Jeremiah 18

Lugbara (E’yo Siza Alatararu Munguniri BIBLIA)

← Chapter 17 Jump to: Chapter 19 →

1E’yo engapi Yehova vu ecapi Yeremia vu, kini:

2Mi enga, mi si ’ba imvu sipiri ma joa, ’da ma nga fe mi ma eri e’yo mani,

3Ma nga di si andra ’dale ’ba imvu sipiri ma joa, te mi ne, eri azi nga afa omberu i ojapiri ma dria.

4Te imvu erini sile siri ka i eza onduou imvu sipiri ma dria ra, eri nga eri ede dika imvu aziniru, ekile imvu sipiri ma asini lele silerile,

5Votinia e’yo Yehovani nga eca ma vu, kini:

6Emi ori’ba Israelini la, ma econi emi ’yezaru ekile ’ba imvu sipi ’dorini ’yelerile ku ya? Emi ne, ekile odrini ovule ’ba imvu sipiri ma driarile, emi ovu ma dria ’dinile, emi ori’ba Israelini la!

7Etu mani e’yo ’yozu suru azini ma e’yosi, kani opi nyaza azini ma e’yosi, eri onzezu, eri onyozu va, azini eri ma dri jazurisi,

8suru nde mani e’yoni ’yole aniri, ka i oja, ka e’yo onzi iniri ku ra, ka’dini ma’i indi, ma nga ma oja e’yo onzi te mani egale ma nga ’ye yi vuri ku ja.

9Te etu mani e’yo ’yozu suru azini ma e’yosi, kani opi nyaza azini ma e’yosi, eri edrezu uru, azini eri isizu nyakuansi,

10eri ka azi onzi ’ye ma milia, ka ma o’duko eri ku, ka’dini ma nga ma oja e’yo onyiru te mani ’yole ma nga ’ye yi vuri ku ja.

11E’yo ’disi curu’do mi ma ’yo ’ba Yudani ma tia ’ba ovupi Yerusalemua ’diyi be kini: Yehova ’yo ’dini, Emi ne, ma e’yo onzi ede emi ruaa, ma e’yo onzi ma geri ndru emi ruaa. Emi emvi curu’do emi alu alu, geri onzikanyaru emini kuzu, emi ede geri emini onyiru ’yeta emini be.

12Te yi ’yo, Aluani yo! A’disiku ama nga aci ama asini lelerile, ama ’ba dria alu aluni nga ’ye asi onzi amboru amaniri vusi.

13E’yo ’disi Yehova ’yo ’dini: Emi zi e’yo ’ba jururu ma eselia, a’di eri e’yo ’dinile ’diyi ranini ya? Aliria Israeliniri ’ye e’yo onzikanyaru tu.

14Si emveru Lebanoniari nga i de oni asearisi ya? Yi anzuru rapi va engapi, ziriri nga nzu ra ya?

15Te suru mani avi ma ra, yi ve obiese afa toko toko ’diyi dri; yi aha geri yinia, gboko oku ’diyi ma aliasi, acizu geri soro soro ’diyi ma aliasi, geri of ale kuri ma aliasi,

16angu yini ’bazu osutaru, pari ’bani onzile ’daniriru. ’Ba dria alu alu agapi ’daasi ’diyi osu osu tu, yi nga dri oya ani.

17Ma nga yi ere ari’ba ma drilia ekile oli engapi kala etuni efuriarisirile. Ma nga ma nguku oja yi vu, te ngani mile oja yi vu ku, o’du yini ovuzu ocoko berisi.

18Yi nga di ’yo, Emi emu, ama ma otu e’yo Yeremia ma ruaa, a’disiku azita ngani i de atalau edeta edepiri dri ku, kani e’yo amaza ngani i de ’ba onduaru dri ku, kani e’yo ’yoza ngani i de nabi dri ku indio Emi emu, ama ma co eri andresi eri o’dazu, ama ma ’ba asi e’yo erini ’yoleri ma dria aluni ku.

19Mi ’ba mi asi e’yo mani ’diyi ma dria Yehova la, mi eri ’ba agata gapi ma be ’diyi ma o’duko.

20Yi nga e’yo onzi ofe e’yo onyiru ma paria ra ya? yini awi gale orindi mani dririsi. Mi ega e’yo ndra mani pa sozu mi drilia e’yo onyiru ’yozu yisiri fo, mani adra mini ojazu yi ma ruaarisi kalaari.

21E’yo ’disi mi ma fe anzi yini liki dri; mi ma efe yi okpo seini dri, mi ma fe oku yini ma ovu anzi kokoru, awuziru. Dra ma ofu agupi yini ra, sei ma oli karile yini ombaa ra.

22Ma eri awu efupi yi vile joari, mini ngaria asikari ongulumuru ejiria yi dria rugburisi! A’disiku yi ga awi ma bizu, azini yi zi vuluvulu ma pa ilizu.

23Te di, Yehova la, mi ni egata yini ma ruaa ma fuzuri dria ra. Mi ma wu e’yo onzi yini ku, mi ini ezata yini mi miliarisi ku. Ma o’be yi mi drilia va; mi ma ’ye yi o’du mini ovuzu adrasirisi.

← Chapter 17 Jump to: Chapter 19 →