2 Chronicles 12

Lahu Bible Edited © Thailand Bible Society and Bible Society of Myanmar, 2010, 2020.

← Chapter 11 Jump to: Chapter 13 →

1Yawˇbaoˍ jawˇmawˇ hpeh‸ la peuˬ hkʼaw‸ nawˉ, yawˇ leh yawˇ ve chaw hkʼa peu-eˬ Gʼuiˬsha ve awˬliˇtawˇhkawˇ hta‸ baˬ taˉ ve yoˬ.

2Yawˇbaoˍ jawˇmawˇ te ve ngaˇ hkʼaw‸ teˇ hkʼaw‸ gaˬ htaˇ, Gʼuiˬsha yawˇ hui hta‸ ciˍ yanˍ piˇ ve yoˬ. Eˇjiˇtu‸ jawˇmawˇ Shiˇshaˆ lehˬ, Yeˍruˆsaˍlehnˍ venˇ hta‸ ca bawˆ tuˬ,

3iˉ mvuhˇ lawˬ 1,200, iˉ mvuhˇ ciˇ ve ma‸ yaˇ 60,000 leh gʼaw maˇ peuˬ htaˇ hkʼa gaˬ maˇ jaˇ ve Eˇjiˇtu‸ chaw, Liˇbuˆ chaw, Suˇkiˆ chaw leh Suˍdanˍ chaw hui hta‸ shiˍ veu laˇ leh gaˬ la ve yoˬ.

4Eˇjiˇtu‸ jawˇmawˇ lehˬ, Yuˇda‸ mvuhˇmiˬ hkʼaw cawˬ ve venˇ teˇ hpaˍ hta‸ bawˆ yuˬ leh, Yeˍruˆsaˍlehnˍ venˇ lo gaˬ la ve yoˬ.

5Oˇ htaˇ, tcuh kaˍ paˍ Sheˍmaˍyaˆ lehˬ, Eˇjiˇtu‸ jawˇmawˇ hta‸ kawˆ leh hpaw-e tuˬ awˬ hkʼaˇ gu chehˇ ve jawˇmawˇ Yawˇbaoˍ leh awˬ hoˉ awˬ naˬ teˇ hpaˍ geh Yeˍruˆsaˍlehnˍ venˇ lo laˬ leh, yawˇ hui hta‸ chi hkʼe kʼoˆ piˇ ve yoˬ. Gʼuiˬsha kʼoˆ ve, Nawˬ hui ngaˬ hta‸ baˬ taˉ laˇ peuˬve pa taw, chi beu‸ ngaˬ nawˬ hui hta‸ Eˇjiˇtu‸ jawˇmawˇ Shiˇshaˆ ve la‸ hkʼaw lo chiˇ a‸ laˇ tuˬ yoˬ, teh‸ yawˇ hui hta‸ kʼoˆ piˇ ve yoˬ.

6Oˇ htaˇ, jawˇmawˇ leh awˬ hoˉ awˬ naˬ oˇ ve hkʼa peu-eˬ, Ngaˬ hui te ya‸ jaˇ peuˬ ve yoˬ. Gʼuiˬsha te chehˇ ve kanˉ lehˬ hteˇ cawˇ jaˇ ve yoˬ, teh‸ kʼoˆ ve yoˬ.

7Chi hkʼe hpeh‸ la ve hta‸ Gʼuiˬsha gʼa mawˬ ve teˇ yanˇ, yawˇ Sheˍmaˍyaˆ hta‸ chi hkʼe kʼoˆ piˇ ve yoˬ. Chi beu‸ yawˇ hui venˇbaˆ dawˇ hpfuhˆ peuˬ ve pa taw, ngaˬ yawˇ hui hta‸ ciˍ yanˍ piˇ tuˬve maˇ heˆ. Shiˇshaˆ ca bawˆ la ve htawˇ, yawˇ hui gʼa ponˬ tuˬ yoˬ. Yeˍruˆsaˍlehnˍ venˇ lehˬ, ngaˬ nyi ma zuhˆ ve awˬ ceuˬ hta‸ gʼa hkanˍ tuˬ ve maˇ heˆ.

