2 Chronicles 34

Lahu Bible Edited © Thailand Bible Society and Bible Society of Myanmar, 2010, 2020.

← Chapter 33 Jump to: Chapter 35 →

1Yawˇshiˆ Yuˇda‸ mvuhˇmiˬ hta‸ tanˬ uˉ peunˍ htaˇ, yawˇ ve a sha‸ 8 hkʼaw‸ gaˬ peuˬ leh, Yeˍruˆsaˍlehnˍ venˇ hta‸ 31 hkʼaw‸ uˉ peunˍ ve yoˬ.

2Yawˇ lehˬ, Gʼuiˬsha nyi ma cawˇ ve kanˉ hta‸ tiˉ te ve yoˬ. Yawˇ ve awˬ puˍ lonˉ Daˍviˆ hkʼa shuˍ, yawˇ lehˬ Gʼuiˬsha ve awˬliˇtawˇhkawˇ hkʼa peu-eˬ ve hta‸ hkʼa deh‸ na yuˬ ve yoˬ.

3Yawˇshiˆ uˉ peunˍ chehˇ ve 8 hkʼaw‸ teˇ hkʼaw‸ gaˬ htaˇ, yawˇ a sha‸ i chehˇ sheˍ ve htawˇ, yawˇ ve awˬ puˍ lonˉ Daˍviˆ ve Gʼuiˬsha hta‸ yawˇ oˉ kʼoˍ tanˬ pui ve yoˬ. Oˇ ve hkʼaw‸ nawˉ, 4 hkʼaw‸ gaˬ htaˇ, yawˇ lehˬ awˬ nu ve tuˉ tanˇ kuiˬ teˇ hpaˍ leh, Aˍsheˍraˆ gʼuiˬsha ma ve shaˉ ho‸ teˇ hpaˍ hta‸ te luˬ piˇ ve yoˬ.

4Yawˇ tawˇ piˇ ve hkʼe chaw yaˇ teˇ hpaˍ lehˬ, Baˍlaˆ gʼuiˬsha hta‸ tuˉ tanˇ kuiˬ teˇ hpaˍ, leh sha hawnˉ tuˉ tanˇ kuiˬ teˇ hpaˍ hta‸ te luˬ piˇ ve yoˬ. Yawˇ hui lehˬ, Aˍsheˍraˆ gʼuiˬsha ma ve shaˉ ho‸ leh awˬ nu ve shaˉ ho‸ hkʼa peu-eˬ hta‸ teˍ meu-e leh, shaˉ ho‸ oˇ ve teˇ hpaˍ hta‸ oˉ kʼoˍ pui ve chaw hui ve tuˍ hpfuh hkʼoˆ hkaˆ sheˍ piˇ ve yoˬ.

5Yawˇ hui ve paw hkuˇ teˇ hpaˍ ve awˬ mu‸ ku hta‸ yuˬ leh, yawˇ hui ve tuˉ tanˇ kuiˬ hkʼoˆ lo tuˉ baˬ piˇ ve yoˬ. Yawˇ chi hkʼe te ve hkʼaw, Yuˇda‸ mvuhˇmiˬ leh Yeˍruˆsaˍlehnˍ venˇ hta‸ kʼaw‸ da‸ kehˬ la piˇ ve yoˬ.

6Maˍnaˍseˍ mvuhˇmiˬ, Eˇhpaˍrenˍ mvuhˇmiˬ, Suˉmonˍ mvuhˇmiˬ leh Naˍtaˍliˆ mvuhˇmiˬ chi teˇ hpaˍ hkʼaw lo htawˇ, yawˇ oˇ hkʼe ca te piˇ ve yoˬ.

7Yawˇ lehˬ, Iˉsaˍreˍlaˆ mvuhˇmiˬ hkʼaˬ ti chi ti lo htawˇ kʼai leh, Aˍsheˍraˆ gʼuiˬsha ma ve shaˉ ho‸ teˇ hpaˍ, leh sha hawnˉ tuˉ tanˇ kuiˬ teˇ hpaˍ hta‸ dawˆ paˆ piˇ ve yoˬ. Oˇ hkʼe ca te taˉ peuˬ hkʼaw‸ nawˉ, Yeˍruˆsaˍlehnˍ venˇ lo kʼaw‸ la ve yoˬ.

