2 Chronicles 6

Lahu Bible Edited © Thailand Bible Society and Bible Society of Myanmar, 2010, 2020.

1Oˇ htaˇ Sawˉla‸monˍ bon lawˬ leh kʼoˆ ve, Gʼuiˬsha-oˬ, nawˬ lehˬ moˬ leh naˆ ho‸ve hkʼaw chehˇ tuˬ leuˆ yuˬ taˍ peuˬ ve yoˬ.

2Chi beu‸ ngaˬ lehˬ, nawˬ co co taiˍ taiˍ chehˇ tuˬ ve awˬ pon, awˬ me‸ awˬ hponˇ cawˬ ve bon yehˬ teˇ maˬ te taˍ peuˬ, teh‸ kʼoˆ ve yoˬ.

3Iˉsaˍreˍlaˆ chaw hkʼa peu-eˬ oˇ kaˬ lo huˉ chehˇ taˍ ve yoˬ. Oˇ htaˇ, jawˇmawˇ yawˇ hui hpawˇ lo hpfuhˆ leh, yawˇ hui hta‸ bon na‸ piˇ ve yoˬ.

4Peuˬ hkʼaw‸ nawˉ yawˇ kʼoˆ ve, Iˉsaˍreˍlaˆ ve Gʼuiˬsha hta‸ chiˇ mvuh-o. Yawˇ lehˬ, ngaˬ pa Daˍviˆ hta‸ chi hkʼe kʼoˆ piˇ taˍ peuˬ ve yoˬ.

5Ngaˬ ve chaw teˇ hpaˍ hta‸ Eˇjiˇtu‸ mvuhˇmiˬ hkʼaw shiˍ tawˆ la piˇ ve teˇ nyi hta‸ te leh ya‸ nyi hkʼa gaˬ, Iˉsaˍreˍlaˆ mvuhˇmiˬ hkʼaw cawˬ ve venˇ hkʼaˬ ve teˇ venˇ hkʼaw maˇ kʼoˆ, ngaˬ hta‸ oˉ kʼoˍ pui kuiˬ bon yehˬ teˇ pawˆ ka‸ maˇ te tcuh jaw sheˍ. Ngaˬ ve chaw chi teˇ hpaˍ hta‸ awˬ hoˉ te leh shiˍ kʼai piˇ tuˬ ve chaw teˇ gʼaˇ hta‸ htawˇ, ngaˬ maˇ leuˆ yuˬ jaw sheˍ.

6Ya‸ hkʼaˇ, ngaˬ hta‸ oˉ kʼoˍ pui kuiˬ Yeˍruˆsaˍlehnˍ venˇ hta‸ chi beu‸ ngaˬ leuˆ yuˬ taˍ peuˬ leh, ngaˬ ve chaw chi teˇ hpaˍ hta‸ awˬ hoˉ te leh shiˍ kʼai piˇ tuˬ, ngaˬ nawˬ hta‸ leuˆ yuˬ taˍ peuˬ ve yoˬ, teh‸ Gʼuiˬsha ngaˬ pa Daˍviˆ hta‸ kʼoˆ piˇ taˍ peuˬ ve yoˬ.

7Ngaˬ pa Daˍviˆ lehˬ, Gʼuiˬsha hta‸ oˉ kʼoˍ pui kuiˬ bon yehˬ teˇ maˬ te tuˬ dawˇ nyi jaw ve yoˬ.

8Ya‸ hkʼaˇ, Gʼuiˬsha yawˇ hta‸ chi hkʼe kʼoˆ piˇ ve yoˬ. Nawˬ chi hkʼe te gaˇ ve nyi ma cawˬ ve lehˬ da‸ jaˇ ve yoˬ.

9Ya‸ hkʼaˇ, nawˬ maˇ gʼa te. Ngaˬ ve bon yehˬ hta‸ gʼa te tuˬ ve teˇ gʼaˇ lehˬ, nawˬ ve yaˇ paˍ yoˬ, teh‸ yawˇ hta‸ kʼoˆ piˇ ve yoˬ.

