Jeremiah 2

Lugbara (E’yo Siza Alatararu Munguniri BIBLIA)

← Chapter 1 Jump to: Chapter 3 →

1E’yo ’yoza Yehovani nga eca ma vu, kini,

2Mi ma mu wu Yerusalemu ma bilia ’yozu kini, Yehova ’yo ’dini, Ma ega e’yo mini ndra ovuzu asi onyirusi ewu mini ovuzu ’ba o’dirurisiri, leta ni amani ama azizu nu berisi; mini ma vuti bizu angu roko driaria, angu ’bani afa sazu alenia kuri ma alia.

3Israeli ovu ndra alatararu Yehova dri, orioko anya dri eriniri. ’Ba dria eri nyapi ’diyi nga ovu e’yo be; e’yo ewaruni nga ca yi ma dria, Yehova ’yoni.

4Emi eri e’yo Yehovani, emi ori’ba Yakoboni la, emi ori’ba dria suru Israelini eselia ’diyi be.

5Yehova ’yo ’dini: Emi a’bipi isu e’yo onzi ngori ma yini ngazu ma vusi ziri, yini e’yo toko ma vuti bizu, yini yi ojazu toko aniri ya?

6Yi ’yoni ndra ku kini, Yehova ama ejipi uru engazu angu Misiria, ama dri cepi roko ma driasi angu yi kokoru azini ’bile beri ma aliasi, angu etukaru dra ma endrilendrini ovuzu alenia, angu ’bani agazu aleniasi ku, ’ba aluni ovuzu alenia kuri ma aliasiri eri ngoa ya?

7Te ma eji emi angu efi ’yapi turi ma alia, efi erini pi nyazu onyi erini be. Te emi ka fi ’bo, emi eza angu mani, emi ’ba awita mani afa ngule onziriru.

8’Ba edeta edepi ’diyi ’yoni ndra vini ku kini, Yehovani ngoa ya? ’Ba azita drilia ’diyi nini ma ku; ’ba ’ba dri cepi ’diyi eza e’yo mani ra; ’ba nabiru ’diyi olu e’yo Baalisi, yi aci e’yo orodri fepi kuri ma vutia.

9E’yo ’disi ma nga emi etu nga ’dani,yehova yoni ma nga vini anzi emini ma anzi etu indi.

10Emi ma zo kpere angu i lipi miri alia Kitimua ’diyia, te emi ndre, emi ma pe ’ba ti Kedaria, te emi ega e’yere; emi ndre kani drio e’yo azini ’dinileri indi ya?

11Suru azini oja adrou yini ’diyi yi ka ovu adrou toko ti ra ya? Te suru mani oja diza yini afa orodri fepi kuri ’bazu parinia.

12Emi ma osu e’yo ’dirisi fo, emi ’bu la! Emi ma ru tu, emi ma ovu Yehova ’yoni,

13a’disiku ’ba mani eza ezata iri: yi ku ma yi a’di idrirurini ’bo, yi ga yi dri ’bile ra, te ’bile eti yi lupi ’bo ecopi yi ta mbapi ku ’diyi.

14Israeli ati’boni ya? Osi ndra eri akua ati’boru ya? A’di e’yosi eri ecea afa pazaru ya?

15Kamianzi ono eri dria, yi owu okposi. Yi fe angu erini ovu andruru ’bo; odu aku erini amboru ’diyi ’bo, ’ba alenia aluni yo.

16Memifisi anziyi pi Tapanihesi anziyi be yi lu mi ma olubu ra.

17Te mi ejini e’yo ’diyi mi ngulupi dria mi’i mini Yehova Mungu mini kule pari erini mi dri cezu geriasiria ku ya?

18Te curu’do mi a’di ’ye geri mupi Misiriaria yi Nilini mvuzu ya? Kani mi a’di ’ye geri mupi Asuriaria yi Yi Ara Ufirateni mvuzu ya?

19E’yo onzi mi ngulupini nga mi imbani, azini e’yo mini asizu vile ’diyi nga tre mi dria. E’yo ’disi mi ma ni di e’yo mini Yehova Mungu mini kuzuri ovu e’yo onzikanyaru okangalikaru indi; te ruta mini ma ruzuri ovuni mi alia ku, Opi Yehova asikari ongulumuruni ’yoni.

