bible
ra
🌐 Language
English
Español
Français
Deutsch
Português
Italiano
Nederlands
Русский
中文
日本語
한국어
العربية
Türkçe
Tiếng Việt
ไทย
Indonesia
All Languages
Home
/
Lahu
/
Lahu Bible Edited © Thailand Bible Society and Bible Society of Myanmar, 2010, 2020.
/
2 Chronicles 20
2 Chronicles 20
Lahu Bible Edited © Thailand Bible Society and Bible Society of Myanmar, 2010, 2020.
← Chapter 19
Jump to:
Chapter 1
Chapter 2
Chapter 3
Chapter 4
Chapter 5
Chapter 6
Chapter 7
Chapter 8
Chapter 9
Chapter 10
Chapter 11
Chapter 12
Chapter 13
Chapter 14
Chapter 15
Chapter 16
Chapter 17
Chapter 18
Chapter 19
Chapter 20
Chapter 21
Chapter 22
Chapter 23
Chapter 24
Chapter 25
Chapter 26
Chapter 27
Chapter 28
Chapter 29
Chapter 30
Chapter 31
Chapter 32
Chapter 33
Chapter 34
Chapter 35
Chapter 36
Chapter 21 →
1
Oˇ ve hkʼaw‸ nawˉ, Mawˇbaˆ chaw, Aˍmonˍ chaw leh Muˇniˆ chaw teˇ hpaˍ pawnˇ da‸ leh Yuˇda‸ mvuhˇmiˬ hta‸ ca bawˆ la ve yoˬ.
2
Chaw teˇ hpaˍ hpaˍ jawˇmawˇ Yawˇshaˍhpaˆ geh gʼuiˇ laˬ leh, yawˇ hta‸ chi hkʼe ca kʼoˆ piˇ la ve yoˬ. Eˇdonˍ mvuhˇmiˬ hkʼaw chehˇ ve ma‸ moˍ lonˉ teˇ moˍ nawˬ hta‸ ca bawˆ la tuˬ, Suh ve laˇ tsuhˇ gʼuiˬ hpawˇ lo caw laˬ chehˇ taˍ ve yoˬ. Yawˇ hui lehˬ, Haˍzaˍzonˍtaˍmaˍ venˇ hta‸ bawˆ yuˬ gʼa taˍ peuˬ, teh‸ jawˇmawˇ hta‸ kʼoˆ piˇ ve yoˬ. (Venˇ oˇ ve hta‸ Enˍgaˍdiˆ venˇ teh‸ ka‸ kʼoˆ ve yoˬ)
3
Tawˇ oˇ ve hta‸ gʼa kaˇ ve teˇ yanˇ, Yawˇshaˍhpaˆ kawˆ jaˇ leh, Gʼuiˬsha geh bon lawˬve yoˬ. Oˇ ve hkʼaw‸ nawˉ, yawˇ lehˬ mvuhˇ yaˇ miˬ yaˇ hkʼa peu-eˬ caˇ tuˬ ce leh bon lawˬ tuˬ tawˇ piˇ ve yoˬ.
4
Yuˇda‸ mvuhˇmiˬ hkʼaw chehˇ ve chaw teˇ hpaˍ, Gʼuiˬsha hta‸ ca na nyi tuˬ Yeˍruˆsaˍlehnˍ venˇ lo hpawnˬ laˬ ve yoˬ.
5
Hkʼe te leh, yawˇ hui hkʼa peu-eˬ Gʼuiˬsha ve bon yehˬ lo kʼai ve yoˬ. Jawˇmawˇ Yawˇshaˍ hpaˆ yawˇ hui hkʼa peu-eˬ gʼuˇ suhˍ huˉ taˍ leh bon chi hkʼe lawˬ ve yoˬ.
6
Ngaˬ hui ve awˬ puˍ awˬ pi teˇ hpaˍ ve Gʼuiˬsha-oˬ, nawˬ lehˬ mvuhˇ naw ma hkʼoˆ chehˇ taˍ leh, miˬguiˬ chaw yaˇ hkʼa peu-eˬ ve hta‸ uˉ peunˍ chehˇ ve yoˬ. Nawˬ lehˬ, kanˇ paˆ uiˍ jaˇ leh, chaw teˇ gʼaˇ ka‸ nawˬ hta‸ tawˍ da‸ maˇ gʼa.