10Gʼuiˬsha lehˬ, yawˇ kʼoˆ taˍ ve hkʼe hpeh‸ la piˇ lawˬ ve yoˬ. Ngaˬ lehˬ, ngaˬ pa awˬ tan jawˇmawˇ kʼaw‸ te leh, Gʼuiˬsha hta‸ oˉ kʼoˍ pui kuiˬ bon yehˬ teˇ maˬ hta‸ te taˍ peuˬ.

11Gʼuiˬsha Iˉsaˍreˍlaˆ chaw hui hta‸ ka ti‸ shaˉ caˆ te piˇ taˍ ve haˉ pui baˉ nyiˇ maˬ keu taˍ ve ta kʼoˍ hta‸ htawˇ, ngaˬ bon yehˬ hkʼaw yuˬ keu taˍ peuˬ, teh‸ yawˇ hui hta‸ kʼoˆ piˇ ve yoˬ.

12Oˇ ve hkʼaw‸ nawˉ, Sawˉla‸monˍ lehˬ tuˉ tanˇ kuiˬ gʼuˇ suhˍ lo jiˆ kʼai ve yoˬ. Yawˇ la‸ sheh nyiˇ paˉ chiˇ leh, bon chi hkʼe lawˬ ve yoˬ.

13(Sawˉla‸monˍ lehˬ, kuiˇ yuˬ leh bon maˍ kuiˬ kʼaw jaw teˇ maˬ te leh, bawehˇ awˬ kʼaw ji teˇ hkʼaˇ lo teh taˍ ve yoˬ. Kʼaw jaw oˇ ve lehˬ, zuhˬ hpawˇ 5 shaw‸, kʼehˬ hpawˇ 5 shaw‸, leh mvuh hpawˇ 3 shaw‸ cawˬ ve yoˬ. Yawˇ lehˬ, kʼaw jaw chi hkʼoˆ taˆ-e leh, chaw hkʼa peu-eˬ yawˇ hta‸ mawˬ hpeh‸ ve chehˇ kuiˬ lo hkui tcuhˉ teh peuˬ hkʼaw‸ nawˉ, yawˇ ve la‸ sheh chiˇ leh bon lawˬ ve yoˬ.)

14Iˉsaˍreˍlaˆ ve Gʼuiˬsha-oˬ, mvuhˇ naw ma hkʼoˆ lo maˇ kʼoˆ, miˬguiˬ hkʼoˆ lo maˇ kʼoˆ, nawˬ hkʼe ve Gʼuiˬsha teˇ gʼaˇ ka‸ maˇ cawˬ. Nawˬ ve tawˇ hta‸ hkʼa deh‸ na yuˬ chehˇ ve nawˬ ve chaw teˇ hpaˍ hta‸ nawˬ ve ha‸ pehnˇ ve awˬ ceuˬ hpeu‸ maˍ piˇ leh, nawˬ yawˇ hui hta‸ te piˇ taˍ ve ka ti‸ hta‸ hkʼaˬ htaˆ ka‸ dawˇ nawˇ chehˇ ve yoˬ.

15Ngaˬ pa Daˍviˆ hta‸ nawˬ te piˇ taˍ ve ka ti‸ hta‸ hkʼaˬ htaˆ ka‸ dawˇ nawˇ chehˇ leh, ya‸ nyi nawˬ ve tawˇ oˇ ve hkʼa peu-eˬ biˇ la peuˬ ve yoˬ.

16Iˉsaˍreˍlaˆ ve Gʼuiˬsha-oˬ, ngaˬ pa Daˍviˆ hkʼa shuˍ nawˬ ve tawˇ hta‸ na yuˬ puiˉ ve yawˇ ve awˬ ceuˬ awˬ hkʼaˇ teˇ gʼaˇ peuˬ teˇ gʼaˇ hta‸ jawˇmawˇ te tcuh tuˬ, nawˬ kʼoˆ taˍ peuˬ ve tawˇ hta‸ a ciˉ dawˇ nawˇ taˍ laˇ tuˬ, chi beu‸ ngaˬ nawˬ hta‸ lawˬ hkawˉ ve yoˬ.

