2 Chronicles 24

Lahu Bible Edited © Thailand Bible Society and Bible Society of Myanmar, 2010, 2020.

← Chapter 23 Jump to: Chapter 25 →

1Jawˇmawˇ Yawˇshaˆ Yuˇda‸ mvuhˇmiˬ hta‸ tanˬ u-peunˍ htaˇ, yawˇ ve a sha‸ 7 hkʼaw‸ tiˉ gaˬ sheˍ leh, Yeˍruˆsaˍlehnˍ venˇ hta‸ 40 hkʼaw‸ uˉ peunˍ ve yoˬ. Yawˇ ve awˬ e lehˬ, Beˍraˍ sheˍbaˆ venˇ yaˇ Ziˇbiˆ hpeh‸ ve yoˬ.

2Paw hkuˇ Yawˇyaˍdaˆ te‸ chehˇ ve teˇ co-e yawˇ lehˬ Gʼuiˬsha nyi ma cawˇ ve kanˉ hta‸ tiˉ te ve yoˬ.

3Yawˇyaˍdaˆ lehˬ, jawˇmawˇ Yawˇshaˆ hta‸ awˬ miˇ ma nyiˇ gʼaˇ ca piˇ ve yoˬ. Hkʼe te leh, yawˇ yaˇ paˍ yaˇ miˇ laiˉ gʼaˇ cawˬ la ve yoˬ.

4Yawˇ jawˇmawˇ hpeh‸ la peuˬ hkʼaw‸ nawˉ, Yawˇshaˆ lehˬ bon yehˬ hta‸ kʼaw‸ gu tuˬ dawˇ cheˆ ve yoˬ.

5Hkʼe te leh, yawˇ lehˬ paw hkuˇ leh Leˍ viˆ chaw teˇ hpaˍ hta‸ Yuˇda‸ mvuhˇmiˬ hkʼaˬ ti chi ti lo kʼai tcuh leh, bon yehˬ kʼaw‸ gu tuˬ hpu tanˇ ca shaw tcuh ve yoˬ. Kanˉ chi hta‸ haˆ haˆ te tuˬ yawˇ hui hta‸ kʼoˆ piˇ ve yoˬ. Ya‸ hkʼaˇ, yawˇ hui haˆ haˆ maˇ te.

6Hkʼe te leh, yawˇ paw hkuˇ lonˉ Yawˇyaˍdaˆ hta‸ kuˬ yuˬ leh, Aˬ hto‸ ma pa taw Gʼuiˬsha ve awˬ ceˬ Moˉseˍ kʼoˆ taˍ ve hkʼe, bon yehˬ awˬ pon loˍ ve hpu tanˇ ca shaw tuˬ, ya‸ nyi hkʼa gaˬ Leˍviˆ chaw hui hta‸ maˇ kʼai tcuh sheˍ ve le, teh‸ yawˇ hta‸ kʼoˆ piˇ ve yoˬ.

7(Jawˇmawˇ ma Aˍtaˍliˆ ve chaw teˇ hpaˍ lehˬ, bon yehˬ hta‸ te luˬ leh, bon yehˬ hkʼaw cawˬ ve mawˇ teˇ hpaˍ Baˍlaˆ gʼuiˬsha hta‸ oˉ kʼoˍ pui kuiˬ lo yuˬ yehˇ ve yoˬ.)

8Jawˇmawˇ lehˬ, Leˍviˆ chaw teˇ hpaˍ hta‸ ta kʼoˍ teˇ maˬ te tcuh leh, bon yehˬ taˍ meu‸ hpe‸ lo teh taˍ tcuh ve yoˬ.

9Aˬ sho-eˬ htaˇ Gʼuiˬsha ve awˬ ceˬ Moˉseˍ heh puiˉ hkʼaw lo hpu tanˇ shaw jaw ve hkʼe, hpu tanˇ ca keu la tuˬ, Yuˇda‸ mvuhˇmiˬ hkʼaˬ ti chi ti lo awˬ lawn kaˇ feu piˇ ve yoˬ.

10Chi hkʼe te tuˬ chaw yaˇ teˇ hpaˍ nyi ma cawˇ leh, ta kʼoˍ oˇ ve hkʼaw hpu tanˇ ca keu la ve yoˬ.

11Teˇ nyi le le Leˍviˆ chaw teˇ hpaˍ hpu tanˇ ta kʼoˍ oˇ ve hta‸ hpu ha‸ shaˉ paˍ geh yuˬ kʼai piˇ ve yoˬ. Ta kʼoˍ oˇ ve biˇ la ve teˇ yanˇ, jawˇmawˇ ve ceˇ leˇ lonˉ leh paw hkuˇ lonˉ yawˇ huiˉ maˬ hkʼa deh‸ gʼaw nyi taˉ peuˬ hkʼaw‸ nawˉ, ta kʼoˍ oˇ ve hta‸ bon yehˬ taˍ meu‸ hpe‸ lo ca kʼaw‸ teh taˍ piˇ ve yoˬ. Hkʼe te leh, yawˇ hui hpu tanˇ maˇ maˇ gʼa ve yoˬ.

