2 Chronicles 19

Lahu Bible Edited © Thailand Bible Society and Bible Society of Myanmar, 2010, 2020.

← Chapter 18 Jump to: Chapter 20 →

1Yuˇda‸ jawˇmawˇ Yawˇshaˍhpaˆ lehˬ, Yeˍruˆsaˍlehnˍ venˇ lo kʼaw‸ gaˬ la ve yoˬ.

2Oˇ htaˇ, Haˍnaˍniˆ ve yaˇ tcuh kaˍ paˍ Yeˍhuˆ jawˇmawˇ geh kʼai leh, yawˇ hta‸ chi hkʼe kʼoˆ piˇ ve yoˬ. Haiˬ ve chaw hta‸ ca ga piˇ leh, Gʼuiˬsha canˇ ve chaw hta‸ awˬ chawˇ ca te piˇ ve lehˬ cawˇ ve yoˬ, teh‸ nawˬ dawˇ ve laˇ. Nawˬ chi hkʼe te ve pa taw, Gʼuiˬsha nyi ma zuhˆ ve teˇ ceuˬ nawˬ hkʼoˆ gaˬ la tuˬ yoˬ.

3Ya‸ hkʼaˇ, nawˬ lehˬ da‸ ve kanˉ teˇ hpaˍ te taˍ peuˬ ve yoˬ. Chaw yaˇ teˇ hpaˍ oˉ kʼoˍ pui chehˇ ve Aˍsheˍraˆ gʼuiˬsha ma ve shaˉ ho‸ teˇ hpaˍ hta‸ nawˬ yuˬ baˬ leh, Gʼuiˬsha nyi ma cawˇ ve kanˉ hta‸ nawˬ te chehˇ ve yoˬ, teh‸ Yawˇshaˍhpaˆ hta‸ kʼoˆ piˇ ve yoˬ.

4Jawˇmawˇ Yawˇshaˍhpaˆ lehˬ, Yeˍruˆsaˍlehnˍ venˇ hkʼaw chehˇ taˍ ve htawˇ, yawˇ lehˬ awˬ hawˉ hpawˇ lo cawˬ ve Beˍraˍsheˍbaˆ venˇ hta‸ te leh, awˬ na hpawˇ lo cawˬ ve Eˇhpaˍrenˍ mvuhˇmiˬ lo hkʼa gaˬ, maˇ maw teˇ pawˆ ca caw nyi leh, chaw yaˇ teˇ hpaˍ Gʼuiˬsha geh kʼaw‸ hpfuhˆ kʼaw‸ la tuˬ awˬ gʼaˇ ca piˇ toˇ chehˇ ve yoˬ.

5Yawˇ lehˬ, Yuˇda‸ venˇ teˇ hpaˍ hkʼaw suhˉ jehˬ shehˍ hpaˇ teˇ hpaˍ hta‸ teh taˍ leh, yawˇ hui hta‸ chi hkʼe kʼoˆ piˇ taˍ ve yoˬ.

6Nawˬ hui shu hta‸ suhˉ jehˬ suhˉ taˆ piˇ kuiˬ hkʼaw, shaˍ ti‸ hkʼa deh‸ taˍ-o‸. Nawˬ hui lehˬ chaw yaˇ ve kanˇ paˆ hawˉ kanˉ te chehˇ ve maˇ heˆ. Gʼuiˬsha ve kanˇ paˆ hawˉ kanˉ te chehˇ ve yoˬ. Nawˬ hui shu hta‸ suhˉ taˆ piˇ chehˇ ve teˇ yanˇ, yawˇ nawˬ hui geh chehˇ taˍ ve yoˬ.

7Gʼuiˬsha hta‸ kawˆ ve hkʼaw shaˍ ti‸ te leh suhˉ taˆ piˇ-oˆ. Awˬ lawn kʼo, ngaˬ hui ve Gʼuiˬsha lehˬ, maˇ hteˇ maˇ cawˇ ve hta‸ te ve chaw, shu ve mehˆ hpfuhˇ hta‸ nyi ve chaw, leh shu geh la‸ shawnˍ yuˬ caˇ ve chaw hta‸ nyi ma cawˇ ve maˇ heˆ, teh‸ yawˇ hui hta‸ kʼoˆ piˇ ve yoˬ.

