Jeremiah 13

Lugbara (E’yo Siza Alatararu Munguniri BIBLIA)

← Chapter 12 Jump to: Chapter 14 →

1Yehova ’yo ma tia ’dini, Mi mu bongoba opilia mile be nyingirikiari je, mi su eri mi opilia, mi ma su eri yia ku.

2Ma nga di bongoba opiliari je ra, Yehovani ’yolerile, ma su eri ma opilia ra.

3E’yo Yehovani nga eca ma vu pale iri, kini,

4Mi ’du bongoba mi opilia mini jeleri, mi enga mi mu Ufiratea, mi zi eri oni gulea ’dale.

5’Dini ma mu ra, ma zi eri Ufirate ma tia, Yehovani azile ma tiarile.

6Te eri nga eca ’dini o’du kakau ma vutia, Yehova nga ’yo ma tia, Mi enga, mi mu Ufiratea, mi e’du bongoba opilia ndra mani azile mi tia mi ma zi eri ’daleri’i.

7Ma nga di mu Ufiratea, ma ova nyaku, ma e’du bongoba opiliari pari ndra mani eri zizuriarisi ra. Te mi ndre, bongoba opilia nderi eza i onzi ’bo, orodrini curu’do yo.

8Te e’yo Yehovani nga di eca ma vu, kini:

9Yehova ’yo ’dini: Ma nga afu Yudaniri eza ’dinile, afu amboru tu Yerusalemuniri be.

10’Ba onzi ’diyi, e’yo mani ’yole ’diyi gapi eriko si, acipi ambo yi asiari be, mupi Mungu andini ma vutisi azita yini ’yezu yi inzizu ’diyi, nga ovu trotro bongoba opilia depi ’bo orodri kokoru ’dirile.

11A’disiku ekile bongoba opiliarini i ebile ’ba ma opiliarile, ’dinile indi ma fe ori’ba Israelini dria yi ebizu ma vu ori’ba Yudani be pi, Yehova ’yoni, ’dini yi ma adri ma dri sururu, ru duzaru inzitaru azini dizaro, te yi ga eriko si.

12E’yo ’disi mi ma olu e’yo ’diri yi ma tia: Yehova Mungu Israeliniri ’yo ’dini, Obi dria alu alu nga ga tre patiefi ma susi. Te yi nga ’yo mi tia, Ama ni obi dria nga ga patiefi ma susi tre rari ya?

13Mi nga di ’yo yi tia, Yehova ’yo ’dini: Mi ndre, ma nga ’ba dria ovupi angu ’doria ’diyi fe atizu ewasi: adaru opi ripi oguna Daudini ma dria ’diyi, atalau edeta edepi ’diyi pie, ’ba ovupi Yerusalemua ’diyi pie dria.

14Ma nga yi agba alu alu yi agyi ma ruaa, adani atapi anzipi be tualu, Yehova ’yoni. Ma ngani ovu yikisi yi vu ku, ma ngani yi ku ku indi, ma asi ngani ndri yi vu mani yi kuzu dri ja kokoru ku.

15Emi ma eri, emi co bile; emi ma ovu asi afuru be ku, a’disiku Yehova ’yo e’yo ’bo,

16Emi ma fe diza Yehova Mungu eminiri dri de nga eri feni angu biza ku, de nga emi pa osini yi oni dria omuniritisi ku, azini emini angu owuza teria eri oja eri dra ma endrilendriru ofuzu ini kuru kuru kuru.

17Te emi ka le e’yo eri ku, ma orindini nga wu pari zizaruria afu eminirisi; ma mileni nga mindre osu tu, eri nga ra va’yini ’ba ongulumuru Yehovani ’diyi jile ati’barurisi.

18Mi ’yo ’dini opi pi ma tia andri be: Emi ma ’ba emi ele, emi ri va, a’disiku afa emini sule emi driari esi va ’bo, ada oku emini dizaruri.

19Yi ombe aku amboru angu uruleruria ’diyi ma tile ci, te ’ba yi zi pini yo; obi Yuda pi dria, ji ati’baro, obi dria ati’baru.

20Mi enga mi mile, mi ne ’ba emupi angu andraleruasi ’diyi. Kabilo o’biru yini fele mi dri, kabilo o’birundendrizaru ’diyi, yi ngoa ya?

21Mi nga a’di ’yo ya, erini ngaria ’ba mi ma ngulupini imbale ovuzu mi agyiru ’diyi o’baria mi drilia? Rua azo ngani mi bi ekile mvaazoni oku e’dulerile ku ya?

22Te mi ka ’yo mi asia, E’yo ’diyi eca ma dria a’di e’yosi ya? e’yo onzi mini amboru turisi bongo mini ma ti ovu ayuruzaru, azini yi tru paedu mini okposi ani.

23’Ba Etiopiari eco i ma enyi ojazaru, kani o’du eco i ma wura korikoriri ojazaru ra ya? Ka’dini emi’i adripi e’yo onzi ’yepi ’diyi eco e’yo onyiru ’yezaru indi.

24E’yo ’disi ma nga emi ere ekile anya drileko oli engapi roko driarini ’dulerile.

25’Di e’yo emini, esele mani o’bile emi driri eri ’di’i, Yehova ’yoni, a’disiku mini e’yo mani avile ’borisi, mini a’ita mini ’bale inzo vurisi.

26E’yo ’disi ma nga bongo mini ma ti ’du ’ba mi milia ci, ’dini drinza mini ma e’da ani.

27Ma ne e’yo onzikanyaru ngule onzi mini ’yele ’diyi ’bo, adaru, ali o’baza mini, wuza mini lisi ’diyi pie, e’yo drinzaru onzikanyaru mini ’yele mileacisi ’diyi pie, oni asea ’diyi ma dria. Candi mini, Yerusalemu la! Mi leni ovuzu ’bazaru alaru ku; e’yo ’dileri nga ovu kpere ngo vusi ya?

← Chapter 12 Jump to: Chapter 14 →