17Iˉsaˍreˍlaˆ ve Gʼuiˬsha-oˬ, nawˬ ve awˬ ceˬ ngaˬ pa Daˍviˆ hta‸ te piˇ taˍ ve ka ti‸ oˇ ve teˇ hpaˍ hta‸ a ciˉ biˇ la piˇ-oˆ.

18Ya‸ hkʼaˇ Gʼuiˬsha-oˬ, awˬ tehˬ awˬ na nawˬ miˬguiˬ hkʼoˆ lo chehˇ hpeh‸ ve laˇ. Mvuhˇ naw ma chi taw taw uiˍ jaˇ kʼehˬ jaˇ ve ka‸, nawˬ chehˇ maˇ law‸ sheˍ ve yoˬ. Hkʼaˬ hkʼe te leh, ngaˬ te taˍ ve bon yehˬ chi ve hkʼaw lo nawˬ chehˇ gʼa tuˬ ve le.

19Ngaˬ ve Gʼuiˬsha-oˬ, ngaˬ lehˬ nawˬ ve awˬ ceˬ paˍ hpeh‸ ve yoˬ. Ya‸ nyi ngaˬ ve bon lawˬ hkawˇ hta‸ na yuˬ leh, ngaˬ lawˬ ve hkʼe a ciˉ ga laˇ-oˆ.

20Nawˬ hta‸ oˉ kʼoˍ pui kuiˬ te taˍ ve bon yehˬ chi hta‸ teˇ nyi teˇ haˉ le a ciˉ nyi ha‸ shaˉ laˇ-oˆ. Bon yehˬ chi ve hpawˇ lo ngaˬ hpfuhˆ leh bon lawˬ chehˇ ve teˇ yanˇ, ngaˬ ve bon lawˬ hkawˇ hta‸ a ciˉ na yuˬ laˇ-oˆ.

21Bon yehˬ chi ve hpawˇ lo hpfuhˆ leh bon lawˬ chehˇ ve nawˬ ve chaw teˇ hpaˍ ve bon lawˬ hkawˇ hta‸ htawˇ, a ciˉ na yuˬ laˇ-oˆ. Mvuhˇ naw ma hkʼoˆ lo cawˬ ve nawˬ ve yehˬ hkʼaw chehˇ taˍ leh, ngaˬ hui ve bon lawˬ hkawˇ hta‸ na yuˬ leh, ngaˬ hui ve venˇbaˆ hta‸ a ciˉ hpehˇ laˇ-oˆ.

22Chaw teˇ gʼaˇ shu hta‸ te ya‸ ve pa taw, yawˇ hta‸ choˬ kaˬ nawˬ ve tuˉ tanˇ kuiˬ lo shiˍ laˬ leh, yawˇ te‸ chiˉvenˇbaˆ maˇ cawˬ teh‸ kʼoˆ ve kʼo,

23Gʼuiˬsha-oˬ, nawˬ ve awˬ ceˬ teˇ hpaˍ hta‸ suhˉ a ciˉ jehˬ laˇ-oˆ. Te ya‸ ve chaw teˇ gʼaˇ hta‸, yawˇ hta‸ keunˍ ve hkʼe ciˍ yanˍ piˇ leh, te‸ chiˉ venˇbaˆ maˇ cawˬ ve chaw teˇ gʼaˇ hta‸ ponˬ piˇ-oˆ.

24Nawˬ ve chaw teˇ hpaˍ nawˬ hta‸ te ya‸ ve pa taw, yawˇ hui canˇ paˍ ve la‸ sheh hkʼaw lo gʼa gaˬ peuˬ hkʼaw‸ nawˉ, venˇbaˆ dawˇ hpfuhˆ leh choˬ kaˬ nawˬ ve bon yehˬ hkʼaw laˬ ve teˇ yanˇ,

25yawˇ hui lawˬ hkawˉ ve awˬ hkawˇ hta‸ a ciˉ na yuˬ piˇ-oˆ. Yawˇ hui ve venˇbaˆ hta‸ hpehˇ piˇ leh, nawˬ yawˇ hui ve awˬ puˍ awˬ pi hui hta‸ piˇ taˍ ve mvuhˇmiˬ hkʼaw, yawˇ hui hta‸ kʼaw‸ shiˍ hkʼaw‸ veu laˇ piˇ-oˆ.