12Jawˇmawˇ leh Yawˇyaˍdaˆ yawˇ huiˉ maˬ hpu tanˇ oˇ ve hta‸ yuˬ leh, bon yehˬ kʼaw‸ gu chehˇ ve awˬ hoˉ hta‸ piˇ ve yoˬ. Yawˇ teˇ caˉ haˉ pui htawˆ paˍ, la‸shaˉmaˉ leh ca liˉ paˍ teˇ hpaˍ hta‸ gʼaˇ hpfuhˇ kʼaw‸ piˇ ve yoˬ.

13Kanˉ te paˍ hkʼa peu-eˬ awˬ gʼaˇ awˬ shaˉ yuˬ tawˆ leh kanˉ te ve yoˬ. Hkʼe te leh, bon yehˬ oˇ ve ponˬ laˬ htaˇ hkʼa shuˍ kʼaw‸ da‸ la ve yoˬ.

14Bon yehˬ hta‸ kʼaw‸ gu ve kanˉ peuˬ ve teˇ yanˇ, cawˬtaˍ sheˍ ve hpu, shi, teˇ hpaˍ yawˇ hui jawˇmawˇ leh Yawˇyaˍdaˆ hta‸ kʼaw‸ hkʼaw‸ piˇ ve yoˬ. Hkʼe te leh, yawˇ huiˉ maˬ bon yehˬ hkʼaw yehˇ loˍ ve mawˇ laiˉ ceuˬ kʼaw‸ te keu ve yoˬ. Yawˇyaˍdaˆ a sha‸ te‸ chehˇ sheˍ htaˇ, tuˉ tanˇ tuˬ teˇ hpaˍ bon yehˬ hkʼaw lo awˬ yanˇ cawˇ cawˇ tuˉ tanˇ piˇ chehˇ ve yoˬ.

15Yawˇyaˍdaˆ lehˬ, a sha‸ 130 hkʼaw‸ gaˬ leh suh-e ve yoˬ.

16Yawˇ lehˬ, Iˉsaˍreˍlaˆ chaw awˬ pon, Gʼuiˬsha awˬ pon leh bon yehˬ awˬ pon coˇ caˇ leh kanˉ te taˉ peuˬ ve pa taw, yawˇ hta‸ Daˍviˆ ve venˇ hkʼaw tuˍ piˇ ve yoˬ.

17Chi teˇ pawˆ Yawˇyaˍdaˆ suh peuˬ ve pa taw, Yuˇda‸ chaw awˬ hoˉ awˬ naˬ teˇ hpaˍ lehˬ, yawˇ hui ve tawˇ hta‸ na yuˬ tuˬ jawˇmawˇ Yawˇshaˆ hta‸ gʼaˇ hte‸ beˬ ve yoˬ.

18Hkʼe te leh, chaw yaˇ teˇ hpaˍ Gʼuiˬsha ve bon yehˬ hkʼaw lo bon maˇ ca kʼaw‸ lawˬ la ve yoˬ. Yawˇ hui Aˍsheˍraˆ gʼuiˬsha ma ve shaˉ ho‸ hta‸ kʼaw‸ te leh oˉ kʼoˍ pui ve yoˬ. Yawˇ hui chi hkʼe te ve pa taw, Gʼuiˬsha nyi ma zuhˆ ve awˬ ceuˬ Yuˇda‸ mvuhˇmiˬ leh Yeˍruˆsaˍlehnˍ venˇ awˬ hkʼoˆ gaˬ la ve yoˬ.

19Gʼuiˬsha lehˬ, chaw yaˇ teˇ hpaˍ yawˇ geh kʼaw‸ hpfuhˆ kʼaw‸ la tuˬ, tcuh kaˍ paˍ teˇ hpaˍ hta‸ hpehˇ peu leh shaˍ ti‸ ca piˇ tcuh ve yoˬ. Ya‸ hkʼaˇ, yawˇ hui maˇ na yuˬ.

20Oˇ htaˇ, Gʼuiˬsha ve Awˬ ha hpu paw hkuˇ Yawˇyaˍdaˆ ve yaˇ Zaˍhkaˍriˆ awˬ hkʼoˆ ya‸ la ve yoˬ. Hkʼe te leh, yawˇ lehˬ chaw yaˇ teˇ hpaˍ mawˬ hpeh‸ ve chehˇ kuiˬ lo huˉ taˍ leh chi hkʼe kʼoˆ ve yoˬ. Aˬ hto‸ ma pa taw, nawˬ hui Gʼuiˬsha ve tawˇ hta‸ maˇ na yuˬ leh, luˬ suh sheˆ suh gaˇ ve le. Nawˬ hui yawˇ hta‸ baˬ taˉ ve pa taw, yawˇ htawˇ nawˬ hui hta‸ baˬ taˉ peuˬ, teh‸ kʼoˆ ve yoˬ.

