Jeremiah 11

Lugbara (E’yo Siza Alatararu Munguniri BIBLIA)

← Chapter 10 Jump to: Chapter 12 →

1E’yo ecapi Yeremia vu engapi Yehova vuri, kini:

2Emi eri e’yo ’yoza aziza ’dorini ’diyi, te emi ma ’yo e’yo ’ba Yudaa ’diyi pi ma tia ’ba ovupi Yerusalemua ’diyi be.

3Mi ma ’yo yi tia kini, Yehova Mungu Israeliniri ’yo ’dini: ’Ba aziza ’diri ma e’yo eripi kuri ma ovu trizaru;

4aziza nde mani azile emi a’bipi tia, o’du mani yi ofuzu amve angu Misiriarisi, engazu pari ayaru ’bani aci ’bazuriari, ’yozu kini, Emi eri o’duko mani, emi ’ye yi ekile e’yo dria mani azilerile. ’Dini emi nga ovu ’ba mani, ma nga ovu Mungu emini indi,

5’dini ma ma fe oyo ndra mani sole emi a’bipi vu angu gapi lesu pisi anyusu beri fezu yi driri ma so pa ci ani, ekile andrurile. Ma nga di e’yo omvi kini, Amena, Yehova la.

6Te Yehova nga ’yo ma tia, Mi olu e’yo ’diyi dria aku amboru Yudaa ’diyi ma alia, geri ariti Yerusalemua ’diyia indi, kini: Emi eri aziza ’diri ma e’yo fo, emi ’ye yi indi.

7Te ma imba ndra emi a’bipi asi driasi, o’du mani yi efuzu angu Misiriarisi ecazu kpere andru, engazu o’biti drio drio yi imbazu, kini, Emi eri o’duko mani.

8Te ti, yi erini ku, coni vini yi ma bile ku, te yi dria alu alu yi ad ambo be asi onzi yini ma alia ’dani. E’yo ’disi ma eji aziza mani azile yi ma ’ye, te yi ’yeni ku ’diri ma e’yo dria yi ma dria.

9Te Yehova ’yo ma tia, ’Ba Yudaa ’diyi pi e’yo otu yi ma asia ’ba ovupi Yerusalemua ’diyi be, mbuzu ma ruaasi.

10Yi oja yi vile e’yo onzi yi ma a’bipi ndra e’yo mani gapi eriko si ’diyini vu; yi mu Mungu andini ma vuti bizu azi ngazu yi dri; ori’ba Israelini pi ori’ba Yudani be yi eza aziza ndra mani azile yi ma a’bipi tiari ’bo.

11E’yo ’disi Yehova ’yo ’dini, Mi ndre, ma nga e’yo ewaru ji yi ma dria yini ecole apazu ani drilenia kuri; yi nga owu ma vu, te ma ngani yi eri ku.

12O’du ndesi aku amboru Yudaa ’diyi pi ’ba ovupi Yerusalemua ’diyi be, yi nga mu awu wuzu Mungu andini yini obiese vezu yi dri ’diyi vu, te yi ngani eco yi pazaru o’du yini ovuzu candisirisi aluni ku.

13A’disiku adrou emini ovu aku amboru emini ma kalafe vusi, Yuda la; ekile geri ariti Yerusalemuni ma kalafe vusi, emi ede emini paci-leta edezu afa drinzaru nderi dri, auaru, pari ’bani obiese vezu Baali dri ’diyi ra.

14E’yo ’disi mi zi ’ba ’diyisi ku, mi enga mi o’duko zizu yi dri ku indi, a’disiku ma ngani yi eri o’du yini wuzu ma vu candi yinisirisi ku.;

15’Ba mani leleri ovu a’di e’yo ’yezu jo mania ya? Ka vini ali o’ba ’ba kakau be ’bo, za edetani nga mi pa ra ya? Mini e’yo onzi ’yeleri eri mini ayikoni,

16Yehova omve ndra mi o ru, Pati mizeituni ebiru ndrizaru, efi onyiru ’yapiri’i; te eri edu aci ruania o’yona amboru be, ve arakalani kieikici.

17Te Yehova asikari ongulumuruni ndra mi isipiri li e’yo ewaru mi dria, ori’ba Israelini pi ma e’yo onzisi ori’ba Yudani be, yini ’yele yi ngulupi dri, adra mani engazu yini obiese vezu Baali dririsi,

18Te Yehova fe ma dri e’yo nderi nizu, te ma ni eri ra; etu ’dasi mi ece ma dri ’yeta yini ’diyi ra.

19Te ma ovu ekile kabilomva e’yere ’bani jile lilerile de ma nini ku kini yi otu e’yo lokirisi ma vu ’bo, ’yozu kini, Onyiru ama ja pati ma dri efi ’yazani be tualu, te ama ma li eri nzezu angu ’ba idriru ’diyiniri ma eseliasi ra, ’dini ’ba ma ega ru erini dika ku beni.

20Te, Yehova asikari ongulumuruni, e’yo lipi kililiru, ’ba ma asisile o’bipi asi beri la! Ma ma ndre mini aroti oferia yi ma ruaa, mani e’yo mani ecele mi dri ’borisi.

21E’yo ’disi Yehova ’yo ’dini ’ba Anatotia ndapi ma fupi ’diyi ma e’yosi, ’yozu kini, Mi ma ondri e’yo Yehova ma rusi ku, ama kazu mi fuzu ama drisi ku-

22e’yo ’disi Yehova asikari ongulumuruniri ’yo ’dini: Mi ndre, ma nga yi co; karile yi nga odra seisi; agupianzi yini pi ezoanzi yini be yi nga odra likisi;

23yi ma oloko ngani ace ku. A’disiku ma nga e’yo ewaru eji ’ba Anatotia ’diyi ma dria, eli mani ngazu yi cozuri’i.

← Chapter 10 Jump to: Chapter 12 →