2 Chronicles 30

Lahu Bible Edited © Thailand Bible Society and Bible Society of Myanmar, 2010, 2020.

← Chapter 29 Jump to: Chapter 31 →

1A shu yawˇ awˬ to hta‸ da‸ tuˬ kehˬ tuˬ te taˍ peuˬ ve paw hkuˇ maˇ cawˬ maˇ sheˍ ve pa taw, Yuˇda‸ chaw teˇ hpaˍ awˉ lawˉ peuˇ ve teˇ ha pa hkʼaw te cawˇ ve Paˍsaˍhkaˍ pawehˇ hta‸ awˬ yanˇ cawˇ cawˇ te maˇ gʼa ve yoˬ. Chi hkʼoˆ ka‸, Yuˇda‸ chaw teˇ hpaˍ Yeˍruˆsaˍlehnˍ venˇ hkʼaw lo maˇ hpawnˬ la ve pa taw ka‸, pawehˇ oˇ ve hta‸ te maˇ gʼa ve yoˬ.

2Hkʼe te leh, jawˇmawˇ Heˍzaˍkiˆ, yawˇ ve a ma‸ lonˉ teˇ hpaˍ leh Yeˍruˆsaˍlehnˍ venˇ yaˇ teˇ hpaˍ, pawehˇ oˇ ve hta‸ ha pa nyiˇ maˬ teˇ maˬ htaˇ te tuˬ jehˬ da‸ leh,

3Iˉsaˍreˍlaˆ chaw leh Yuˇda‸ chaw teˇ hpaˍ geh li‸ bvuh‸ feu piˇ ve yoˬ. Jawˇmawˇ lehˬ, Eˇhpaˍ renˍ chaw leh Maˍnaˍseˍ chaw hui hta‸ htawˇ, pawehˇ te kuiˬ lo laˬ tuˬli‸ bvuh‸ leh kuˬ piˇ ve yoˬ.

4Jawˇmawˇ leh Yuˇda‸ chaw teˇ hpaˍ lehˬ, pawehˇ oˇ ve hta‸ te hpeh‸ ve pa taw, ha lehˬ jaˇ ve yoˬ.

5Hkʼe te leh, yawˇ hui lehˬ awˬ na hpawˇ chehˇ ve Danˍ chaw leh awˬ hawˉ hpawˇ lo chehˇ ve Beˍraˍsheˍbaˆ venˇ yaˇ hkʼa peu-eˬ hta‸ ka‸ pawehˇ te kuiˬ lo laˬ tuˬ kuˬ piˇ ve yoˬ. Awˬliˇtawˇhkawˇ li‸ daw hkʼaw bvuh‸ taˍ ve hkʼe hkʼa deh‸ te tuˬ leh, ponˬ laˬ htaˇ te ve teˇ pawˆ a‸ kehˉ chaw maˇ maˇ gaˬ la piˇ tuˬ, li‸ bvuh‸ feu piˇ ve yoˬ.

6Jawˇmawˇ leh awˬ hoˉ awˬ naˬ teˇ hpaˍ lehˬ, Iˉsaˍreˍlaˆ leh Yuˇda‸ mvuhˇmiˬ hkʼaˬ ti chi ti lo chaw hta‸ hpehˇ leh chi hkʼe ca kʼoˆ piˇ tcuh ve yoˬ. Iˉsaˍreˍlaˆ chaw teˇ hpaˍ-oˬ, nawˬ hui lehˬ, Aˍsuˇriˆ jawˇmawˇ ve la‸ sheh hkʼaw lo gʼa ponˬ ve chaw teˇ hpaˍ hpeh‸ ve yoˬ. Chi hta‸ pa taw, ya‸ nyi Aˍbraˍhanˍ, Iˉcaˆ, Yaˍkoˆ ve Gʼuiˬsha geh kʼaw‸ hpfuhˆ kʼaw‸ la-o. Oˇ hkʼe te ve kʼo, yawˇ htawˇ nawˬ hui geh kʼaw‸ la tuˬ yoˬ.

