2 Chronicles 29

Lahu Bible Edited © Thailand Bible Society and Bible Society of Myanmar, 2010, 2020.

1Heˍzaˍkiˆ Yuˇda‸ mvuhˇmiˬ hta‸ tanˬ uˉ peunˍ htaˇ, yawˇ ve a sha‸ 25 hkʼaw‸ gaˬ peuˬ leh, Yeˍruˆsaˍlehnˍ venˇ hta‸ 29 hkʼaw‸ uˉ peunˍ ve yoˬ. Yawˇ ve awˬ e lehˬ, Zaˍhkaˍriˆ yaˇ miˇ Aˍbiˇyaˆ hpeh‸ ve yoˬ.

2Yawˇ ve awˬ puˍ lonˉ Daˍviˆ hkʼa shuˍ, yawˇ htawˇ Gʼuiˬsha nyi ma cawˇ ve kanˉ hta‸ tiˉ te ve yoˬ.

3Heˍzaˍkiˆ jawˇmawˇ hpeh‸ la ve awˉ lawˉ peuˇ ve teˇ hkʼaw‸, awˬ hkuiˉ puiˍ teˇ ha pa htaˇ, yawˇ bon yehˬ ve taˍ meu‸ hpe‸ teˇ hpaˍ hta‸ hpaw leh, awˬ suhˉ kʼaw‸ gu te ve yoˬ.

4Yawˇ lehˬ paw hkuˇ leh Leˍviˆ chaw teˇ hpaˍ hta‸ bon yehˬ paˇ lo kuˬ hpawnˬ leh, yawˇ hui hta‸ chi hkʼe kʼoˆ piˇ ve yoˬ.

5Nawˬ hui Leˍviˆ chaw teˇ hpaˍ lehˬ, a shu yawˇ awˬ to hta‸ da‸ kehˬ tuˬ te leh, Gʼuiˬsha ve bon yehˬ hta‸ htawˇ da‸ kehˬ tuˬ te-o. Bon yehˬ hkʼaw cawˬ ve cha‸ chiˆ ve awˬ ceuˬ hkʼa peu-eˬ hta‸ yuˬ baˬ-o‸.

6Ngaˬ hui ve awˬ puˍ awˬ pi teˇ hpaˍ lehˬ, Gʼuiˬsha hta‸ ka ti‸ maˇ yeˬ leh, yawˇ nyi ma maˇ cawˇ ve kanˉ hta‸ tiˉ te ve yoˬ. Yawˇ hui Gʼuiˬsha hta‸ chiˇ baˬ leh bon yehˬ hta‸ htawˇ baˬ taˉ ve yoˬ.

7Yawˇ hui Gʼuiˬsha ve bon yehˬ hta‸ hoˆ baˬ taˉ ve yoˬ. Bon yehˬ hkʼaw kawˆ faiˇ maˇ tuˉ leh, sha hawnˉ ka‸ maˇ tuˉ tanˇ piˇ.

8Yawˇ hui oˇ hkʼe te ve pa taw, Gʼuiˬsha lehˬ Yuˇda‸ chaw hta‸ nyi ma zuhˆ leh, yawˇ hui hta‸ ciˍ yanˍ piˇ ve yoˬ. Awˬ lawn chi hta‸ hkʼa gʼa kaˇ ve chaw hkʼa peu-eˬ kawˆ jaˇ chehˇ ve hta‸ nawˬ hui htawˇ shiˍ taˍ ve yoˬ.

9Ngaˬ hui ve awˬ pa teˇ hpaˍ bawˆ da‸ kuiˬ lo suh-e leh, ngaˬ hui ve miˇ yaˇ teˇ hpaˍ shu hpeh kʼai ve hta‸ gʼa hkanˍ ve yoˬ.

