2 Chronicles 28

Lahu Bible Edited © Thailand Bible Society and Bible Society of Myanmar, 2010, 2020.

← Chapter 27 Jump to: Chapter 29 →

1Aˍhkaˆ jawˇmawˇ tanˬ te htaˇ, yawˇ ve a sha‸ nyiˇ chi hkʼaw‸ gaˬ peuˬ leh, Yeˍruˆsaˍlehnˍ venˇ hta‸ teˇ chi hkaw‸ hkʼaw‸ uˉ peunˍ ve yoˬ. Yawˇ lehˬ, yawˇ ve awˬ puˍ lonˉ Daˍviˆ hkʼa shuˍ da‸ ve kanˉ hta‸ maˇ te. Gʼuiˬsha a loˍ maˇ cawˇ ve kanˉ hta‸ tiˉ te ve yoˬ.

2Awˬ nu ve Iˉsaˍreˍlaˆ jawˇmawˇ teˇ hpaˍ te ve hkʼe gʼa‸ te leh, Baˍlaˆ gʼuiˬsha ve shaˉ ho‸ teˇ hpaˍ hta‸ te teh taˍ ve yoˬ.

3Hiˆnonˍ miˬ tawˬ kuiˬ lo yawˇ sha hawnˉ tuˉ tanˇ piˇ leh, Iˉsaˍreˍlaˆ chaw teˇ hpaˍ Hkaˍnanˍ mvuhˇmiˬ hkʼaw lo‸ la htaˇ, Gʼuiˬsha gʼa‸ kʼoˬ piˇ taˍ ve chaw hui te ve hkʼe, yawˇ ve yaˇ paˍ hta‸ yuˬ leh shaˉ ho‸ teˇ hpaˍ hta‸ tuˉ tanˇ piˇ ve yoˬ.

4Awˬ nu ve gʼuiˬsha teˇ hpaˍ ve bon yehˬ hkʼaw maˇ kʼoˆ, hkʼaw hkʼoˆ lo maˇ kʼoˆ, suhˆ cehˬ hawˉ lo maˇ kʼoˆ, yawˇ lehˬ sha hawnˉ leh awˬ nu ve tuˉ tanˇ tuˬ teˇ hpaˍ tuˉ tanˇ piˇ ve yoˬ.

5Jawˇmawˇ Aˍhkaˆ venˇbaˆ te ve pa taw, Gʼuiˬsha lehˬ Suˇriˆ jawˇmawˇ hta‸ ca bawˆ la tcuh leh, Yuˇda‸ chaw teˇ hpaˍ hta‸ Daˍmaˍsehˆ venˇ lo shiˍ kʼo‸-e tcuh piˇ lawˬ ve yoˬ.

6Gʼuiˬsha lehˬ, Iˉsaˍreˍlaˆ jawˇmawˇ Reˍmaˍliˆ ve yaˇ Peˍkaˍ hta‸ htawˇ, Aˍhkaˆ hta‸ ca bawˆ la tcuh leh, teˇ nyi tiˉ awˬ hkʼaw lo Yuˇda‸ ma‸ yaˇ 120,000 gʼaˇ hta‸ tiˇ pehˍ tcuh piˇ lawˬ ve yoˬ. Chi hkʼe hpeh‸ la ve lehˬ, Yuˇda‸ chaw teˇ hpaˍ Gʼuiˬsha hta‸ baˬ taˉ peuˬ ve pa taw yoˬ.

7Iˉsaˍreˍlaˆ ma‸ yaˇ Ziˇhkaˍtiˆ lehˬ, Aˍhkaˆ ve yaˇ Maˍseˍyaˆ, hawˉ yehˬ hkʼaw kanˉ te paˍ awˬ hoˉ Aˍzaˍriˆkanˍ leh jawˇmawˇ ve ma‸ poˍ lonˉ nyiˇ gʼaˇ teˇ gʼaˇ hpeh‸ ve Eˇlaˍkaˍnaˆ hui hta‸ tiˇ pehˍ piˇ ve yoˬ.