8Yawˇshaˍhpaˆ lehˬ, Yeˍruˆsaˍlehnˍ venˇ hkʼaw lo htawˇ, Gʼuiˬsha ve awˬliˇtawˇhkawˇ hta‸ te ya‸ ve chaw, leh awˬ chawˇ chawˇ ya‸ da‸ ve chaw teˇ hpaˍ hta‸ nyi leh suhˉ jehˬ piˇ tuˬ ve Leˍviˆ chaw, paw hkuˇ teˇ hpaˍ leh venˇ hkʼaw chehˇ ve awˬ hoˉ awˬ naˬ teˇ hpaˍ hta‸ leuˆ teh taˍ ve yoˬ.

9Yawˇ hui teˇ hpaˍ hta‸ htawˇ, yawˇ chi hkʼe kʼoˆ piˇ taˍ ve yoˬ. Nawˬ hui lehˬ Gʼuiˬsha hta‸ kawˆ ve hkʼaw, nawˬ hui hta‸ piˇ taˍ ve kanˉ hta‸ hkʼa deh‸ gʼa te ve yoˬ. Nawˬ hui hkʼa te ve kanˉ hkʼa peu-eˬ hkʼaw, yawˇ ve tawˇ hta‸ na yuˬ leh ka ti‸ yeˬ ve hkʼaw te-o.

10Nawˬ hui ve awˬ viˉ awˬ nyi teˇ hpaˍ teˇ gʼaˇ leh teˇ gʼaˇ tiˇ pehˍ da‸ leh shaˉ nanˉ lo gaˬ la ve maˇ kʼoˆ, Gʼuiˬsha ve awˬliˇtawˇhkawˇ hta‸ te ya‸ leh gaˬ la ve maˇ kʼoˆ, yawˇ hui Gʼuiˬsha hta‸ maˇ gʼa te ya‸ tuˬ, suhˉ jehˬ suhˉ taˆ piˇ chehˇ ve awˬ yanˇ hkʼaw, yawˇ hui nyi ma hkʼaˬ hkʼe taˍ cawˇ ve teˇ hpaˍ hkʼa deh‸ kʼoˆ maˍ piˇ-oˆ. Nawˬ hui oˇ hkʼe maˇ te ve kʼo, Gʼuiˬsha nyi ma zuhˆ ve teˇ ceuˬ nawˬ hui awˬ hkʼoˆ gaˬ la tuˬ yoˬ. Ya‸ hkʼaˇ, nawˬ hui lehˬ a shu yawˇ ve kanˉ hta‸ hkʼa deh‸ te chehˇ ve kʼo, nawˬ hui hta‸ venˇbaˆ taˍ kuiˬ cawˬ tuˬ ve maˇ heˆ.

11Paw hkuˇ lonˉ Aˍmaˍriˆ lehˬ, bon hpawˇ shinˉ hpawˇ hta‸ caˉ da‸ ve kanˉ hkʼa peu-eˬ hta‸ te cheˆ laˇ hpeh‸ leh, Iˉshaˍmeˍlaˆ ve yaˇ Zeˍbaˍdiˆ lehˬ mvuhˇmiˬ hpawˇ hta‸ caˉ da‸ ve kanˉ hkʼa peu-eˬ hta‸ te cheˆ laˇ hpeh‸ ve yoˬ. Leˍviˆ chaw teˇ hpaˍ lehˬ, shaˉ nanˉ hkʼaw te cheˆ ve kanˉ teˇ hpaˍ hta‸ gʼa‸ te shehˍ hpaˇ teˇ hpaˍ hpeh‸ ve yoˬ. Nyi ma ha‸ hanˉ te leh, nawˬ hui hta‸ kʼoˆ piˇ taˍ peuˬ ve hkʼe hkʼa deh‸ te kʼai-o. Gʼuiˬsha lehˬ, hteˇ ve cawˇ ve chaw hpawˇ lo chehˇ piˇ-oˆ, teh‸ yawˇ hui hta‸ kʼoˆ piˇ ve yoˬ.

← Chapter 18 Jump to: Chapter 20 →