7
Nawˬ lehˬ, ngaˬ hui ve Gʼuiˬsha hpeh‸ ve yoˬ. Nawˬ ve Iˉsaˍreˍlaˆ chaw teˇ hpaˍ mvuhˇmiˬ chi ve hkʼaw lo‸ la ve teˇ yanˇ, choˬ kaˬ lo chehˇ taˍ ve chaw teˇ hpaˍ hta‸ gʼa‸ kʼoˬ piˇ leh, mvuhˇmiˬ chi ve nawˬ ve awˬ chawˇ Aˍbraˍhanˍ ve awˬ ceuˬ awˬ hkʼaˇ teˇ hpaˍ hta‸ co co taiˍ taiˍ piˇ taˍ peuˬ ve yoˬ.
8
Yawˇ hui choˬ kaˬ lo chehˇ taˍ leh, nawˬ hta‸ taˍ uiˍ taˍ mvuh ve hkʼaw, bon yehˬ lonˉ teˇ maˬ te teh taˍ ve yoˬ.
9
Ma‸ hpeh‸ la ve, naˬ beuˬ gaˬ ve leh meu‸ ve kaˆ ve awˬ ceuˬ chi teˇ hpaˍ hpeh‸ tawˆ la ve teˇ yanˇ, yawˇ hui nawˬ hta‸ oˉ kʼoˍ pui kuiˬ bon yehˬ chi ve lo laˬ hpeh‸ ve hta‸ yawˇ hui shiˍ taˍ ve yoˬ. Dawˇ haˍ ve awˬ yanˇ hkʼaw, yawˇ hui nawˬ geh bon lawˬ htaˇ, nawˬ yawˇ hui ve bon lawˬ hkawˇ hta‸ na yuˬ piˇ tuˬ ve hta‸ htawˇ, yawˇ hui shiˍ taˍ ve yoˬ.
10
Chi beu‸ Aˍmonˍ chaw, Mawˇbaˆ chaw leh Eˇdonˍ chaw chi teˇ hpaˍ ngaˬ hui hta‸ ca bawˆ la chehˇ ve yoˬ. Ngaˬ hui ve awˬ puˍ awˬ pi teˇ hpaˍ Eˇjiˇtu‸ mvuhˇmiˬ hkʼaw tawˆ la chehˇ ve teˇ yanˇ, nawˬ yawˇ hui hta‸ chaw oˇ ve teˇ hpaˍ ve mvuhˇmiˬ hkʼaw maˇ hpanˍ kʼai tcuh. Yawˇ hui ve mvuhˇmiˬ hta‸ caw toˇ leh, yawˇ hui ve mvuhˇmiˬ hta‸ maˇ te luˬ piˇ.
11
Chi hta‸ pa taw, chi beu‸ yawˇ hui ngaˬ hui hta‸ kʼaw‸ te hkʼaw‸ laˇ tuˬ laˬ chehˇ ve yoˬ. Nawˬ ngaˬ hui hta‸ piˇ laˇ taˍ peuˬ ve mvuhˇmiˬ chi ve hkʼaw, ngaˬ hui hta‸ gʼa‸ kʼoˬ laˇ tuˬ yawˇ hui laˬ chehˇ ve yoˬ.
12
Nawˬ lehˬ, ngaˬ hui ve Gʼuiˬsha hpeh‸ ve yoˬ. Yawˇ hui hta‸ ciˍ yanˍ piˇ-oˆ. Awˬ lawn kʼo, ngaˬ hui lehˬ chaw chi teˇ hpaˍ hta‸ tawˍ da‸ tuˬ awˬ gʼaˇ maˇ cawˬ. Chi beu‸ ngaˬ hui hkʼaˬ hkʼe te cawˇ ve hta‸ htawˇ maˇ shiˍ. Ngaˬ hui nawˬ hta‸ chiˇ nyi chehˇ ve yoˬ, teh‸ kʼoˆ leh bon lawˬ ve yoˬ.
13
Yuˇda‸ chaw hkʼa peu-eˬ, a shu yawˇ ve miˇ yaˇ teˇ hpaˍ hta‸ shiˍ laˬ leh bon yehˬ gʼuˇ suhˍ lo huˉ taˍ ve yoˬ.