21Jawˇmawˇ Yawˇshaˆ lehˬ, Zaˍhkaˍriˆ hta‸ beu‸ jaˇ leh, bon yehˬ hkʼaw lo yawˇ hta‸ haˉ pui baˬ pehˍ tcuh ve yoˬ.

22Jawˇmawˇ lehˬ, Zaˍhkaˍriˆ ve awˬ pa Yawˇyaˍdaˆ yawˇ hta‸ hkʼaˬ ma ga piˇ taˍ peuˬ ve hta‸ leunˇ kʼai leh, yawˇ ve yaˇ hta‸ tiˇ pehˍ piˇ ve yoˬ. Zaˍhkaˍriˆ suh la paˇ neˇ htaˇ, Nawˬ te chehˇ ve kanˉ hta‸ Gʼuiˬsha mawˬ leh, nawˬ hta‸ ciˍ yanˍ laˇ piˇ-oˆ, teh‸ kʼoˆ ve yoˬ.

23Oˇ ve hkʼaw‸ nawˉ, mvuhˇ kaˆ yanˇ gaˬ la htaˇ, Suˇriˆ chaw teˇ hpaˍ Yuˇda‸ mvuhˇmiˬ hta‸ ca bawˆ la leh, Yuˇda‸ chaw awˬ hoˉ awˬ naˬ hkʼa peu-eˬ ve hta‸ tiˇ pehˍ piˇ ve yoˬ. Venˇ hkʼaw cawˬ ve hpu shi mawˇ jeˬ teˇ hpaˍ hta‸ Daˍmaˍsehˆ venˇ lo yuˬ kʼo‸-e ve yoˬ.

24Suˇriˆ ma‸ yaˇ teˇ hpaˍ lehˬ, maˇ jaˇ ve maˇ heˆ. Ya‸ hkʼaˇ, Yuˇda‸ chaw teˇ hpaˍ Gʼuiˬsha hta‸ baˬ taˉ ve pa taw, yawˇ hui hta‸ shonˇ kʼai piˇ lawˬ ve yoˬ. Hkʼe te leh, jawˇmawˇ Yawˇshaˆ lehˬ Gʼuiˬsha ciˍ yanˍ ve hta‸ gʼa hkanˍ ve yoˬ.

25Bawˆ da‸ kuiˬ lo, yawˇ htawˇ hkaˆ ce heuˆ leh gʼa hkanˍ jaˇ ve yoˬ. Canˇ paˍ teˇ hpaˍ kʼaw‸ hpfuhˆ kʼo‸-e chehˇ ve teˇ yanˇ, yawˇ ve ma‸ poˍ lonˉ nyiˇ gʼaˇ yawˇ hta‸ kʼaw‸ hpfuhˆ leh, yawˇ paw hkuˇ Yawˇyaˍdaˆ ve yaˇ paˍ hta‸ tiˇ pehˍ piˇ taˍ ve awˬ tan, yawˇ hta‸ kʼaw‸ tiˇ pehˍ piˇ ve yoˬ. Hkʼe te leh, shu yawˇ hta‸ Daˍviˆ ve venˇ hkʼaw tuˍ piˇ ve yoˬ. Ya‸ hkʼaˇ, jawˇmawˇ teˇ hpaˍ tuˍ kuiˬ lo shu yawˇ hta‸ maˇ tuˍ piˇ.

26(Yawˇ hta‸ kʼaw‸ hpfuhˆ ve chaw teˇ hpaˍ lehˬ, Aˍmawˇniˆ yaˇ miˇ Sheˍmiˆ ve yaˇ Zaˍbaˆ leh, Mawˇbaˆ yaˇ miˇ Shiˇmaˍriˆ ve yaˇ Yeˍhawˉzaˍbaˆ hui hpeh‸ ve yoˬ.)

27Yawˇshaˆ ve yaˇ teˇ hpaˍ awˬ lawn, tcuh kaˍ paˍ teˇ hpaˍ yawˇ hta‸ kʼoˆ piˇ ve tawˇ teˇ hpaˍ, leh yawˇ bon yehˬ hta‸ hkʼaˬ hkʼe kʼaw‸ gu te ve awˬ lawn chi teˇ hpaˍ, jawˇmawˇ teˇ hpaˍ ve li‸ daw hkʼaw bvuh‸ keu taˍ ve yoˬ. Hkʼe te leh, yawˇ ve yaˇ Aˍmaˍziˆ yawˇ awˬ tan jawˇmawˇ kʼaw‸ te ve yoˬ.

← Chapter 23 Jump to: Chapter 25 →