Jeremiah 7

Lugbara (E’yo Siza Alatararu Munguniri BIBLIA)

← Chapter 6 Jump to: Chapter 8 →

1E’yo ’yoza ecapi Yeremia vu engapi Yehova vuri, kini:

2Mi so pa jo Yehovani ma tilia, mi olu e’yo ’diri ’dale, mi ’yo, Emi eri e’yo Yehovani, emi ’ba dria Yudaa efipi kalitile ’diyi ma aliasi Yehovani inzizu ’diyi.

3Yehova asikari ongulumuruni, Mungu Israeliniri, ’yo ’dini, Emi oja acita emini ’yeta emini be kililiru raka, ma nga fe emi ma adri pari ’diri ma alia ani ndo,

4Emi ma ’ba a’ita emini e’yo ’yoza inzoru ’diyi ma alia ku, kini, ’Di ovu hekalu Yehovani, hekalu Yehovani, hekalu Yehovani.

5A’disiku emi ka acita emini oja teketeke, ’yeta emini be, emi ka e’yo ’ba pi ma eselia agyi beri li kililiru dria,

6emi ka ani’bo pi inza okporu ku, imvoanzi pie, awuzio pie, emi ka ’ba ali kokoru ma ari ada pari ’doria ku, emi ka aci Mungu andini ma vuti bizu candi ejizu emi ngulupi ma dria ku,

7ka’dini ma nga fe emi ma adri pari ’dori ma alia, angu mani fele a’bi emini dri engazu drio cazu kpere ’dani ’daniri ma alia ra.

8Mi ndre, emi asi emini ’ba e’yo ’yoza inzoru ’diyi ma dria oye.

9Emi nga afa ogu, emi nga ’ba fu, emi nga ali o’ba, emi nga oyo so inzosi, emi nga obiese ve Baali dri, emi nga aci Mungu andini emini nile oku ku ’diyi ma vutisi,

10emi nga vini emu pa so ma drilia jo ’diri ’bani omvele ru manisiri ma alia, ’yozu kini, Ama ovu pazaru -te emi nga e’yo onzikanyaru ngule onzi ’diyi ’ye dria ’dani ya?

11Jo ’diri, ’bani omvele ru manisiri, eca emi milia oji oguouni yi zizu aleniariru ya? Mi ndre, ma’i ma ngulupi ndre e’yo nderi ra, Yehova ’yoni.

12Te emi mu curu’do pari mani ndra Siloaria, pari mani ndra fele ma runi adrizu okorisiria, emi ma ndre e’yo mani ’yele eri ruaa, e’yo onzi ’ba mani Israelini ’diyini ’yele ’diyi ma e’yosiri.

13Yehova kini, Te emini ’yeta ’diyi ’yele driarisi, te ma ’yo emi tia mani engaria o’biti drio drio e’yo ’yoria emi tia, te emi erini ku; ma omve emi ra, te emi omvini e’yo ku;

14e’yo ’disi jo nde ’bani omvele ru manisi, emini ovule a’itasi eri vu ’diri, pari nde mani ndra fele emi dri a’bi emini beri, ma nga eri ’ye ekile mani Siloni ’yele ’borile.

15Azini ma nga emi ’be amve ma miliasi, ekile mani adripi emini, ori’ba dria Efiraimuni ’diyi ’bele amve ’borile.

16E’yo ’disi mi ma zi Mungu ’ba ’diyi dri ku, mi ma enga o’duko mini wuzu yisi ku, ma zi Mungu yisi ku indi, mi ’ba matu ma vu yisi ku indi, a’disiku ma ngani mi eri ku.

17Mi ndreni e’yo yini ’yele aku ambo ambo Yudaa ’diyi pi ma alia, geri Yerusalemua ’diyi pieri ku ya?