7Gʼuiˬsha hta‸ ka ti‸ maˇ yeˬ ve nawˬ hui ve awˬ puˍ awˬ pi leh nawˬ hui ve awˬ viˉ awˬ nyi hui hkʼe taˇ te. Yawˇ hui hta‸ Gʼuiˬsha hehnˇ chaweh ciˍ yanˍ piˇ taˍ peuˬ ve hta‸ nawˬ hui gʼa mawˬ chehˇ ve yoˬ.

8Yawˇ hui hkʼe nyi ma taˇ heh chehˇ-oˆ. Gʼuiˬsha ve tawˇ hta‸ na yuˬ-o‸. Gʼuiˬsha nawˬ hui hta‸ nyi ma maˇ gʼa zuhˆ tuˬ, Yeˍruˆsaˍlehnˍ venˇ lo laˬ leh yawˇ da‸ piˇ kehˬ piˇ taˍ ve bon yehˬ hkʼaw lo yawˇ hta‸ oˉ kʼoˍ ca pui la-o.

9Nawˬ hui Gʼuiˬsha geh kʼaw‸ hpfuhˆ kʼaw‸ la ve kʼo, canˇ paˍ teˇ hpaˍ lehˬ yawˇ hui hpeh kʼai taˍ ve nawˬ hui ve awˬ viˉ awˬ nyi teˇ hpaˍ hta‸ ha kʼaˉ piˇ leh, yawˇ hui hta‸ a shu yawˇ ve chehˇ kuiˬ lo kʼaw‸ kʼo‸-e peu tuˬ yoˬ. Nawˬ hui ve Gʼuiˬsha lehˬ, ha kʼaˉ puiˉ jaˇ ve Gʼuiˬsha hpeh‸ ve yoˬ. Nawˬ hui yawˇ geh kʼaw‸ hpfuhˆ kʼaw‸ la ve kʼo, yawˇ nawˬ hui hta‸ ha‸ yuˬ laˇ tuˬ yoˬ, teh‸ ca kʼoˆ piˇ tcuh ve yoˬ.

10Chaw oˇ ve teˇ hpaˍ lehˬ, Eˇhpaˍrenˍ mvuhˇmiˬ, Maˍnaˍseˍ mvuhˇmiˬ leh, Zeˍbuˆlonˍ mvuhˇmiˬ teˇ hpaˍ lo hkʼa gaˬ kʼai leh, jawˇmawˇ ve tawˇ oˇ ve teˇ hpaˍ ca kʼoˆ maˍ piˇ ve yoˬ. Ya‸ hkʼaˇ, chaw oˇ ve teˇ hpaˍ yawˇ hui hta‸ hkʼa mvuhˇ hkʼa na kʼoˆ guiˇ gʼuiˬ guiˇ ve yoˬ.

11Ya‸ hkʼaˇ, Aˍshaˍ chaw, Maˍnaˍseˍ chaw leh, Zeˍbuˆlonˍ chaw teˇ hpaˍ hpaˍ Yeˍruˆsaˍlehnˍ venˇ lo kʼai gaˇ ve nyi ma cawˬ ve yoˬ.

12Gʼuiˬsha lehˬ, Yuˇda‸ chaw teˇ hpaˍ ve nyi ma hta‸ gu piˇ leh, jawˇmawˇ leh yawˇ ve a ma‸ lonˉ teˇ hpaˍ ve tawˇ hta‸ na yuˬ gaˇ ve nyi ma cawˬ la piˇ lawˬ ve yoˬ.

13Ha pa nyiˇ maˬ teˇ maˬ gaˬ la htaˇ, Paˍsaˍhkaˍ pawehˇ te tuˬ chaw moˍ lonˉ Yeˍruˆsaˍlehnˍ venˇ hkʼaw gaˬ la ve yoˬ.