8Ya‸ hkʼaˇ, Shiˇshaˆ lehˬ Yeˍruˆsaˍlehnˍ venˇ hta‸ bawˆ gʼaˇ tuˬ yoˬ. Oˇ htaˇ yawˇ hui lehˬ, ngaˬ ve kanˉ hta‸ te ve leh, miˬguiˬ jawˇmawˇ teˇ hpaˍ ve kanˉ hta‸ te ve hkʼaˬ hkʼe peun da‸ kuiˬ cawˬ ve hta‸ yawˇ hui hkʼa tawˍ lehˆ shiˍ la tuˬ yoˬ, teh‸ Sheˍmaˍyaˆ hta‸ kʼoˆ piˇ ve yoˬ.

9Jawˇmawˇ Shiˇshaˆ Yeˍruˆsaˍlehnˍ venˇ hkʼaw lo‸ la leh, bon yehˬ hkʼaw leh hawˉ yehˬ hkʼaw cawˬ ve hpu shi mawˇ jeˬ teˇ hpaˍ hta‸ yuˬ kʼai ve yoˬ. Jawˇmawˇ Sawˉla‸monˍ shi yuˬ te taˍ ve htanˬ tuˬ hkʼa peu-eˬ hta‸ htawˇ yuˬ kʼai ve yoˬ.

10Yawˇbaoˍ lehˬ, oˇ ve teˇ hpaˍ awˬ tan, kuiˇ htanˬ tuˬ teˇ hpaˍ kʼaw‸ te leh, hawˉ yehˬ shaw shehˍ hpaˇ awˬ hoˉ hta‸ chiˇ a‸ piˇ ve yoˬ.

11Jawˇmawˇ awˬ to bon yehˬ lo kʼai ve teˇ pawˆ le le, shaw shehˍ hpaˇ teˇ hpaˍ lehˬ, htanˬ tuˬ oˇ ve teˇ hpaˍ hta‸ yuˬ kʼai leh, kʼaw‸ la ve teˇ yanˇ bawehˇ hkʼaw kʼaw‸ keu taˍ ve yoˬ.

12Yawˇ venˇbaˆ dawˇ hpfuhˆ ve pa taw, Gʼuiˬsha yawˇ hta‸ maˇ te luˬ piˇ. Hkʼe te leh, Yuˇda‸ chaw teˇ hpaˍ gawˬ lehˍ gʼa kʼaw‸ chehˇ ve yoˬ.

13Yawˇbaoˍ lehˬ Yeˍruˆsaˍlehnˍ venˇ hkʼaw chehˇ leh, mvuhˇmiˬ hta‸ uˉ peunˍ chehˇ ve yoˬ. Yawˇ ve kanˇ paˆ htawˇ uiˍ la chehˇ ve yoˬ. Yawˇ jawˇmawˇ hpeh‸ la htaˇ, yawˇ ve a sha‸ 41 hkʼaw‸ gaˬ la peuˬ leh, Gʼuiˬsha hta‸ oˉ kʼoˍ pui kuiˬ Gʼuiˬsha leuˆ yuˬ taˍ ve Yeˍruˆsaˍlehnˍ venˇ hkʼaw teˇ chi suhˍ hkʼaw‸ uˉ peunˍ ve yoˬ. Yawˇ ve awˬ e lehˬ, Aˍmonˍ mvuhˇmiˬ hkʼaw chehˇ ve Naˍmaˆ hpeh‸ ve yoˬ.

14Yawˇ lehˬ, Gʼuiˬsha ve a loˍ hta‸ maˇ ca. Haiˬ ve kanˉ hta‸ tiˉ te ve yoˬ.

15Yawˇbaoˍ te ve kanˉ hkʼa peu-eˬ leh, yawˇ ve yehˬ yaˇ kʼa yaˇ teˇ hpaˍ ve awˬ lawn hta‸ tcuh kaˍ paˍ Sheˍmaˍyaˆ ve li‸ daw leh tcuh kaˍ paˍ Iˉdoˍ ve li‸ daw hkʼaw bvuh‸ keu taˍ ve yoˬ. Yawˇbaoˍ leh Yeˍyawˇbaoˍ lehˬ, hkʼaˬ htaˆ ka‸ ma‸ bawˆ da‸ chehˇ ve yoˬ.

16Awˬ hkʼaw‸ nawˉ Yawˇbaoˍ suh-e leh, shu yawˇ hta‸ Daˍviˆ ve venˇ hkʼaw tuˍ piˇ ve yoˬ. Hkʼe te leh, yawˇ ve yaˇ paˍ Aˍbiˇyaˆ yawˇ awˬ tan jawˇmawˇ kʼaw‸ te ve yoˬ.

← Chapter 11 Jump to: Chapter 13 →