14
Oˇ htaˇ Gʼuiˬsha ve Awˬ ha hpu lehˬ, oˇ kaˬ lo huˉ chehˇ ve Leˍviˆ chaw teˇ gʼaˇ awˬ hkʼoˆ ya‸ la ve yoˬ. Chaw oˇ ve lehˬ, Zaˍhkaˍriˆ ve yaˇ Yaˍhaˍzeˍlaˆ hpeh‸ ve yoˬ. Yawˇ lehˬ, Beˍnaˍyaˆ, Yaˍyeˍlaˆ, Maˍtaˍniˆ leh Aˍsaˆ hui ve awˬ ceuˬ awˬ hkʼaˇ hpeh‸ ve yoˬ.
15
Hkʼe te leh Yeˍhaˍzeˍlaˆ kʼoˆ ve, Jawˇmawˇ leh Yuˇda‸ chaw teˇ hpaˍ-oˬ, chi beu‸ laˬ chehˇ ve ma‸ moˍ lonˉ hta‸ tawˍ da‸ tuˬ taˇ kawˆ. Chi ve lehˬ, nawˬ hui gʼa bawˆ da‸ tuˬ ve ma‸ moˍ lonˉ maˇ heˆ. Gʼuiˬsha bawˆ tuˬ ve ma‸ moˍ hpeh‸ ve yoˬ.
16
Shawˉ pawˍ yawˇ hui Ziˇzaˆ kʼaˍ le‸ hta‸ hpanˍ laˬ chehˇ htaˇ, nawˬ hui yawˇ hui hta‸ tawˍ da‸ tuˬ kʼai-o. Nawˬ hui yawˇ hui hta‸ Yeˍruˆsaˍlehnˍ venˇ lo kʼai ve lawˬ hkʼo‸ hkʼaw gʼa hpuˇ da‸ tuˬ yoˬ.
17
Ya‸ hkʼaˇ, nawˬ hui ma‸ gʼa bawˆ tuˬ ve maˇ heˆ. Chehˇ kuiˬ yuˬ leh law nyi taˍ ve tiˉ te-o. Gʼuiˬsha nawˬ hui hta‸ gʼaˇ shehˍ hpaˇ hpeh‸ la piˇ ve hta‸ nawˬ hui gʼa mawˬ tuˬ yoˬ, teh‸ yawˇ hui hta‸ kʼoˆ piˇ ve yoˬ.
18
Oˇ htaˇ, jawˇmawˇ Yawˇshaˍhpaˆ miˬ chaˇ hkʼoˆ boˆ sheˬ ve yoˬ. Chaw hkʼa peu-eˬ htawˇ miˬ chaˇ hkʼoˆ boˆ taˍ leh, Gʼuiˬsha hta‸ oˉ kʼoˍ pui ve yoˬ.
19
Leˍviˆ chaw Kawˇhaˆ leh Kawˇraˆ awˬ ceuˬ awˬ hkʼaˇ teˇ hpaˍ tu la leh, Iˉsaˍreˍlaˆ ve Gʼuiˬsha hta‸ chiˇ mvuh-o, teh‸ kʼoˆ ve yoˬ.
20
Shawˉ pawˍ mvuhˇ shawˉ teˇ na‸ Yuˇda‸ chaw teˇ hpaˍ Teˍkawˇ venˇ hpawˇ lo kʼai ve yoˬ. Yawˇ hui tawˆ kʼai-a teh‸ te chehˇ htaˇ, Yawˇshaˍhpaˆ yawˇ hui hta‸ chi hkʼe kʼoˆ piˇ ve yoˬ. Yuˇda‸ chaw teˇ hpaˍ-oˬ, nawˬ hui ve jawˇmawˇ Gʼuiˬsha hta‸ ceh tiˉgʼaˇ va-o. Oˇ hkʼe te ve kʼo, nawˬ hui huˉ yeˬ chehˇ tuˬ yoˬ. Yawˇ ve tcuh kaˍ paˍ kʼoˆ laˇ ve hta‸ nyi ma hkʼaw yonˍ taˍ-o‸. Nawˬ hui gʼaˇ shehˍ hpaˇ hpeh‸ la tuˬ yoˬ, teh‸ yawˇ hui hta‸ kʼoˆ piˇ ve yoˬ.
21
Yawˇ oˇ hkʼe kʼoˆ piˇ peuˬ hkʼaw‸ nawˉ, jawˇmawˇ lehˬ kʼa muiˬ hkawˇ kʼa shehˍ hpaˇ teˇ hpaˍ hta‸ da‸ kehˬ ve awˬ nyi htaˇ veu‸ deh ve veu‸ kʼaˇ veu‸ deh tcuh leh, ma‸ yaˇ teˇ hpaˍ gʼuˇ suhˍ peu kʼai tcuh ve yoˬ. Yawˇ hui kʼai chehˇ htaˇ, Gʼuiˬsha hta‸ chiˇ mvuh-o. Yawˇ ha‸ pehnˇ ve teˇ ceuˬ co co yeˬ chehˇ ve yoˬ, teh‸ kʼoˆ ve kʼa muiˬ hkawˇ kʼa kʼai ve yoˬ.