14Yawˇ hui lehˬ, Yeˍruˆsaˍlehnˍ venˇ hkʼaw cawˬ ve tuˉ tanˇ kuiˬ hkʼa peu-eˬ hta‸ yuˬ veu leh Kiˇdronˍ lawˬ hkʼo‸ hkʼaw ca baˬ keu ve yoˬ.

15Ha pa oˇ ve 14 nyi gaˬ htaˇ, Paˍsaˍhkaˍ pawehˇ caˇ tuˬ awˬ pon yawˬ ehˉ hta‸ tiˇ pehˍ ve yoˬ. A shu yawˇ awˬ to hta‸ da‸ kehˬ tuˬ maˇ gʼa te sheˍ ve paw hkuˇ leh Leˍviˆ chaw teˇ hpaˍ ya‸ taw jaˇ leh, a shu yawˇ awˬ to hta‸ da‸ kehˬ tuˬ haˆ haˆ kʼaw‸ te ve yoˬ. Oˇ hkʼe te peuˬ hkʼaw‸ nawˉ, Gʼuiˬsha ve bon yehˬ lo kʼai leh ca tuˉ tanˇ piˇ ve yoˬ.

16Gʼuiˬsha ve chaw Moˉseˍ ve awˬliˇtawˇhkawˇ li‸ daw hkʼaw bvuh‸ taˍ ve hkʼe, yawˇ hui bon yehˬ lo kʼai leh a shu yawˇ ve chehˇ kuiˬ lo chehˇ taˍ ve yoˬ. Leˍviˆ chaw teˇ hpaˍ lehˬ, yawˬ ehˉawˬ suhˍ yuˬ leh, paw hkuˇ teˇ hpaˍ hta‸ piˇ ve yoˬ. Paw hkuˇ teˇ caˉ awˬ suhˍ oˇ ve hta‸ yuˬ leh, tuˉ tanˇ kuiˬ hta‸ hpeh‸ pfuhˍ piˇ ve yoˬ.

17Chaw maˇ maˇ a shu yawˇ awˬ to hta‸ da‸ kehˬ tuˬ maˇ gʼa te sheˍ ve pa taw, yawˇ hui lehˬ pawehˇ caˇ tuˬ ve yawˬ ehˉ hta‸ tiˇ pehˍ maˇ hpeh‸ ve yoˬ. Hkʼe te leh, Leˍviˆ chaw teˇ hpaˍ yawˇ hui awˬ tan yawˬ ehˉ teˇ hpaˍ hta‸ tiˇ pehˍ leh, Gʼuiˬsha hta‸ chiˇ a‸ piˇ ve yoˬ.

18Chi hkʼoˆ ka‸, Eˇhpaˍrenˍ chaw, Maˍnaˍseˍ chaw, Iˉsaˍhkaˍ chaw leh Zeˍbuˆlonˍ chaw oˇ ve teˇ hpaˍ htawˇ, a shu yawˇ awˬ to hta‸ da‸ kehˬ tuˬ maˇ gʼa te sheˍ. Ya‸ hkʼaˇ, yawˇ hui pawehˇ oˇ ve hkʼaw lo‸-e leh caˇ chehˇ ve yoˬ. Hkʼe te leh, jawˇmawˇ Heˍzaˍkiˆ bon chi hkʼe lawˬ ve yoˬ.

19Ngaˬ hui ve Gʼuiˬsha-oˬ, chaw chi teˇ hpaˍ a shu yawˇ awˬ to hta‸ da‸ kehˬ tuˬ maˇ gʼa te sheˍ ve htawˇ, nyi ma awˬ tawˬ hkʼa gaˬ nawˬ hta‸ oˉ kʼoˍ pui chehˇ ve pa taw, yawˇ hui hta‸ ha kʼaˉ leh venˇbaˆ a ciˉ hpehˇ piˇ-oˆ, teh‸ kʼoˆ leh yawˇ hui awˬ pon bon lawˬ piˇ ve yoˬ.