10Iˉsaˍreˍlaˆ ve Gʼuiˬsha ngaˬ hui hta‸ nyi ma maˇ gʼa kʼaw‸ zuhˆ tuˬ, yawˇ hta‸ ka ti‸ te tuˬ ngaˬ chi beu‸ dawˇ cheˆ taˍ peuˬ.

11Ngaˬ ve yaˇ teˇ hpaˍ-oˬ, awˬ yanˇ hta‸ hkʼe leˇ taˇ ponˬ kʼai piˇ. Nawˬ hui lehˬ, Gʼuiˬsha hta‸ sha hawnˉ tuˉ tanˇ tuˬ leh, chaw yaˇ teˇ hpaˍ hta‸ bon lawˬ kuiˬ hkʼaw sheh kʼai piˇ tuˬ, Gʼuiˬsha leuˆ yuˬ taˍ ve chaw hpeh‸ ve yoˬ, teh‸ yawˇ hui hta‸ kʼoˆ piˇ ve yoˬ.

12Oˇ kaˬ lo hpawnˬ chehˇ taˍ ve Leˍviˆ chaw teˇ hpaˍ lehˬ, Kawˇhaˆ awˬ ceuˬ awˬ hkʼaˇ Aˍmaˍsehˇ ve yaˇ Maˍhaˆ, Aˍzaˍriˆ ve yaˇ Yawˇlaˆ, Meˍraˍriˆ awˬ ceuˬ awˬ hkʼaˇ Aˍbaˍdiˆ ve yaˇ Kiˇshaˆ, Yeˍhaˍleˍlaˆ ve yaˇ Aˍzaˍriˆ, Geˍraˍsonˍ awˬ ceuˬ awˬ hkʼaˇ Ziˇmaˆ ve yaˇ Yawˇaˍ, Yawˇaˍ ve yaˇ Eˍdenˍ, Eˇliˆzaˍhpanˍ awˬ ceuˬ awˬ hkʼaˇ Sheˍmaˍriˆ leh Yeˍreˍlaˆ, Aˍsaˆ awˬ ceuˬ awˬ hkʼaˇ Zaˍhkaˍriˆ leh Maˍtaˍniˆ, Heˍmanˍ awˬ ceuˬ awˬ hkʼaˇ Yeˍheˍlaˆ leh Sheˍmiˆ, Yeˍduˆtonˍ awˬ ceuˬ awˬ hkʼaˇ Sheˍmaˍyaˆ leh, Awˇzaˍlaˆ hui hpeh‸ ve yoˬ.

15Leˍviˆ chaw chi teˇ hpaˍ lehˬ, a shu yawˇ hta‸ caˉ da‸ ve chaw teˇ hpaˍ hta‸ kuˬ hpawnˬ leh da‸ tuˬ kehˬ tuˬ te ve yoˬ. Oˇ ve hkʼaw‸ nawˉ, jawˇmawˇ yawˇ hui hta‸ kʼoˆ piˇ taˍ ve hkʼe, Gʼuiˬsha ve bon yehˬ hta‸ da‸ kehˬ tuˬ te ve yoˬ.

16Paw hkuˇ teˇ hpaˍ htawˇ bon yehˬ hkʼaw lo‸-e leh, da‸ kehˬ tuˬ te ve yoˬ. Yawˇ hui lehˬ, bon yehˬ hkʼaw cawˬ ve maˇ da‸ maˇ kehˬ ve awˬ ceuˬ teˇ hpaˍ hta‸ bon yehˬ hkʼaw yuˬ baˬ ve yoˬ. Leˍviˆ chaw teˇ hpaˍ lehˬ, awˬ ceuˬ oˇ ve teˇ hpaˍ hta‸ Kiˇdronˍ lawˬ hkʼo‸ hkʼaw ca taˆ baˬ ve yoˬ.