8Yuˇda‸ chaw teˇ hpaˍ lehˬ, yawˇ hui ve awˬ viˉ awˬ nyi hpeh‸ ve htawˇ, Iˉsaˍreˍlaˆ chaw teˇ hpaˍ lehˬ, Yuˇda‸ chaw hui ve awˬ miˇ awˬ yaˇ 200,000 gʼaˇ hta‸ Saˍmaˍriˆ venˇ lo shiˍ kʼo‸-e piˇ ve yoˬ. Hpu shi mawˇ jeˬ teˇ hpaˍ hta‸ htawˇ yuˬ kʼo‸-e ve yoˬ.

9Awˬ yanˇ oˇ ve hkʼaw, Awˇdehˆ teh‸ kʼoˆ ve tcuh kaˍ paˍ teˇ gʼaˇ Saˍmaˍriˆ venˇ hkʼaw chehˇ taˍ ve yoˬ. Iˉsaˍreˍlaˆ chaw hui Yuˇda‸ chaw yaˇ miˇ yaˇ nehˬ teˇ hpaˍ hta‸ shiˍ veu laˇ leh kʼaw‸ la chehˇ ve hta‸ ya‸ kʼaw kʼaˉ lo ca hpuˇ da‸ leh, yawˇ hui hta‸ chi hkʼe kʼoˆ piˇ ve yoˬ. Gʼuiˬsha lehˬ, Yuˇda‸ chaw hui hta‸ nyi ma zuhˆ leh, nawˬ hui hta‸ ca bawˆ tcuh taˍ ve yoˬ. Ya‸ hkʼaˇ, nawˬ hui chaw oˇ ve teˇ hpaˍ hta‸ nyi ma zuhˆ jaˇ ve hkʼaw tiˇ pehˍ piˇ ve awˬ hkawˇ hta‸ yawˇ gʼa kaˇ taˍ peuˬ ve yoˬ.

10Chi beu‸ nawˬ hui lehˬ, Yuˇda‸ chaw teˇ hpaˍ hta‸ ngaˬ hui ve awˬ ceˬ te tcuh tuˬ shiˍ hkʼaw‸ veu laˇ chehˇ ve yoˬ. Nawˬ hui htawˇ Gʼuiˬsha hta‸ te ya‸ chehˇ ve hta‸ maˇ shiˍ leh laˇ.

11Ngaˬ ve tawˇ hta‸ na sheˍ. Chaw chi teˇ hpaˍ lehˬ, nawˬ hui ve awˬ viˉ awˬ nyi hpeh‸ ve yoˬ. Yawˇ hui hta‸ kʼaw‸ kʼo‸-e peu-o. Oˇ hkʼe maˇ te ve kʼo, nawˬ hui hta‸ htawˇ yawˇ ciˍ yanˍ laˇ tuˬ yoˬ, teh‸ yawˇ hui hta‸ kʼoˆ piˇ ve yoˬ.

12Saˍmaˍriˆ venˇ hkʼaw awˬ hoˉ awˬ naˬ te chehˇ ve Yeˍhawˇhaˍnanˍ ve yaˇ Aˍzaˍriˆ, Meˍshiˉlaˍmoˆ ve yaˇ Beˍraˍhkiˆ, Shaˍlonˍ ve yaˇ Heˍzaˍkiˆ leh Haˍlaˍdehˇ ve yaˇ Aˍmaˍsaˍ hui htawˇ, ma‸ bawˆ kʼaw‸ la ve Iˉsaˍreˍlaˆ chaw hui hta‸ hpuˇ da‸ ve yoˬ.

13Yawˇ hui kʼoˆ ve, Yuˇda‸ chaw chi teˇ hpaˍ hta‸ choˬ kaˬ lo taˇ shiˍ laˬ. Ngaˬ hui htawˇ Gʼuiˬsha hta‸ te ya‸ jaˇ peuˬ leh, ciˍ yanˍ ve hta‸ gʼa hkanˍ la paˇ neˇ peuˬ. Nawˬ hui chi beu‸ chi hkʼe kʼaw‸ te ve kʼo, leuˉ leh ciˍ yanˍ ve hta‸ gʼa kʼaw‸ hkanˍ tuˬ yoˬ, teh‸ yawˇ hui hta‸ kʼoˆ piˇ ve yoˬ.

