Jeremiah 34

Lugbara (E’yo Siza Alatararu Munguniri BIBLIA)

← Chapter 33 Jump to: Chapter 35 →

1E’yo ecapi Yeremia vu engapi Yehova vu, etu Nebukadineza opi Babuloniari pi, asikari ongulumuru erini ’diyi pie dria, suru angu: wudrikuru drisi aria ovupi eri ma palaa ’diyi pie, ’be dria pie, yini omba ’bazu Yerusalemu be, aku amboru erini ’diyi be driarisiri, eri ’dini:

2Yehova Mungu Israeliniri ’yo ’dini: Mi mu e’yo olu Zedekia opi Yudaari ma tia, mi ’yo tinia kini, Yehova ’yo ’dini: Mi ne, ma nga aku amboru ’dori fe opi Babuloniari ma dria, azini eri nga eri eve acisi ra.

3Te mi’i, mi ngani apa eri ma dria ku, te yi nga mi bi ada, yi nga mi fe eri ma dria; emi nga emi ndre opi Babuloniari be milia milia, emi nga e’yo eri be tisi tisi; te mi nga mu Babulonia ra.

4Te mi eri e’yo Yehovani, mi Zedekia opi Yudaari la! Yehova ’yo ’dini e’yo minisi, kini: i Mi ngani dra seisi ku.

5Mi nga dra asi anzuru ma alia. Te ekile yini afa veza vele mi a’bipi, opi mi drilia oko ’diyi ma e’yosirile, ’dinile yi nga afa veza eve misi, yi nga awu wu misi kini, Eyawaye, opi yet A’disiku ma ’yo e’yo nderi ra, Yehova ’yoni.

6Ka’dini nabi Yeremia nga e’yo ’diyi ’yo dria Yerusalemua Zedekia opi Yudaari ma tia,

7etu asikari ongulumuru opi Babuloniari vile ’diyini omba ’baria Yerusalemu pi be, aku amboru Yudani acepi jolokoru ’diyi be driarisi, yi Lakisi pi Azeda be; isu aku amboru Yudaa ’diyi ma eselia pari ’diyi iri a’dule ace nga abi kaliru be cinini.

8E’yo ecapi Yeremia vu engapi Yehova vu ’dini, o’du opi Zedekiani aziza azizu ’ba dria ovupi Yerusalemua ’diyi tia, e’yo trutani azizu yi tia ’borisi, kini,

9’ba dria alu alu ma otru ati’ba yini agupiru ’diyi, ’ba dria alu alu ma tru ati’ba yini ezoanziru ’diyi, yi ka ovu Ebraniou kani Ebraniou zaŋaru; ’ba aluni ma ayu yi ati’baru ku, ’ba Ebraniani azi ngazu ati’boru adripi dri ’dini aluni ku.

10’Ba opiru dria yi a’i e’yo ’diri ra, ’ba ’diyi be dria, yi a’i aziza nde kini yi dria alu alu ma tru ati’bo agupiruri, yi dria alu alu ma tru ati’ba zanaruri, te ’ba aluni ma ayu yi ati’boru dika ku; yi a’i ra, truyi ra.

11Te vilerisi yi oja yi ra, yi fe ati’ba agupiru ’diyi pi ati’ba ezoanziru be, yini trule ’bo ’diyi ma emvi be yi vu yi ombezu yi ma ati’ba agupiru azini ati’ba ezoanziru ’diyiru dika.

12E’yo ’disi e’yo Yehovani nga di eca Yeremia vu engazu Yehova vu kini:

13Yehova Mungu Israeliniri ’yo ’dini: Ma azi ndra aziza emi a’bipi be, o’du ndra mani yi ofuzu angu Misiriniarisi, engazu jo ati’baniarisi, kini,

14Eli aziri ka nga yi de ra, emi dria alu alu ma tru emi adripi Ebraniouru ovupi jezaru mi dri, azi ngapi mi dri eli azia ’bo ’diri ra; emi ma ku eri ma fu mi vurisi truzaru. Te emi a’bipi erini ndra e’yo mani ku, coni vini yi ma bile ku.

15Te emi oja ndra emi ’bo, emi ’ye ndra e’yo ovupi onyiruri ma milia, emini e’yo trutani aziria, emi alu alu emi agyi ma tia, azini emi azi ndra aziza ma drilia jo ovupi omvezaru ru manisiri ma alia;

16te emi oja vini emi, emi eza ma ru ra, emi alu alu fe emi ati’bo agupiru, emi alu alu fe ati’bo zanaru emini trule ma fu yini lelerile ’diyi ma emvi; emi ombe yi dika ovuzu emi dri ati’ba agupiru azini ati’ba ezoanziru.

17E’yo ’disi Yehova ’yo ’dini: Emi erini e’yo mani ku, e’yo trutani azizu, emi dria alu alu emi adripi tia, emi alu alu emi agyi tia; emi ne, ma azi e’yo trutani emi tia, Yehova ’yo ra, emi truzu fezu sei pi dri, azo muani pie, liki pie. Ma nga fe emi ma ovu o’bezaru ’dale azini ’dole suru nyakua ’diyi ma eselia dria.

18Te ’ba aziza mani ezapi, e’yo aziza yini azile ma drilia yini agaria kojamva alile esele iriri ma eseliasiri ’yepi ku ’diyi-

19adaru, ’ba opiru Yudaa ’diyi, ’ba opiru Yerusalemua ’diyi pie, ’ba nzele ranyaru ’diyi pie, ’ba edeta edepi ’diyi pie, ’ba ovupi angu ndea ’diyi pie dria, agapi kojamva alile ’bori ma eseleasi ’diyi;

20ma nga yi fe ari’ba yini ma dria, ’ba ndapi yi fupi ’diyi dri indi. Avu yini nga ovu zaru aria ’bua ’diyi pi dri anyapa nyakua ’diyi be.

21Te ma nga Zedekia opi: Yudaari pi fe ’ba opiru erini ’diyi be, ari’ba yini ma dria, ’ba ndapi yi fupi ’diyi pie, asikari ongulumuru opi Babuloniari vile ngapi emi vusi ’bo ’diyi pie dria.

22Mi ne, ma nga e’yo azi ra, Yehova ’yo ra, ma nga fe yi ma emvi aku amboru ’doria; yi nga omba ’ba eri be, yi nga eri ’du ra, nga eri ve acisi ra, Ma nga aku amboru Yudaa ’diyi ’ba andruru ’ba kokoru.

← Chapter 33 Jump to: Chapter 35 →