22
Yawˇ hui kʼa muiˬ hkawˇ oˇ ve hta‸ kʼa chehˇ ve teˇ yanˇ, Gʼuiˬsha lehˬ canˇ paˍ teˇ hpaˍ hta‸ kawˆ ve nyi ma cawˬ la piˇ ve yoˬ.
23
Hkʼe te leh, Aˍmonˍ chaw leh Mawˇbaˆ chaw hui lehˬ, Eˇdonˍ chaw hui hta‸ kʼaw‸ hpfuhˆ bawˆ leh, yawˇ hui hkʼa peu-eˬ hta‸ te luˬ te sheˆ piˇ ve yoˬ. Oˇ hkʼe te peuˬ hkʼaw‸ nawˉ, yawˇ hui hkʼaˇ yawˇ hui kʼaw‸ bawˆ pehˍ da‸ ve yoˬ.
24
Yuˇda‸ chaw teˇ hpaˍ lehˬ, heh puiˉ hkʼaw lo te taˍ ve ta‸ yehˬ lo gaˬ leh, canˇ paˍ teˇ hpaˍ chehˇ taˍ kuiˬ hpawˇ lo nyi peu ve teˇ yanˇ, yawˇ hui hkʼa peu-eˬ paˍ suh taˍ ve hta‸ gʼa mawˬ ve yoˬ.
25
Hkʼe te leh, Yawˇshaˍhpaˆ leh yawˇ ve ma‸ yaˇ teˇ hpaˍ, canˇ paˍ hui ve mawˇ ca gʼawˆ yuˬ tuˬ tawˆ kʼai ve yoˬ. Yawˇ hui lehˬ, canˇ paˍ hui ve ceˇ caˬ teˇ hpaˍ, caˇ tuˬ dawˬ tuˬ teˇ hpaˍ, veu‸ kʼaˇ teˇ hpaˍ, leh awˬ nu awˬ hpfuhˇ hkʼaˆ ve mawˇ teˇ hpaˍ gʼa maˇ jaˇ ve yoˬ. Yawˇ hui oˇ kaˬ lo shehˆ nyi chehˇ leh, mawˇ gʼawˆ hpoˆ chehˇ ve yoˬ. Ya‸ hkʼaˇ, mawˇ maˇ jaˇ ve pa taw, yawˇ hui mawˇ hkʼa peu-eˬ hta‸ yuˬ kʼo‸-e maˇ gʼa.
26
Awˇ nyi teˇ nyi gaˬ htaˇ, yawˇ hui Beˍraˍkaˍ lawˬ hkʼo‸ hkʼaw hpawnˬ da‸ leh, Gʼuiˬsha te laˇ ve awˬ bon hta‸ chiˇ uiˍ chiˇ mvuh piˇ ve yoˬ. Chi hta‸ pa taw, chehˇ kuiˬ oˇ ve hta‸ yawˇ hui Beˍraˍkaˍ teh‸ meh piˇ ve yoˬ.
27
Gʼuiˬsha lehˬ, canˇ paˍ hkʼa peu-eˬ ve hta‸ te luˬ te sheˆ piˇ peuˬ ve pa taw, Yawˇshaˍhpaˆ leh yawˇ ve ma‸ yaˇ hkʼa peu-eˬ ha lehˬ ha kʼa Yeˍruˆsaˍlehnˍ venˇ lo kʼaw‸ la ve yoˬ.
28
Yawˇ hui venˇ hkʼaw gaˬ la ve teˇ yanˇ, ha lehˬ ha kʼa tinˍ hteˆ, behˬ heh ma meuˆ leh Gʼuiˬsha ve bon yehˬ lo kʼai ve yoˬ.
29
Iˉsaˍreˍlaˆ chaw hui ve canˇ paˍ teˇ hpaˍ hta‸ Gʼuiˬsha hkʼaˬ hkʼe te ciˍ yanˍ piˇ ve awˬ lawn hta‸ gʼa shiˍ gʼa kaˇ ve chaw hkʼa peu-eˬ kawˆ jaˇ ve yoˬ.