20Te ewu driorisi ma nyo pati kulumburu mini azini ma oce afa mi ombezuri ra; te mi ’yo ra, Ma ngani ’ye ku. Te oni izuro dria ma dria azini pari ibiru dria ma etia, mi adri mi avu ekile oku ali o’bapirile.

21Te isu ma sa ndra mi pati zabibuni onyiruri, ori pi baru. Mi oja di mi ma dri pati onzikanyaru, pati aseariru ngoni ngoni ya?

22Te ka tro mi oji ofutasi, kani sabuni ndu ndusi ti, e’yo onzi mini ovu nga ma milia ’dani, Opi Yehova ’yoni.

23Mi eco ’yozaru ngoni ngoni ya kini, Ma ovuni ondiru ku, ma bini Baali pi ma vuti ku? Mi ndre pamvu geri minini e’bu aliari; mi ma ni e’yo mini ’yele rarimi ovu ekile ngamia asi la la be, acipi pamvu ini drisirile;

24ekile akanya i sipi roko be, afa aji ongupi ava ruanisirile! Erini ovuzu ava be ’dini, a’di eco eri ojazuni ya? ’Ba eri ndapi ’diyi ngani ande erisi ku; te mba erini ma alia yi nga eri isu ra.

25Mi ma ku pa mini ma ovu enyiriko kokoru ku, oliko mini ma anga yi avijosi ku indio Te mi ’yo ra, E’yo ’yele ’diniri oye; yo, ma le ’ba jururu ’diyi ’bo, te ma nga yi ma vuti bi’i.

26Ekile ’ba oguoururini drinza isule ’bani eri biriarile, ori’ba Israelini ovu drinza be ’dinile yi’i, opi yini pi, opianzi yini pie, ’ba yini edeta edepi ’diyi pie, nabi yini ’diyi pie,

27’yopi pati tia kini, Mi ma ati’i, azini oni tia kini, Mi ti ma mi’i, ’diyi. Te yi oja yi ma nguku ma vu, te mile yini’i ku. Te o’du yini candi isuzurisi yi nga di ’yo ra, Mi enga ama pazu fo!

28Te Mungu toko mini edele ’bo ’diyi yi ngoa ya? Onyiru yi ma enga, yi ka eco mi pazaru, o’du mini ovuzu candisiria ra; te ekile aku ambo ambo mini ’diyi ma kalafe vusi, adrou mini ’diyi ovu ’dinile, Yuda la

29Emi ma etu a’di e’yosi ya? Emi dria eza ma vu ’bo, Yehova ’yoni.

30Ma oco anzi emini ti te yi ga imbata nderi si; sei emi ngulupini ofu nabi emini ’diyi ’bo ekile kami ’ba dri japirile.

31Emi ’ba ewu ’dosi ’diyi la emi eri e’yo Yehovani. Ma si ekile rokole Israeli dri ra ya? kani angu inicicirile ra ya? ’Ba mani ’yo ’dini a’disi ya, kini, Ama tru ama ’bo; ama ngani emu mi vu dika ku?

32Aliria ma onyiafa tani avi eri dri ra ya? kani amurua indi afa suza erinisi ra ya? Te ’ba mani ’diyi dri ma ma ta avi o’du karakarau lakokoru.

33Mi ede geri mini leta ndazu ’doni ya E’yo ’disi mi imba e’yo mini adrile ’yele ’diyi oku onzi ’diyi dri.

34Azini bongo mini ma tia yi isu ’ba ali kokoru alioru ’diyi ma avuari indi; ma isuni yi fizu aliru ku; te eri e’da e’yo nde ’diyisi dria.

35Te mi ’yo ra kini, Ma ’yeni onzi ku; ada adra erini oja i ma vusi ’bo. Mi ndre, ma nga e’yo mini li, mini ’yole kini, Ma ezani ku-risi.

36Mi onzu ’dole azini ’dile ’dini, geri mini ojazu, a’disi ya? Mi nga ovu drinzasi Misirisi indi ekile mini ovule ndra drinzasi Asuriasirile.

37Mi nga fu eri vurisi indi dri be dria, a’disiku Yehovani ’ba mini asi mini ’bazu yi ma dria ’diyi gazurisi, azini mi ngani drileba isu yi be ku.

← Chapter 1 Jump to: Chapter 3 →