14Hkʼe te leh, Iˉsaˍreˍlaˆ ma‸ yaˇ teˇ hpaˍ lehˬ, Yuˇda‸ chaw oˇ ve teˇ hpaˍ leh yawˇ hui yuˬ veu laˇ ve hpu shi mawˇ jeˬ hkʼa peu-eˬYuˇda‸ chaw awˬ hoˉ awˬ naˬ hui hta‸ kʼaw‸ hkʼaw‸ piˇ ve yoˬ.

15Iˉsaˍreˍlaˆ chaw awˬ hoˉ awˬ naˬ oˇ ve awˇ gʼaˇ lehˬ, veu‸ kʼaˇ maˇ cawˬ ve Yuˇda‸ chaw teˇ hpaˍ hta‸ yawˇ hui yuˬ veu laˇ ve mawˇ jeˬ teˇ hpaˍ awˬ hkʼaw lo ve veu‸ kʼaˇ kʼaw‸ yuˬ tawˆ leh feuˉ piˇ ve yoˬ. Hkuiˉ nuˆ maˇ cawˬ ve chaw hta‸ hkuiˉ nuˆ tcuhˉ piˇ leh, hkʼaw kuiˬ naˬ kuiˬ cawˬ ve chaw hta‸ shaˍlonˍ chu shehˍ piˇ ve yoˬ. Ya‸ kʼaw kʼaˉ lo caˇ law‸ ve caˇ tuˬ dawˬ tuˬ teˇ hpaˍ htawˇ piˇ hkʼaw‸ feu ve yoˬ. Gʼaˇ nuˇ jaˇ leh ya‸ kʼaw toˇ maˇ hpeh‸ ve chaw hui hta‸ piˉ laˬ ciˇ tcuh leh, tcuhˉ pui cehˬ hkʼa biˇ cawˬ ve Yeˍriˆhkoˇ venˇ lo kʼaw‸ shiˍ hkʼaw‸ kʼoˬ piˇ ve yoˬ. Oˇ hkʼe te peuˬ hkʼaw‸ nawˉ, Iˉsaˍreˍlaˆ chaw teˇ hpaˍ Saˍmaˍriˆ venˇ lo kʼo‸-e ve yoˬ.

16Eˇdonˍ chaw teˇ hpaˍlehˬ, Yuˇda‸ mvuhˇmiˬ hta‸ ca kʼaw‸ bawˆ la leh, Yuˇda‸ chaw maˇ maˇ hta‸ shiˍ kʼai ve yoˬ.

17Hkʼe te leh, jawˇmawˇ Aˍhkaˆ lehˬ Aˍsuˇriˆ jawˇmawˇ Tiˉgaˍlaˆpaˍleˍsaˍ geh li‸ bvuh‸ feu leh, yawˇ hta‸ ca ga la tuˬ lawˬ hkawˉ piˇ ve yoˬ.

18Awˬ yanˇ oˇ ve hkʼaw, Hpiˇliˇtiˆ chaw teˇ hpaˍ htawˇ, Yuˇda‸ mvuhˇmiˬ mvuhˇ nyi kʼehˬ hpawˇ lo cawˬ ve Behˆseˍmehˆ venˇ, Aˍyaˍlonˍ venˇ, Geˍdaˍroˆ venˇ, Sawˇhkawˇ venˇ, Tiˉmaˍnaˆ venˇ leh Giˆmaˍzawˇ venˇ chi teˇ hpaˍ hta‸ bawˆ yuˬ leh venˇ oˇ ve teˇ hpaˍ hkʼaw chehˇ taˍ ve yoˬ.

19Jawˇmawˇ Aˍhkaˆ lehˬ, Yuˇda‸ mvuhˇmiˬ hta‸ hkʼa deh‸ maˇ nyi maˇ ha‸ shaˉ ve awˬ hkʼoˆ, Gʼuiˬsha hta‸ te ya‸ jaˇ ve pa taw, Gʼuiˬsha lehˬ Yuˇda‸ mvuhˇmiˬ hkʼoˆ lo kawˆ tuˬ dawˇ haˍ tuˬ gaˬ la piˇ lawˬ ve yoˬ.