26Nawˬ ve chaw teˇ hpaˍ venˇbaˆ te ve pa taw, nawˬ yawˇ hui awˬ hkʼoˆ lo mvuhˇ yeˬ maˇ laˬ piˇ ve ka‸, yawˇ hui venˇbaˆ dawˇ hpfuhˆ ve hkʼaw, bon yehˬ chi ve hpawˇ hpfuhˆ leh lawˬ hkawˉ chehˇ ve kʼo, yawˇ hui lawˬ hkawˉ ve awˬ hkawˇ hta‸ a ciˉ na yuˬ piˇ-oˆ.

27Iˉsaˍreˍlaˆ chaw leh yawˇ hui ve jawˇmawˇ te ya‸ ve venˇbaˆ hta‸ a ciˉ hpehˇ piˇ-oˆ. Da‸ ve kanˉ hta‸ tiˉ te tuˬ, yawˇ hui hta‸ maˍ piˇ-oˆ. Oˇ hkʼe te peuˬ hkʼaw‸ nawˉ, nawˬ yawˇ hui hta‸ piˇ taˍ ve mvuhˇmiˬ chi awˬ hkʼoˆ lo mvuhˇ yeˬ kʼaw‸ laˬ piˇ-oˆ.

28Mvuhˇmiˬ hkʼaw meu‸ ve kaˆ ve, naˬ beuˬ gaˬ ve, mvuhˇ goˇ jaˇ leh caˬ luˬ ve, caˬ faˆ tawˆ ve, canˇ paˍ teˇ hpaˍ nawˬ ve chaw hta‸ ca bawˆ la ve, naˬ ve gawˬ ve, awˬ ceuˬ chi teˇ hpaˍ hpeh‸ la ve teˇ yanˇ, yawˇ hui ve bon lawˬ hkawˇ hta‸ a ciˉ na yuˬ piˇ-oˆ.

29Nawˬ ve Iˉsaˍreˍlaˆ chaw teˇ gʼaˇ gʼaˇ, dawˇ haˍ jaˇ ve pa taw bon yehˬ chi ve hpawˇ lo hpfuhˆ leh nawˬ geh bon lawˬ ve teˇ yanˇ, yawˇ ve bon lawˬ hkawˇ hta‸ a ciˉ na yuˬ piˇ-oˆ.

30Yawˇ hui ve venˇbaˆ hta‸ hpehˇ piˇ leh, yawˇ hui hta‸ a ciˉ ga piˇ-oˆ. Chaw yaˇ ve dawˇ hkʼaˇ hta‸ shiˍ shehˍ hpaˇ nawˬ teˇ gʼaˇ tiˉ cawˬ ve yoˬ.

31Ngaˬ hui ve awˬ puˍ awˬ pi hui hta‸ nawˬ piˇ taˍ ve mvuhˇmiˬ chi ve hkʼaw yawˇ hui chehˇ taˍ ve teˇ co-e, yawˇ hui nawˬ ve tawˇ hta‸ na yuˬ puiˉ tuˬ, yawˇ hui hta‸ keunˍ da‸ ve hkʼe a ciˉ ga piˇ-oˆ.

32Vuiˇ jaˇ ve mvuhˇmiˬ hkʼaw chehˇ ve buiˇshaˆaˉnaˆ chaw teˇ gʼaˇ gʼaˇ, nawˬ te taˍ peuˬ ve uiˍ jaˇ ve kanˉ teˇ hpaˍ awˬ lawn gʼa kaˇ leh, nawˬ hta‸ oˉ kʼoˍ pui tuˬ bon yehˬ chi ve hkʼaw lo‸ la ve teˇ yanˇ, yawˇ ve bon lawˬ hkawˇ hta‸ a ciˉ na yuˬ piˇ-oˆ.