18Anzipi yi eja ovu, atapi yi aci edu, okupi yi enya ova, enya olemi olizu oku opiru ’buari dri; azini edeta mvuzaru osuzu Mungu andi ’diyi dri, adra mani engazu,

19Yehova kini, Yi ma adra enga ya? Yi feni ’di aoko nyani yi ngulupi ceni ceni, drinza fezu yi ngulupi dri ku ya?

20E’yo ’disi Yehova Mungu ’yo ’dini: Mi ndre, ma nga aoko mani osu pari ’diri ma dria adra mani be ra, ’ba ma dria, anyapa pie, pati asea ’diyi pie, afa nyakuni kaleri pie; eri nga ve ra, acini ngani i inyu ku.

21Yehova asikari ongulumuruni, Mungu Israeliniri ’yo ’dini: Emi o’ba afa feza vezaru emini edeta azini emini edele ’diyi ma ruaa, emi ma nya za.

22A’disiku o’du mani emi a’bipi ejizu engazu angu Misiriarisi, ma ’yoni ndra yi ma tia afa feza vezaru ’diyi pi ma dria, edeta edezaru ’diyi be ku.

23Te ma azi ndra e’yo ’diri yi ma tia ra, kini, Emi eri o’duko mani, ma nga ovu Mungu emini, emi vini nga ovu ’ba mani beni; te emi ma aci geri dria mani azile emi tiari ma alia, ’dini e’yo emini ma ovu ani baru beni.

24Te yi erini ku, yi coni vini yi ma bile ku, te yi aci yi ma ngulupi ma asisile vusi, azini ambo asi onzi yinini vusi, yi asi vile, muni drile ku.

25Engazu o’du emi a’bipini efuzu angu Misiriarisi ecazu kpere andru, ma ope ati’ba mani ’ba nabiru ’diyi ma ti dria emi vu, mani engaria o’biti drio o’du vusi, yi ti opezu;

26te ti, yi erini e’yo mani ku, yi coni vini yi ma bile ma vu ku, te yi ’ba ombe yini mbazaru. Yi ’ye onzi aga yi ma a’bipini ’yele ’diyi ra.

27Te mi nga e’yo ’diyi ’yo yi tia dria, te yi ngani e’yo mini eri ku. Mi nga vini yi omve ra, te yi ngani e’yo omvi mi tia ku.

28Mi nga ’yo yi tia kini, Suru ’diri eri suru Yehova Mungu yini ma o’duko eripi kuri’i, yi a’ini vini imbata ku; e’yo adari ja dri ’bo; de i yi ma tiliariasi ’bo.

29Emi fa dri’bi emini, emi yi dri’bi nderi amve; emi e’do wuta wuzu oni dri nditiriri ’diyi ma dria, a’disiku Yehova ’be suru adra erini beri, ku yi ra.

30Te Yuda anziyi ’ye e’yo ovupi onzi ma miliari ra, Yehova ’yoni; yi ’ba afa onzikanyaru ngule onzi ’diyi jo nde yini omvele ru manisiri ma alia, eri ezazu.

31Yi si vini pari uruleru ’diyi Tofeti dri, e’buti Hinomu mviniria, ’dini agupianzi yini evezu acia ezoanzi yini be; te ma feni azita nderi ku, e’yo nde fini vini ma asia ku.

32Yehova kini, E’yo ’disi mi ne, o’duni nga eca, o’du ndesi yi ngani eri omve Tofeti’i dika ku, kani e’bu Hinomu mviniri’i ku, te e’bu ’ba Fuzaniri’i: a’disiku yi nga ’ba sa Tofetia, cazu pari avu sazurini acezu dika kuria.

33Azini avu ’ba nde ’diyini nga ovu aria ’bua ’diyi pi dri zaru, nguru nyakua ’diyi be; te ’ba ngapi yi dropini yo.

34Te ma nga fe oguta pi ma o’dukoni asizu aceceni pie, izioni pie, amuruani pie, aku ambo ambo Yudaa ’diyi pi ma alia geri Yerusalemua ’diyi be; a’disiku angu nde nga eca andruru.

← Chapter 6 Jump to: Chapter 8 →