20Aˍsuˇriˆ jawˇmawˇ lehˬ, Aˍhkaˆ hta‸ maˇ ga piˇ ve awˬ hkʼoˆ, yawˇ hta‸ dawˇ haˍ tuˬ kʼaw‸ te keu piˇ ve yoˬ.

21Hkʼe te leh, Aˍhkaˆ lehˬ bon yehˬ hkʼaw, hawˉ yehˬ hkʼaw leh awˬ hoˉ awˬ naˬ teˇ hpaˍ ve yehˬ hkʼaw cawˬ ve shi teˇ hpaˍ hta‸ yuˬ tawˆ leh, Aˍsuˆriˆ jawˇmawˇ hta‸ la‸ shawnˍ te piˇ ve yoˬ. Ya‸ hkʼaˇ, yawˇ chi hkʼe te piˇ ve ka‸ te‸ chiˉ awˬ bon maˇ cawˬ.

22Dawˇ haˍ tuˬ ve awˬ ceuˬ teˇ ceuˬ peuˬ teˇ ceuˬ gaˬ la ve pa taw, Aˍhkaˆ lehˬ Gʼuiˬsha hta‸ shaˬ te shaˬ kʼaw‸ te ya‸ ve yoˬ.

23Yawˇ lehˬ, Suˇriˆ chaw hui ve gʼuiˬsha teˇ hpaˍ hta‸ tuˉ tanˇ piˇ ve yoˬ. Suˇriˆ chaw teˇ hpaˍ ve gʼuiˬsha lehˬ, Suˇriˆ jawˇmawˇ hta‸ ga piˇ chehˇ ve pa taw, ngaˬ ka‸ yawˇ hta‸ tuˉ tanˇ piˇ ve kʼo, yawˇ ngaˬ hta‸ ga laˇ tuˬ yoˬ, teh‸ kʼoˆ ve yoˬ. Yawˇ oˇ hkʼe kʼaw‸ te ve pa taw, luˬ ve sheˆ ve awˬ ceuˬ yawˇ awˬ hkʼoˆ gaˬ la ve yoˬ.

24Chi hkʼoˆ ka‸, yawˇ lehˬ bon yehˬ hkʼaw cawˬ ve mawˇ hkʼa peu-eˬ hta‸ te luˬ piˇ ve yoˬ. Bon yehˬ hta‸ htawˇ hoˆ baˬ taˍ leh, Yeˍruˆsaˍlehnˍ venˇ hkʼaˬ ti chi ti lo tuˉ tanˇ kuiˬ teˇ hpaˍ te teh taˍ ve yoˬ.

25Yuˇda‸ venˇ teˇ maˬ le le hkʼaw lo, buiˇshaˆaˉnaˆ chaw hui ve shaˉ ho‸ teˇ hpaˍ teh taˍ leh, sha hawnˉ tuˉ tanˇ piˇ chehˇ ve yoˬ. Yawˇ chi hkʼe te ve pa taw, Gʼuiˬsha nyi ma zuhˆ ve awˬ ceuˬ yawˇ awˬ hkʼoˆ lo gaˬ la ve yoˬ.

26Yawˇ hkʼa te ve kanˉ hkʼa peu-eˬ, Iˉsaˍreˍlaˆ jawˇmawˇ leh Yuˇda‸ jawˇmawˇ teˇ hpaˍ ve li‸ daw hkʼaw bvuh‸ keu taˍ ve yoˬ.

27Jawˇmawˇ Aˍhkaˆ suh-e leh, shu yawˇ hta‸ Yeˍruˆsaˍlehnˍ venˇ hkʼaw tuˍ piˇ ve yoˬ. Ya‸ hkʼaˇ, shu yawˇ hta‸ jawˇmawˇ teˇ hpaˍ tuˍ kuiˬ lo maˇ tuˍ piˇ. Hkʼe te leh, yawˇ ve yaˇ Heˍzaˍkiˆ yawˇ awˬ tan jawˇmawˇ kʼaw‸ te ve yoˬ.

← Chapter 27 Jump to: Chapter 29 →