17Yawˇ hui lehˬ, awˉ lawˉ peuˇ ve teˇ ha pa, awˉ lawˉ teˇ nyi htaˇ, kanˉ oˇ ve hta‸ tanˬ te ve yoˬ. Hiˉ nyi gaˬ htaˇ, yawˇ hui kanˉ hkʼa peu-eˬ ve hta‸ te peuˬ ve yoˬ. Oˇ ve hkʼaw‸ nawˉ, yawˇ hui kʼaw‸ caˉ leh hiˉ nyi hkʼa gaˬ, Gʼuiˬsha hta‸ oˉ kʼoˍ pui hpeh‸ tuˬ bon yehˬ hta‸ kʼaw‸ gu ve yoˬ.

18Oˇ ve hkʼaw‸ nawˉ, Leˍviˆ chaw teˇ hpaˍ lehˬ, jawˇmawˇ Heˍzaˍkiˆ hta‸ chi hkʼe awˬ lawn kaˇ piˇ ve yoˬ. Ngaˬ hui lehˬ, bon yehˬ hta‸ da‸ kehˬ piˇ taˍ peuˬ. Gʼuiˬsha hta‸ tuˉ tanˇ kuiˬ, hkaoˍmonˇ teh taˍ kuiˬ hpui lawˇ leh awˬ nu ve mawˇ teˇ hpaˍ hta‸ htawˇ da‸ kehˬ piˇ taˍ peuˬ.

19Chi hkʼoˆ ka‸, ponˬ laˬ htaˇ jawˇmawˇ Aˍhkaˆ yuˬ kʼai taˍ ve bon yehˬ hkʼaw ve mawˇ hkʼa peu-eˬ hta‸ htawˇ, ngaˬ hui kʼaw‸ ca hkʼaw‸ keu taˍ peuˬleh, da‸ kehˬ tuˬ te taˍ peuˬ. Mawˇ oˇ ve hkʼa peu-eˬ hta‸ tuˉ tanˇ kuiˬ gʼuˇ suhˍ lo teh taˍ ve yoˬ, teh‸ awˬ lawn kaˇ piˇ ve yoˬ.

20Oˇ htaˇ, jawˇmawˇ Heˍzaˍkiˆ lehˬ Yuˇda‸ chaw awˬ hoˉ awˬ naˬ teˇ hpaˍ hta‸ teˇ cawˬ haˉ kuˬ yuˬ leh, bon yehˬ lo kʼai ve yoˬ.

21Jawˇmawˇ ve yehˬ yaˇ kʼa yaˇ teˇ hpaˍ leh, Yuˇda‸ chaw teˇ hpaˍ lehˬ, bon yehˬ hta‸ da‸ piˇ kehˬ piˇ tuˬ awˬ pon yawˇ hui Gʼuiˬsha hta‸ tuˉ tanˇ piˇ tuˬ ve nuˇ paˍ lonˉ suhˍ hkeh, yawˬ paˍ lonˉ suhˍ hkeh, yawˬ ehˉ suhˍ hkeh, leh aˉ che‸ suhˍ hkeh hta‸ yuˬ kʼai ve yoˬ. Jawˇmawˇ lehˬ, to nuˇ to shaˆ oˇ ve teˇ hpaˍ hta‸ yuˬ leh Gʼuiˬsha hta‸ tuˉ tanˇ piˇ tuˬ, Aˍronˍ awˬ ceuˬ awˬ hkʼaˇ paw hkuˇ teˇ hpaˍ ve la‸ sheh hkʼaw chiˇ a‸ piˇ ve yoˬ.

22Paw hkuˇ teˇ hpaˍ lehˬ, nuˇ paˍ lonˉ suhˍ hkeh hta‸ awˉ lawˉ tiˇ pehˍ ve yoˬ. Oˇ ve hkʼaw‸ nawˉ, yawˬ paˍ lonˉ leh yawˬ ehˉ teˇ hpaˍ hta‸ tiˇ pehˍ leh, tuˉ tanˇ kuiˬ hta‸ awˬ suhˍ hpeh‸ pfuhˍ ve yoˬ.

