Jeremiah 8

Lugbara (E’yo Siza Alatararu Munguniri BIBLIA)

← Chapter 7 Jump to: Chapter 9 →

1Ewu ndesi, Yehova kini, ’ba nga opi Yudaa ’diyi pi ma fala onze nyadriasi, opianzi erini ma fala pie, ’ba edeta edepi ’diyi ma fala pie, ’ba nabiru ’diyi ma fala pie, ’ba ovupi ndra Yerusalemua ’diyi ma fala pie;

2yi nga yi aja etu pi ma drilia, mba pie, ongulumu dria ’bua ’diyi pie, yiru ndra lele tu, azi ngale yi dri, acile yi ma vutisi, yini ndra ndale, yini inzile ’diyi; ’ba ngani fala nde oku kani sa ku; yi nga ovu warale nyaku ma dria.

3Te joloko ori’ba onzi ’dirini ’diyi dri, drani nga ovu lezaru aga idri ra, ’ba nde acepi pari dria mani yi drozu yi erezu alenia ’diyi, Yehova asikari ongulumuruniri ’yoni.

4Azini vini mi ma ’yo yi tia kini, Yehova ’yo ’dini: ’Ba ka e’de, te ngani enga dika ku ya? ’Ba ka i oja pari azinia, adrini emvi dika ku ya?

5Ka’dini ’ba Yerusalemua ’diyi yi ku i yi ojazu asizu vileri ku a’disi ya? Yi ebi yi lokiri be, yi ga emviko si.

6Ma co bi,e, ma eri ra, te yi ’yoni e’yo kililiru ku; ’ba aluni i ma asi ojapi e’yo onzi inisini yo, ’yozu kini, Ma ’ye a’dini ya? ’Ba dria alu alu oja yi geri yinia, ekile akanya nzupi okposi ombaarile.

7Ada, kapia sapi ’buari ni ewu pele eri dri ’diyi ra; a’balau pi elimakoro pie, ohwelu ni ewu yini emuzuri ra; te ’ba mani ’diyi nini azita Yehovaniri ku.

8Emi ’yo ngoni ngoni kini, Ama ovu onduaru, azini azita Yehovani ovu ama be? Te mi ndre, kalamu inzoru ’ba waraka sipi ’diyini si inzoni.

9’Ba onduaru ’diyi yi isu drinza, yi asi oti oti, ’ba bi yi ’bo; mi ndre, yi ga e’yo Yehovani si ’bo, te ondua suruti ngoniru ovu yi ma aliani ya?

10E’yo ’disi ma nga oku yini ofe ’ba azini dri, amvu yini ma nga ofe ’ba ngapi amvu nde ’dupi yiniru ’diyi dri, a’disiku engazu ’ba were vu cazu ’ba amboru vu yi dria alu alu fe lini yi vazu ’ba azini ma afasi; engazu nabi vu cazu ’ba edeta edepiri vu yi dria alu alu ’ye lokirisi.

11Yi ati suru mani ma zi ma bile ururu ’disi ’de, ’yozu kini, Asi anzuru indi, asi anzuru indi, de tro ce asi anzuru ’de yo.

12Yi ovu drinzasi yini e’yo onzikanyaru mani ngule onzi ’diyi ’yeria ’boria ra ya? Yo, yi ovuni drinza be alu kodikodini ku; yi ma andretini onyuni ku. E’yo ’disi yi nga o’de va ’ba o’depi va ’diyi ma eselia; ewu yi cozurisi, ’ba nga yi o’be Yehova ’yoni.

13Ma nga yi ma dri ja teketeke, Yehova ’yoni; zabibuefi ngani ovu pati raza zabibuni ma sia ku, elioefi ngani ovu eliopati ma sia ku indi; bini nga onyu ra, afa mani ndra fele yi dri ’diyi nga yi ku ra.

14Ama ri ciri a’disi ya? Ama ma oku ama, ama ma fi aku kali be okporu ’diyi ma alia, ama ma ovu ndi ’dale; a’disiku Yehova Mungu amaniri obi ama ti ’bo, eri fe vini aro drapi ojileri ama dri mvuzu, amani ezata ezale Yehova vurisi.

15Ama ndru asi anzuni, te onyi ecani ku, ama te ewu rua atizuri, te mi ndre, kiri asi otiza uri be a’dule.

16’Ba eri onoza akanya erini ’diyini engazu Dania; angu dria ya ya o’duko eri ma akanya okporu ’diyini owulerisi. Yi eca, yi nya angu afa alenia ’diyi be dria, aku nderi ’ba adripi alenia ’diyi be dria.

17Te mi ndre, ma nga uri ma ti pe emi eselia, yi uri gala bani, ’bani ecole etalizaru ku ’diyi; uri nde ’diyi nga emi oga ra, Yehova ’yoni.

18Ma ka te eco ma ngulupi ma asi omizaru candi ma e’yosi ka! Asi mani ca ma alia ca ca.

19Mi eri, o’duko suru mani ma zini awu wuzuri, ibi enga angu ziri turia, kini: Yehova ovuni Zionia ku ya? Opi amboru eriniri ovuni eri ma alia ku ya? Yi fe ma adrani engazu wura toko yini edele ’diyi pisi, afa toko toko juruni ’diyi be a’disi ya?

20Anya loza aga ’bo, ewadri asi ’bo, te ama ovuni nga pazaru ku.

21Ma ruani su su suru mani ma zi ma bilesi, ma ovu candisi, uri asi otiza beri bi ma ’bo.

22Aro ovuni Gileadia ku ya? Ojoou ’dale yo ya? Ka’dini ’ba atini nga suru mani ma zi ma rua ku a’disi ya?

← Chapter 7 Jump to: Chapter 9 →