8Jawˇmawˇ Yawˇshiˆ mvuhˇmiˬ hkʼaw da‸ tuˬ kehˬ tuˬ te peuˬ leh, yawˇ jawˇmawˇ te ve 8 hkʼaw‸ teˇ hkʼaw‸ gaˬ htaˇ, yawˇ lehˬ Gʼuiˬsha ve bon yehˬ hta‸ kʼaw‸ gu te tuˬ, Aˍzaˍliˆ ve yaˇ Shaˍhpanˍ, Yeˍruˆsaˍlehnˍ venˇ hkʼaw ve awˬ hoˉ awˬ naˬ Maˍseˍyaˆ leh Yawˇhkaˆ ve yaˇ ma‸ poˍ lonˉ Yawˇaˍ hui hta‸ bon yehˬ lo kʼai tcuh ve yoˬ.

9Bon yehˬ hkʼaw lo Leˍviˆ chaw hui shaw gʼa taˍ ve hpu teˇ hpaˍ lehˬ, paw hkuˇ lonˉ Hiˇlaˍhkiˆ hta‸ chiˇ a‸ piˇ peuˬ ve yoˬ. (Hpu chi ve lehˬ, Eˇhpaˍrenˍ chaw, Maˍnaˍseˍ chaw, Yuˇda‸ chaw, Beˍyaˍmenˍ chaw, Yeˍruˆsaˍlehnˍ venˇ yaˇ leh awˬ nu ve chaw teˇ hpaˍ geh shaw gʼa taˍ ve hpu hpeh‸ ve yoˬ.)

10Paw hkuˇ lonˉ lehˬ hpu chi teˇ hpaˍ hta‸ yuˬ leh, bon yehˬ kʼaw‸ gu tuˬ gaˬ la taˍ ve awˬ hoˉ awˬ naˬ oˇ ve shehˆ gʼaˇ hta‸ chiˇ a‸ piˇ ve yoˬ.

11Yawˇ hui lehˬ hpu oˇ ve hta‸ ha‸ yuˬ taˍ leh, bon yehˬ kʼaw‸ gu chehˇ ve la‸shaˉmaˉ teˇ hpaˍ, leh haˉ pui htawˆ paˍ teˇ hpaˍ hta‸ gʼaˇ hpfuhˇ piˇ leh, loˍ ve haˉ pui shiˍ leh suhˆ teˇ hpaˍ vuiˬ keu ve yoˬ.

12Kanˉ te paˍ oˇ ve teˇ hpaˍ lehˬ, hteˇ jaˇ cawˇ jaˇ ve yoˬ. Yawˇ hui hta‸ awˬ hoˉ te leh sheh kʼai piˇ chehˇ ve Leˍviˆ chaw teˇ hpaˍ lehˬ, Meˍraˍriˆ awˬ ceuˬ awˬ hkʼaˇ Yaˍhaˆ leh Awˇbaˍdiˆ, Kawˇhaˆ awˬ ceuˬ awˬ hkʼaˇ Zaˍhkaˍriˆ leh Meˍshuˆlanˍ hui hpeh‸ ve yoˬ. (Leˍviˆ chaw hkʼa peu-eˬ, kʼa muiˬ hkawˇ kʼa puiˉ ve yoˬ.)

13Awˬ nu ve Leˍviˆ chaw teˇ hpaˍ lehˬ, awˬ nu te tuˬ loˍ ve kanˉ teˇ hpaˍ hta‸ ga nyi piˇ leh, te taˍ ve kanˉ teˇ hpaˍ hta‸ caˇ lanˇ yuˬ taˍ ve yoˬ. Yawˇ hui teˇ hpaˍ hpaˍ kanˉ te chehˇ ve chaw hui hta‸ shaw piˇ chehˇ ve yoˬ.

14Paw hkuˇ lonˉ Hiˇlaˍhkiˆ lehˬ, bon yehˬ hkʼaw teh taˍ ve hpu hta‸ yuˬ tawˆ ve teˇ yanˇ, Gʼuiˬsha Moˉseˍ hta‸ piˇ taˍ ve awˬliˇtawˇhkawˇ li‸ daw hta‸ gʼa mawˬ ve yoˬ.

15Hkʼe te leh yawˇ lehˬ, Awˬliˇtawˇhkawˇ li‸ daw hta‸ ngaˬ choˬ kaˬ bon yehˬ hkʼaw gʼa mawˬ ve yoˬ, teh‸ Shaˍhpanˍ hta‸ kʼoˆ piˇ leh, li‸ oˇ ve yawˇ hta‸ piˇ ve yoˬ.

16Shaˍhpanˍ lehˬ li‸ oˇ ve hta‸ jawˇmawˇ geh yuˬ kʼai leh kʼoˆ ve, Nawˬ kʼoˆ laˇ ve kanˉ hkʼa peu-eˬ ve hta‸ ngaˬ hui te taˍ peuˬ.