23Oˇ hkʼe te peuˬ hkʼaw‸ nawˉ, yawˇ hui lehˬ aˉ che‸ oˇ ve teˇ hpaˍ hta‸ jawˇmawˇ leh oˇ kaˬ lo oˉ kʼoˍ ca pui la ve chaw hui geh sheh kʼai piˇ leh, yawˇ hui lehˬ aˉ che‸ oˇ ve teˇ hpaˍ awˬ hkʼoˆ lo a shu yawˇ ve la‸ sheh taˍ ve yoˬ.

24Peuˬ hkʼaw‸ nawˉ, paw hkuˇ teˇ hpaˍ lehˬ, aˉ che‸ oˇ ve teˇ hpaˍ hta‸ tiˇ pehˍ leh, chaw hkʼa peu-eˬ ve venˇbaˆ hta‸ yuˬ baˬ tuˬ, aˉ che‸ awˬ suhˍ hta‸ tuˉ tanˇ kuiˬ hkʼoˆ lo ngeuˍ pfuhˍ ve yoˬ. Awˬ lawn kʼo, jawˇmawˇ lehˬ Iˉsaˍreˍlaˆ chaw hkʼa peu-eˬ awˬ pon Gʼuiˬsha hta‸ tuˉ tanˇ piˇ tuˬ tawˇ piˇ taˍ ve pa taw yoˬ.

25Tcuh kaˍ paˍ Gaˆ leh tcuh kaˍ paˍ Naˍtanˍ hta‸ cuˇ leh, Gʼuiˬsha jawˇmawˇ Daˍviˆ hta‸ piˇ taˍ peuˬ ve tawˇ hkʼa peu-eˬ ve hta‸ jawˇmawˇ Heˍzaˍkiˆ hkʼa deh‸ na yuˬ ve yoˬ. Yawˇ lehˬ Leˍviˆ chaw hui hta‸ bon yehˬ hkʼaw chehˇ tcuh ve yoˬ.

26Jawˇmawˇ Daˍviˆ yehˇ jaw ve tinˍ teˇ hpaˍ, leh awˬ nu ve awˬ hkʼeun teˇ hpaˍ yawˇ hui hta‸ piˇ taˍ ve yoˬ. Paw hkuˇ teˇ hpaˍ htawˇ, behˬ heh ma yuˬ leh oˇ kaˬ lo huˉ taˍ ve yoˬ.

27Jawˇmawˇ Heˍzaˍkiˆ lehˬ, Gʼuiˬsha hta‸ tuˉ tanˇ piˇ tuˬ tawˇ piˇ ve yoˬ. Yawˇ hui tuˉ tanˇ piˇ chehˇ htaˇ, chaw yaˇ teˇ hpaˍ Gʼuiˬsha hta‸ chiˇ mvuh leh, kʼa muiˬ hkawˇ kʼa shehˍ hpaˇ teˇ hpaˍ tinˍ hteˆ, cehnˬ dawˆ leh behˬ heh ma meuˆ ve yoˬ.

28Oˇ kaˬ lo hkʼa hpawnˬ laˬ ve chaw hkʼa peu-eˬ Gʼuiˬsha hta‸ oˉ kʼoˍ pui leh, tuˉ tanˇ ve peuˬ htaˇ hkʼa gaˬ kʼa muiˬ chiˇ mvuh chehˇ ve yoˬ.

29Oˇ ve hkʼaw‸ nawˉ, jawˇmawˇ Heˍzaˍkiˆ leh chaw yaˇ hkʼa peu-eˬ hkui tcuhˉ teh leh, Gʼuiˬsha hta‸ oˉ kʼoˍ pui ve yoˬ.

