Jeremiah 26

Lugbara (E’yo Siza Alatararu Munguniri BIBLIA)

← Chapter 25 Jump to: Chapter 27 →

1Yehoyakimu Yosia mvi opi Yudaarini e’dozu opi nyazurisi, e’yo Yehovani eca kini,

2Yehova ’yo ’dini: Mi so pa jo Yehovaniri ma iriia, mi ’yo aku amboru Yudaa dria ecapi Mungu inzipi Yehova vile joa ’diyi ma tia, e’yo dria mani azile mi tia oluzu yi tia ’diyi; mi ku e’yo azini olukokoru aluni ku.

3Kani yi nga eri ra yani, nga yi oja ’ba dria alu alu geri ini onziri kuzu; ’dini ma eco ani ma asi omvizu e’yo onzi nde mani egale ma asia ma nga ’ye yi ma ruaa ’yeta yini onzikanyaru ’diyi ma e’yosiri kuzu indi beni.

4Mi nga ’yo yi tia, Yehova ’yo ’dini: Emi ka nga ma eri ku, acizu azita mani ’bale emi driliari ma alia,

5ati’ba mani nabiru mani tini pele emi vu ’diyi ma e’yo erizu, ada ma enga o’biti drio drio yi ti pezu ra ’bo, te emi erini yi ku;

6ka’dini ma nga jo ’dori ’ba ekile Silole, ma nga aku amboru ’dori ’ba ovuzu trizaru suru dria nyaku ma dria ’diyi dri.

7’Ba edeta edepi ’diyi, nabi pie, ’ba dria be, yi nga Yeremiani eri erini e’yo ’diyi ’yoria Yehova vile joa.

8Te eri nga eca ’dini, Yeremia ka e’yo dria Yehovani azile eri tia oluzu ’ba dria ma tiari olu de ’bo, ’ba edeta edepi ’diyi pi, nabi pie, ’ba dria pie, nga eri bi ra, kini, Mi nga dra ada!

9Mi ondri e’yo Yehova ma rusi ’yozu kini, ’diri nga ovu Silole, azini aku amboru ’dori nga ovu andruru ’ba kokoru, ’dini a’disi ya? Te ’ba nga yi oku dria Yeremia vu Yehova vile joa.

10Te ’ba opiru Yudaa ’diyi ka e’yo ’diyi eri ra, yi enga opi vile joasi yi tu kpere Yehova vile joa, yi ri va pari ’bani fizu kalitile o’diru jo Yehovaniaria.

11’Ba edeta edepi ’diyi, nabiyi pie, nga ’yo ’ba opiru ’diyi ma tia, ’ba dria pie, kini, Agu ’diri eza e’yo ecozu erini drazu ra, a’disiku erini e’yo ondrile aku amboru ’dori ma driarisi, ekile emini erile emi bilesirile.

12Te Yeremia nga di ’yo ’ba opiru ’diyi pi ma tia dria, ’ba dria ma tia indi kini, Yehova epe ma ti e’yo dria emini erile ’diyi ondrizu jo ’dori ma ruaa, azini aku amboru ’dori ma ruaani.

13E’yo ’disi emi ma ede geri emini ’yeke ’yeta emini be, emi ma eri Yehova Mungu eminiri ma o’duko fo; ka’dini Yehovani nga i asi omvi ani e’yo onzi nde erini olule emi ma ruaari kuzu.

14Te ma’iruni, emi ne ma ovu emi dria. Emi ma ’ye ma be ekile ovule onyiru azini ’yeke emi ma miliarile.

15Te emi ma ni ada, emi ka ma fu ra emi nga ’ba e’yo kokoru ma avuari ji emi ngulupi ma dria, aku amboru ’dori pie, ’ba ovupi alenia ’diyi pie dria, a’disiku ada ada Yehova pe ma ti emi vu e’yo ’diyi oluzu dria emi biliani.

16Etu ’dasi ’ba opiru ’diyi pi ’ba ’be dria, nga ’yo ’ba edeta edepi ’diyi pi ma tia nabi be kini, Agu ’diri ezani ecozu drazu rani ku, erini e’yo olule ama tia Yehova Mungu amani ma rusirisi.

17’Ba ’wara azini angu ndea ’diyi nga di enga e’yo ’yo ’ba ongulumuru yi okupi tualu ’diyi ma tia kini,

18Mikaya ’ba Morasiari olu ndra e’yo o’du Hezekia opi Yudaarinisi, eri ’yo ndra ’ba Yudaa ’diyi ma tia dria kini: Yehova asikari ongulumuruni ’yo ’dini, Yi nga Zionini ’ya ’bani amvu ’yalerile; Yerusalemuni nga i oja abi pariru, azini oni jo vileri nga ovu ekile oni ambo oce be driarile.

19Hezekia opi Yudaari, Yuda be dria, yi fu eri ra ya? Eri runi Yehova’i ku ya, eri ’bani matu Yehova vu asi ndriza a’izu ku ya? Te Yehova omvini i asi ani e’yo onzi erini olule yi ma ruaari kuzu ku ya? Geri ’disi ama’i, ama te ’ye ezata amboru eza ama ngulupi ma orindi vu.

20’Ba azini indi e’yo ondripi Yehova ma rusiri, runi Uria’i, Semaya mvi ’ba Kiriati-yearimuari. Eri olu e’yo aku amboru ’dori ma dria, angu ’dori be, e’yo dria Yeremiani oluleri vusi ra,

21Te opi Yehoyakimu ’ba ombaru erini ’diyi be dria, opianzi erini ’diyi pie dria, ka e’yo erini eri ra, opi ndru eri fuzu ra; te Uria ka e’yo nderi eri ra, eri ovu ani urisi, apa mu Misiria.

22Te opi Yehoyakimu nga ’ba ti pe: Misiria, yi Elinatani Akibori mvi, ’ba azini ’diyi be,

23te yi ofu Uriani Misiriasi, eji eri opi Yehoyakimu vu, opi nde li eri seisi, ’be avuni ’ba toko ’diyi ma ’bilia.

24Te Ahikamu Sefani mvi ma dri ovu Yeremia be eri aza kozu, yi kazu eri fezu ’ba ma dria eri fuzu ku beni.

← Chapter 25 Jump to: Chapter 27 →