17Bon yehˬ hkʼaw ha‸shaˉ taˍ ve hpu hta‸ ngaˬ hui yuˬ tawˆ leh, kanˉ nyi shehˍ hpaˇ awˬ hoˉ teˇ hpaˍ hta‸ chiˇ a‸ piˇ peuˬ ve yoˬ.

18Choˬ kaˬ ngaˬ geh lo Hiˇlaˍhkiˆ piˇ laˇ ve li‸ teˇ daw cawˬ ve yoˬ, teh‸ jawˇmawˇ hta‸ kʼoˆ piˇ ve yoˬ. Hkʼe te leh, li‸ oˇ ve yawˇ jawˇmawˇ hta‸ gʼaw maˍ piˇ ve yoˬ.

19Jawˇmawˇ lehˬ, li‸ oˇ ve hkʼaw bvuh‸ taˍ ve awˬ lawn teˇ hpaˍ hta‸ gʼa kaˇ ve teˇ yanˇ, dawˇ haˍ jaˇ ve hkʼaw yawˇ ve veu‸ kʼaˇ hta‸ tzuh‸ suhˍ ve yoˬ.

20Hkʼe te leh, yawˇ hui Hiˇlaˍhkiˆ, Shaˍhpanˍ ve yaˇ Aˍhiˆkanˍ, Miˆhkaˍ ve yaˇ Aˍbaˍdonˍ, hawˉ yehˬ hkʼaw ve ceˇ leˇ lonˉ Shaˍhpanˍ, leh yawˇ ve awˬ ceˬ Aˍsaˍyaˆ hui hta‸ chi hkʼe kʼoˆ piˇ ve yoˬ.

21Ngaˬ awˬ tan leh cawˬ taˍ sheˍ ve Yuˇda‸ chaw, Iˉsaˍreˍlaˆ chaw teˇ hpaˍ awˬ tan, nawˬ hui Gʼuiˬsha hta‸ ca na nyi-o. Li‸ chi hkʼaw bvuh‸ taˍ ve awˬ lawn teˇ hpaˍ Gʼuiˬsha hta‸ ca na nyi-o. Ngaˬ hui ve awˬ puˍ awˬ pi teˇ hpaˍ lehˬ, Gʼuiˬsha ve tawˇ hta‸ maˇ na yuˬ leh li‸ daw chi ve hkʼaw kʼoˆ taˍ ve hkʼe maˇ te ve pa taw, Gʼuiˬsha ngaˬ hui hta‸ nyi ma zuhˆ chehˇ ve yoˬ, teh‸ yawˇ hui hta‸ kʼoˆ piˇ ve yoˬ.

22Jawˇmawˇ tawˇ piˇ ve hkʼe, Hiˇlaˍhkiˆ leh chaw oˇ ve teˇ hpaˍ lehˬ, Yeˍruˆsaˍlehnˍ venˇ hkʼaw chehˇ ve tcuh kaˍ ma Huˇlaˍdaˆ geh kʼai ve yoˬ. (Yawˇ ve awˬ hpawˇ lehˬ, Haˍraˍhaˆ ve awˬ hawehˍ, Tiˉkaˍvaˍ ve yaˇ Shaˍlunˍ hpeh‸ leh, yawˇ lehˬ bon yehˬ hkʼaw teh taˍ ve veu‸ kʼaˇ teˇ hpaˍ hta‸ ha‸ shaˉ shehˍ hpaˇ hpeh‸ ve yoˬ.) Hpeh‸ la peuˬ ve awˬ ceuˬ hkʼa peu-eˬ, yawˇ hui tcuh kaˍ ma oˇ ve hta‸ hto piˇ ve yoˬ.

23Hkʼe te leh, yaˇ miˇ oˇ ve lehˬ Gʼuiˬsha ve tawˇ chi teˇ hpaˍ jawˇmawˇ hta‸ ca kʼaw‸ kʼoˆ piˇ tcuh ve yoˬ.

24Li‸ daw chi hkʼaw jawˇmawˇ gʼa gʼaw taˍ peuˬ ve hkʼe, ngaˬ lehˬ Yeˍruˆsaˍlehnˍ venˇ yaˇ hkʼa peu-eˬ ve hta‸ ciˍ yanˍ piˇ tuˬ yoˬ.

25Awˬ lawn kʼo, yawˇ hui ngaˬ hta‸ chiˇ baˬ peuˬ leh, awˬ nu ve gʼuiˬsha teˇ hpaˍ hta‸ tuˉ tanˇ piˇ chehˇ ve yoˬ. Chi hkʼe te ve lehˬ, yawˇ hui ngaˬ hta‸ nyi ma zuhˆ tuˬ te laˇ chehˇ ve yoˬ. Ngaˬ lehˬ Yeˍruˆsaˍlehnˍ venˇ hta‸ nyi ma zuhˆ jaˇ peuˬ. Ngaˬ nyi ma zuhˆ ve chi mehˉ kʼai tuˬ ve maˇ heˆ.