30Jawˇmawˇ leh awˬ hoˉ awˬ naˬ teˇ hpaˍ lehˬ, Leˍviˆ chaw hui hta‸ jawˇmawˇ Daˍviˆ leh tcuh kaˍ paˍ Aˍsaˆ hui yuˬ tawˆ taˍ ve kʼa muiˬ hkawˇ kʼa tcuh ve yoˬ. Yawˇ hui hkui tcuhˉ teh leh, Gʼuiˬsha hta‸ oˉ kʼoˍ pui chehˇ htaˇ, ha lehˬ ha kʼa Gʼuiˬsha hta‸ chiˇ mvuh ve yoˬ.

31Oˇ ve hkʼaw‸ nawˉ Heˍzaˍkiˆ lehˬ, Chi beu‸ nawˬ hui da‸ kehˬ la peuˬ ve pa taw, Gʼuiˬsha hta‸ tuˉ tanˇ tuˬ ve awˬ ceuˬ teˇ hpaˍ yuˬ veu laˇ-oˆ, teh‸ oˇ kaˬ lo oˉ kʼoˍ pui chehˇ ve chaw hui hta‸ kʼoˆ piˇ ve yoˬ. Hkʼe te leh, yawˇ hui Gʼuiˬsha hta‸ tuˉ tanˇ piˇ tuˬ ve awˬ ceuˬ teˇ hpaˍ yuˬ laˬ ve yoˬ.

32Yawˇ hui nuˇ paˍ lonˉ 70 hkeh, yawˬ paˍ lonˉ 100 hkeh, yawˬ ehˉ 200 hkeh, Gʼuiˬsha hta‸ tuˉ tanˇ piˇ tuˬ yuˬ veu laˇ ve yoˬ.

33Chi hkʼoˆ ka‸, oˇ kaˬ lo yawˇ hui caˇ tuˬ ve nuˇ paˍ lonˉ 600 hkeh leh, yawˬ paˍ lonˉ 3,000 hkeh yuˬ veu laˇ ve yoˬ.

34Ceˇ chi ma ma ve hta‸ paw hkuˇ ceh tiˉ tiˇ pehˍ maˇ peuˬ ve pa taw, Leˍviˆ chaw hui htawˇ gʼa ga tiˇ pehˍ piˇ ve yoˬ. Oˇ ve hkʼaw‸ nawˉ, a shu yawˇ awˬ to hta‸ da‸ tuˬ kehˬ tuˬ te taˍ ve pawˇ hkuˇ kʼaw‸ cawˬ maˇ la ve yoˬ. (Leˍviˆ chaw teˇ hpaˍ lehˬ, paw hkuˇ teˇ hpaˍ a‸ kehˉ a shu yawˇ awˬ to hta‸ da‸ kehˬ tuˬ te taˍ ve chaw cawˬ maˇ la ve yoˬ.)

35Yawˇ hui Gʼuiˬsha hta‸ chi hkʼe tuˉ tanˇ piˇ ve awˬ hkʼoˆ, paw hkuˇ teˇ hpaˍ lehˬ chaw yaˇ teˇ hpaˍ tiˇ caˇ ve ceˇ teˇ hpaˍ ve awˬ chu hta‸ htawˇ yuˬ leh, a pehˉ meuˇ gʼuiˬ geh teˇ geh gʼa kʼaw‸ tuˉ tanˇ piˇ sheˍ ve yoˬ. Oˇ ve teˇ nyi hta‸ te leh, bon yehˬ hkʼaw oˉ kʼoˍ pui ve hta‸ kʼaw‸ tanˬ te ve yoˬ.

36Jawˇmawˇ Heˍzaˍkiˆ leh Yuˇda‸ chaw teˇ hpaˍ lehˬ, Gʼuiˬsha hta‸ oˉ kʼoˍ pui ve kanˉ hta‸ haˆ haˆ kʼaw‸ tanˬ te hpeh‸ ve pa taw, ha lehˬ jaˇ ve yoˬ.

← Chapter 28 Jump to: Chapter 30 →