33Nawˬ ve Iˉsaˍreˍlaˆ chaw teˇ hpaˍ nawˬ hta‸ oˉ kʼoˍ pui chehˇ ve hkʼe, miˬguiˬ chaw yaˇ hkʼa peu-eˬ nawˬ hta‸ shiˍ leh nawˬ ve tawˇ hta‸ na yuˬ puiˉ la tuˬ, yawˇ ve bon lawˬ hkawˇ hta‸ a ciˉ na yuˬ piˇ-oˆ. Oˇ hkʼe te ve kʼo, ngaˬ te taˍ ve bon yehˬ chi lehˬ, nawˬ hta‸ oˉ kʼoˍ pui kuiˬ hpeh‸ ve hta‸ yawˇ hui shiˍ la tuˬ yoˬ.

34Nawˬ ve chaw chi teˇ hpaˍ ma‸ gʼa ca bawˆ kʼai leh, yawˇ hui gaˬ ve chehˇ kuiˬ lo, ngaˬ te taˍ ve bon yehˬ chi ve hpawˇ hpfuhˆ leh nawˬ geh bon lawˬ ve teˇ yanˇ,

35yawˇ hui ve bon lawˬ hkawˇ hta‸ a ciˉ na yuˬ piˇ leh, yawˇ hui hta‸ ma‸ bawˆ gʼaˇ tcuh piˇ-oˆ.

36Nawˬ ve chaw teˇ hpaˍ venˇbaˆ te ve pa taw, canˇ paˍ teˇ hpaˍ ca bawˆ la leh, vuiˇ jaˇ ve mvuhˇmiˬ lo shiˍ kʼai piˇ ve hta‸ gʼa hkanˍ ve htawˇ, yawˇ hui ve bon lawˬ hkawˇ hta‸ a ciˉ na yuˬ piˇ-oˆ.

37Gʼuiˬsha-oˬ, yawˇ hui oˇ kaˬ lo venˇbaˆ dawˇ hpfuhˆ leh nawˬ hta‸ lawˬ hkawˉ ve kʼo, yawˇ hui ve bon lawˬ hkawˇ hta‸ a ciˉ na yuˬ piˇ-oˆ.

38Oˇ kaˬ lo yawˇ hui venˇbaˆ dawˇ hpfuhˆ leh, ngaˬ hui ve awˬ puˍ awˬ pi hui hta‸ nawˬ piˇ taˍ ve mvuhˇmiˬ chi ve leh, ngaˬ nawˬ awˬ pon te taˍ ve bon yehˬ chi hpawˇ hpfuhˆ leh bon lawˬ ve kʼo,

39yawˇ hui hta‸ ha kʼaˉ piˇ leh, yawˇ hui ve bon lawˬ hkawˇ hta‸ a ciˉ na yuˬ piˇ-oˆ.

40Ngaˬ ve Gʼuiˬsha-oˬ, chi beu‸ ngaˬ hui hta‸ nyi leh, choˬ kaˬ lo ngaˬ hui ve bon lawˬ hkawˇ hta‸ a ciˉ na yuˬ laˇ-oˆ.

41Jawˇmawˇ Gʼuiˬsha-oˬ, chi beu‸ tu la leh, nawˬ ve kanˇ paˆ hpeh‸ ve ka ti‸ shaˉ caˆ ta kʼoˍ geh teˇ geh, bon yehˬ chi hkʼaw lo‸ la leh, co co taiˍ taiˍ choˬ kaˬ lo chehˇ taˍ-o‸. Paw hkuˇ teˇ hpaˍ hkʼa te chehˇ ve kanˉ hkʼa peu-eˬ hta‸ awˬ bon na‸ piˇ leh, nawˬ ha kʼaˉ ve awˬ bon hta‸ pa taw nawˬ ve chaw hkʼa peu-eˬ ha lehˬ chehˇ piˇ-oˆ.

42Jawˇmawˇ Gʼuiˬsha-oˬ, nawˬ leuˆ yuˬ taˍ ve jawˇmawˇ hta‸ taˇ chiˇ baˬ laˇ-oˆ. Nawˬ ve awˬ ceˬ paˍ Daˍviˆ hta‸ nawˬ hkʼaˬ ma ha‸ ve hta‸ a ciˉ dawˇ nawˇ laˇ-oˆ, teh‸ kʼoˆ ve yoˬ.

← Chapter 5 Jump to: Chapter 7 →