26Ya‸ hkʼaˇ, jawˇmawˇ hta‸ caˉ da‸ leh ngaˬ chi hkʼe kʼoˆ gaˇ ve yoˬ. Nawˬ lehˬ, li‸ daw oˇ ve hkʼaw bvuh‸ taˍ ve hkʼe hkʼa deh‸ na yuˬ chehˇ ve yoˬ.

27Nawˬ venˇbaˆ dawˇ hpfuhˆ leh, ngaˬ mehˆ gʼuˇ suhˍ nyi ma nehˬ lehˍ taˍ ve yoˬ. Yeˍruˆ saˍ lehnˍ venˇ hta‸ ngaˬ ciˍ yanˍ piˇ tuˬ ve awˬ hkawˇ hta‸ nawˬ gʼa kaˇ ve teˇ yanˇ, nawˬ ve veu‸ kʼaˇ hta‸ tzuh‸ suhˍ leh hawˬ chehˇ ve yoˬ. Nawˬ ve bon lawˬ hkawˇ hta‸ ngaˬ gʼa kaˇ peuˬ.

28Chi hta‸ pa taw, nawˬ a sha‸ te‸ chehˇ ve teˇ co-e, Yeˍruˆsaˍlehnˍ venˇ hta‸ ngaˬ maˇ ciˍ yanˍ piˇ sheˍ. Nawˬ lehˬ, gawˬ lehˍ ve hkʼaw gʼa suh-e tuˬ yoˬ, teh‸ Gʼuiˬsha kʼoˆ ve yoˬ. Hkʼe te leh, chaw oˇ ve teˇ hpaˍ lehˬ, Gʼuiˬsha kʼoˆ ve tawˇ chi teˇ hpaˍ jawˇmawˇ Yawˇshiˆ hta‸ ca kʼaw‸ kʼoˆ maˍ piˇ ve yoˬ.

29Jawˇmawˇ Yawˇshiˆ lehˬ, Yeˍruˆsaˍlehnˍ leh Yuˇda‸ mvuhˇmiˬ hkʼaw chehˇ ve awˬ hoˉ awˬ naˬ teˇ hpaˍ hta‸ kuˬ hpawnˬ ve yoˬ.

30Oˇ htaˇ, jawˇmawˇ lehˬ paw hkuˇ teˇ hpaˍ, Leˍviˆ chaw teˇ hpaˍ leh awˬ nu ve chaw hkʼa peu-eˬ hta‸ bon yehˬ hkʼaw shiˍ kʼai leh, bon yehˬ hkʼaw ca mawˬ taˍ ve li‸ daw oˇ ve teˇ daw hkʼa peu-eˬ ve yawˇ hui hta‸ gʼaw maˍ piˇ ve yoˬ.

31Yawˇ lehˬ, yehˬ hkuiˉ daw paˇ lo huˉ taˍ leh, Gʼuiˬsha ve awˬliˇtawˇhkawˇ oˇ ve hkʼa peu-eˬ hta‸ nyi ma awˬ tawˬ hkʼa gaˬ hkʼa deh‸ na yuˬ leh te tuˬ, Gʼuiˬsha hta‸ ka ti‸ shaˉ caˆ te ve yoˬ.

32Yawˇ lehˬ, Beˍyaˍmenˍ chaw leh, oˇ kaˬ lo hkʼa hpawnˬ laˬ ve chaw hkʼa peu-eˬ hta‸ htawˇ, oˇ hkʼe ka ti‸ shaˉ caˆ te tcuh ve yoˬ. Hkʼe te leh, Yeˍruˆsaˍlehnˍ venˇ yaˇ teˇ hpaˍ lehˬ, Gʼuiˬsha hta‸ ka ti‸ te taˍ peuˬ ve hkʼe, hkʼa deh‸ na yuˬ leh te ve yoˬ.

33Jawˇmawˇ Yawˇshiˆ lehˬ, yawˇ ve mvuhˇmiˬ hkʼaw cawˬ ve awˬ nu ve shaˉ ho‸ hkʼa peu-eˬ ve hta‸ te luˬ te sheˆ piˇ ve yoˬ. Yawˇ a sha‸ te‸ chehˇ ve teˇ co-e, yawˇ lehˬ chaw yaˇ teˇ hpaˍ hta‸ Gʼuiˬsha a loˍ cawˇ ve kanˉ hta‸ tiˉ te tcuh ve yoˬ.

← Chapter 33 Jump to: Chapter 35 →