20Gʼuiˬsha lehˬ, Heˍzaˍkiˆ ve bon lawˬ hkawˇ hta‸ na yuˬ piˇ ve yoˬ. Yawˇ lehˬ, chaw oˇ ve teˇ hpaˍ ve venˇbaˆ hta‸ hpehˇ piˇ leh, yawˇ hui hta‸ maˇ ciˍ yanˍ piˇ.

21Yawˇ hui lehˬ, suhˍ nyi hkʼa gaˬ ha lehˬ ha kʼa Paˍsaˍhkaˍ pawehˇ hta‸ te chehˇ ve yoˬ. Teˇ nyi peuˬ teˇ nyi Leˍviˆ chaw leh paw hkuˇ teˇ hpaˍ lehˬ, awˬ gʼaˇ awˬ shaˉ hkʼa peu-eˬ yuˬ tawˆ leh, Gʼuiˬsha hta‸ chiˇ mvuh chehˇ ve yoˬ.

22Leˍviˆ chaw teˇ hpaˍ lehˬ, Gʼuiˬsha hta‸ oˉ kʼoˍ pui kuiˬ lo chaw yaˇ teˇ hpaˍ hta‸ hkʼa deh‸ sheh kʼai piˇ gʼa ve pa taw, Heˍzaˍkiˆ yawˇ hui hta‸ chiˇ mvuh piˇ ve yoˬ.

23Yawˇ hui suhˍ nyi suhˍ haˉ Gʼuiˬsha hta‸ chiˇ mvuh peuˬ hkʼaw‸ nawˉ, yawˇ hui suhˍ nyi hkʼa gaˬ pawehˇ kʼaw‸ caˉ te kʼai tuˬ nyi ma cawˇ ve yoˬ. Hkʼe te leh, yawˇ hui ha lehˬ ha kʼa pawehˇ kʼaw‸ caˉ te kʼai ve yoˬ.

24Pawehˇ te kuiˬ lo gaˬ la ve chaw teˇ hpaˍ caˇ tuˬ awˬ pon, jawˇmawˇ Heˍzaˍkiˆ lehˬ, nuˇ paˍ lonˉ 1,000 hkeh leh yawˬ ehˉ 7,000 hkeh tanˇ piˇ ve yoˬ. Yawˇ ve a ma‸ lonˉ teˇ hpaˍ htawˇ, nuˇ paˍ lonˉ teˇ hinˉ hkeh leh yawˬ ehˉ 10,000 hkeh kʼaw‸ tanˇ piˇ ve yoˬ. Paw hkuˇ maˇ maˇ a shu yawˇ awˬ to hta‸ da‸ tuˬ kehˬ tuˬ te ve yoˬ.

25Oˇ kaˬ lo hkʼa gaˬ la ve Yuˇda‸ chaw, paw hkuˇ, Leˍviˆ chaw leh awˬ nu awˬ na laˬ taˍ ve Yuˇda‸ chaw leh Iˉsaˍreˍlaˆ chaw hkʼa peu-eˬ ha lehˬ jaˇ ve yoˬ.

26Daˍviˆ ve yaˇ paˍ Sawˉla‸monˍ awˬ co-e htaˇ maˇ heˆ kʼo, chi hkʼe ve pawehˇ teˇ pawˆ ka‸ maˇ te jaw sheˍ ve pa taw, Yeˍruˆsaˍlehnˍ venˇ yaˇ hkʼa peu-eˬ ha lehˬ jaˇ ve yoˬ.

27Paw hkuˇ leh Leˍviˆ chaw teˇ hpaˍ, oˇ kaˬ hpawnˬ da‸ la ve chaw hui hta‸ bon na‸ piˇ ve yoˬ. Gʼuiˬsha lehˬ, mvuhˇ naw ma hkʼoˆ chehˇ taˍ leh, yawˇ hui ve bon lawˬ hkawˇ teˇ hpaˍ hta‸ na yuˬ piˇ ve yoˬ.

← Chapter 29 Jump to: Chapter 31 →