30
Hkʼe te leh, Yawˇshaˍhpaˆ lehˬ Yeˍruˆsaˍlehnˍ venˇ hkʼaw gawˬ lehˍ uˉ peunˍ chehˇ ve yoˬ. Gʼuiˬsha lehˬ, yawˇ ve mvuhˇmiˬ hta‸ gawˬ la piˇ ve yoˬ.
31
Yawˇshaˍhpaˆ Yuˇda‸ jawˇmawˇ hpeh‸ la htaˇ, yawˇ ve a sha‸ 35 hkʼaw‸ gaˬ peuˬ leh, Yeˍruˆsaˍlehnˍ venˇ hta‸ 25 hkʼaw‸ uˉ peunˍ ve yoˬ. Yawˇ ve awˬ e lehˬ, Shiˉlaˍhiˆ ve awˬ yaˇ miˇ Aˍzuˇbaˆ hpeh‸ ve yoˬ.
32
Yawˇ ve awˬ paˍ Aˍsaˍ hkʼa shuˍ, yawˇ htawˇ Gʼuiˬsha nyi ma cawˇ ve kanˉ hta‸ tiˉ te ve yoˬ.
33
Ya‸ hkʼaˇ, buiˇshaˆaˉnaˆ chaw hui ve oˉ kʼoˍ pui kuiˬ teˇ hpaˍ hta‸ yawˇ maˇ te luˬ piˇ. Hkʼe te leh, chaw hkʼa peu-eˬ nyi ma awˬ tawˬ hkʼa gaˬ, Gʼuiˬsha geh maˇ kʼaw‸ hpfuhˆ kʼaw‸ la.
34
Yawˇshaˍhpaˆ hkʼa te ve kanˉ hkʼa peu-eˬ, Haˍnaˍniˆ ve yaˇ Yeˍhuˆ ve li‸ daw hkʼaw bvuh‸ keu taˍ ve yoˬ. Li‸ daw chi ve lehˬ, Iˉsaˍreˍlaˆ jawˇmawˇ teˇ hpaˍ ve li‸ daw hkʼaw ka‸ cawˬ taˍ ve yoˬ.
35
Teˇ pawˆ htaˇ, Yawˇshaˍhpaˆ lehˬ haiˬ ve kanˉ hta‸ te ve Iˉsaˍreˍlaˆ jawˇmawˇ Aˍhaˍziˆ hta‸ awˬ chawˇ ca te da‸ taˉ peuˬve yoˬ.
36
Yawˇ huiˉ maˬ Eˇzaˍyonˍgaˍbaˍ venˇ hkʼaw lo, haw lo‸ kʼoˍ lonˉ teˇ hpaˍ te taˍ ve yoˬ.
37
Ya‸ hkʼaˇ, Maˍreˍshaˆ venˇ hkʼaw chehˇ ve Dawˇbaˍvaˍ ve yaˇ Eˇlaˍsaˍ, Yawˇshaˍhpaˆ hta‸ chi hkʼe kʼoˆ piˇ ve yoˬ. Nawˬ lehˬ, Aˍhaˍziˆ hta‸ awˬ chawˇ ca te da‸ ve pa taw, nawˬ te taˍ ve haw lo‸ kʼoˍ teˇ hpaˍ hta‸ Gʼuiˬsha te luˬ te sheˆ tuˬ yoˬ, teh‸ yawˇ hta‸ kʼoˆ piˇ ve yoˬ. Hkʼe te leh, haw lo‸ kʼoˍ oˇ ve hkʼa peu-eˬ luˬ kʼai ve yoˬ.
← Chapter 19
Jump to:
Chapter 1
Chapter 2
Chapter 3
Chapter 4
Chapter 5
Chapter 6
Chapter 7
Chapter 8
Chapter 9
Chapter 10
Chapter 11
Chapter 12
Chapter 13
Chapter 14
Chapter 15
Chapter 16
Chapter 17
Chapter 18
Chapter 19
Chapter 20
Chapter 21
Chapter 22
Chapter 23
Chapter 24
Chapter 25
Chapter 26
Chapter 27
Chapter 28
Chapter 29
Chapter 30
Chapter 31
Chapter 32
Chapter 33
Chapter 34
Chapter 35
Chapter 36
Chapter 21 →
All chapters:
1
2
3
4
5
6
7
8
9
10
11
12
13
14
15
16
17
18
19
20
21
22
23
24
25
26
27
28
29
30
31
32
33
34
35
36