopi ya? Ada yi nabi lokiri yi ngulupi ma asiari ondripi ’diyi.

27’Ba nde ’diyi ega kini orobi yini e’yoni olule yi alu alu yi agyi ma tia ’diyisi, yi nga fe ru mani ma tavi ma avi suru ’dori dri ekile ru mani ma tavini avile ndra yi ma a’bipi dri e’yo Baalinisirile.

28Nabi orobini obileri ma olu ini orobi nde ma e’yoni, te ’ba ovupi e’yo mani beri ma olu asi adasi e’yo mani’i. Anyadrileko pi i o’bi anyaefi be ra ya? Yehova ’yo ra.

29E’yo mani ovuni acile ku ya, Yehova, ’yo ra, eri oyi kata odipi nyirinyiririle ku ya?

30E’yo ’disi, Yehova kini, mi ne, ma nabi e’yo mani ogupi yi alu alu yi agyi vu ’diyi be jururu.

31Yehova kini, Emi ne, ma nga omba ’ba nabi ’yopi yi ma andresi kini, Eri ’yo ’dini, ’diyi be ra,

32Emi ne, ma nabi orobi inzoru ma e’yo olupi ’diyi ma dri aru, Yehova ’yo ra, yi olu ra, yi fe ’ba manini abazu inzo liza yinisi azini e’yo yini yi ipizu toko ’diyisi, te ma peni yi ma ti ma’i ku, ma azini e’yo yi ria ma’i ku; yi koni ’ba nde ’diyi ma aza aluni ku, Yehova ’yoni.

33Te ’ba nde ’diyi, kani nabi, kani atalau edeta edepiri, ka mi zi kini, E’yo eceza Yehovaniri a’di afani ya? mi nga di ’yo yi tia, E’yo eceza ngoni ngori? Ma nga emi adi ku ’de, Yehova ’yoni.

34Te nabi, kani atalau edeta edepiri, kani ’ba ka ’yo, E’yo eceza Yehovaniri ’di’i, ’dini, ma nga agu nde dri panga onzi ofe ori’ba erini be dria.

35Emi nga di ’yo ’dini, emi alu alu ’ba emi jo ejelia ’diyi ma tia, azini emi alu alu emi adripi tia, kini, Yehova omvi e’yo ngoni ya? azini, Yehova ’yo te ngoni ya?

36Te emi ngani e’yo eceza. Yehovani ma e’yo ’yo dika ku, a’disiku ’badria alu alu ma e’yo nga ovu e’yo eceza iniru, emini Mungu idriru, Yehova asikari ongulumuruni, Mungu amaniri ma e’yo ojale inzorurisi,

37Mi nga ’yo nabi tia ’dini, Yehova omvi e’yo mi tia ngoni ya? azini, Yehova ’yo te e’yo ngoni ya?

38Te emi ka ’yo ra, E’yo eceza Yehovaniri, e’yo ’disi Yehova ’yo ’dini, Emini e’yo ’diyi, E’yo eceza. Yehovaniri, ’yole ’dinirisi, te ma pe ’ba ti emi vu kini, Emi ma ’yo E’yo eceza.Yehovaniri, ’dini ku,

39e’yo ’disi ma drini nga avi emisi teketeke, ma nga emi adi ma miliarisi amve aku amboru mani fele emi dri emi a’bipi beri be.

40Azini ma nga o’data asipi kuri azini drinza ’dani ’dani, ’ba drini avizu ani kuri, eji emi dria-ra.

← Chapter 22 Jump to: Chapter 24 →