2 Chronicles 18

Lahu Bible Edited © Thailand Bible Society and Bible Society of Myanmar, 2010, 2020.

← Chapter 17 Jump to: Chapter 19 →

1Yuˇda‸ jawˇmawˇ Yawˇshaˍhpaˆ lehˬ, paw sha la leh awˬ me‸ awˬ hponˇ cawˬ la ve teˇ yanˇ, yawˇ ve awˬ ceuˬ awˬ hkʼaˇ teˇ gʼaˇ leh, Iˉsaˍreˍlaˆ jawˇmawˇ Aˍhaˆ ve awˬ ceuˬ awˬ hkʼaˇ teˇ gʼaˇ hta‸ heuˆ da‸ piˇ tuˬ awˬ hkʼaˇ gu ve yoˬ.

2Oˇ ve hkʼaw‸ nawˉ, awˬ yanˇ maw la htaˇ, Yawˇshaˍhpaˆ lehˬ Aˍhaˆ geh ca guiˇ tuˬ Saˍmaˍriˆ venˇ lo kʼai ve yoˬ. Yawˇshaˍhpaˆ hta‸ taˍ uiˍ taˍ mvuh piˇ tuˬ Aˍhaˆ lehˬ, nuˇ leh yawˬ teˇ hpaˍ hta‸ tiˇ leh hti caˇ hti dawˬ ve pawehˇ lonˉ teˇ maˬ te ve yoˬ. Yawˇ lehˬ, Giˇlaˆ mvuhˇmiˬ hkʼaw cawˬ ve Raˍmoˆ venˇ hta‸ ca bawˆ yuˬ gaˇ ve pa taw, Yawˇshaˍhpaˆ hta‸ htawˇ yawˇ geh ma‸ ga bawˆ laˇ tuˬ lawˬ hkawˉ ve yoˬ.

3Oˇ hkʼe kʼoˆ peuˬ hkʼaw‸ nawˉ, yawˇ jawˇmawˇ Yawˇshaˍhpaˆ hpawˇ lo hpfuhˆ leh, Ngaˬ hui Raˍmoˆ venˇ hta‸ ca kʼaw‸ bawˆ yuˬ ve kʼo, nawˬ ka‸ ngaˬ hui geh kʼai tuˬ ve laˇ, teh‸ yawˇ hta‸ kʼoˆ piˇ ve yoˬ. Kʼai hpeh‸ ve yoˬ. Ngaˬ ve ma‸ yaˇ teˇ hpaˍ ka‸ kʼai hpeh‸ ve yoˬ.

4Ya‸ hkʼaˇ, ngaˬ hui Gʼuiˬsha hta‸ awˉ lawˉ na nyi cawˇ sheˍ ve yoˬ, teh‸ Yawˇshaˍhpaˆ kʼaw‸ yaw hkʼaw‸ piˇ ve yoˬ.

5Oˇ htaˇ, jawˇmawˇ Aˍhaˆ lehˬ, tcuh kaˍ paˍ 400 gʼaˇ hta‸ kuˬ yuˬ leh, Ngaˬ Raˍmoˆ venˇ hta‸ ca bawˆ yuˬ cawˇ laˇ, teh‸ yawˇ hui hta‸ na nyi ve yoˬ. Ca bawˆ-e loˬ. Venˇ oˇ ve Gʼuiˬsha nawˬ hta‸ chiˇ a‸ laˇ tuˬ yoˬ, teh‸ yawˇ hui Aˍhaˆ hta‸ kʼaw‸ yaw hkʼaw‸ piˇ ve yoˬ.

6Ya‸ hkʼaˇ, Yawˇshaˍhpaˆ lehˬ, Ngaˬ hui hta‸ Gʼuiˬsha ve tawˇ hto laˇ hpeh‸ ve awˬ nu ve tcuh kaˍ paˍ teˇ gʼaˇ gʼaˇ cawˬ she‸ laˇ, teh‸ Aˍhaˆ hta‸ na nyi ve yoˬ.

7Aˍhaˆ kʼoˆ ve, Yoˬ, Iˉmaˍlaˍ ve yaˇ Miˆhkaˍ teˇ gʼaˇ cawˬ sheˍ ve yoˬ. Ya‸ hkʼaˇ, ngaˬ yawˇ hta‸ nyi bawˬ jaˇ ve yoˬ. Awˬ lawn kʼo, yawˇ ngaˬ hta‸ da‸ ve tawˇ teˇ pawˆ ka‸ maˇ yaw laˇ jaw. Maˇ da‸ ve tawˇ tiˉ yaw laˇ ve yoˬ, teh‸ Yawˇshaˍhpaˆ hta‸ kʼoˆ piˇ ve yoˬ. Nawˬ oˇ hkʼe maˇ kʼoˆ cawˇ, teh‸ Yawˇshaˍhpaˆ yawˇ hta‸ kʼoˆ piˇ ve yoˬ.

8Hkʼe te leh, Aˍhaˆ yawˇ ve ma‸ poˍ teˇ gʼaˇ hta‸ kuˬ yuˬ leh, Miˆhkaˍ hta‸ ca kuˬ tcuh ve yoˬ.

9Aˍhaˆ leh Yawˇshaˍhpaˆ lehˬ, jawˇmawˇ ve veu‸ kʼaˇ veu‸ deh leh, Saˍmaˍriˆ venˇ taˍ meu‸ hpe‸ lo mui chehˇ taˍ ve yoˬ. Tcuh kaˍ paˍ hkʼa peu-eˬ yawˇ huiˉ maˬ gʼuˇ suhˍ lo chehˇ taˍ ve yoˬ.

10Oˇ htaˇ, Hkeˍnaˍnaˆ ve yaˇ tcuh kaˍ paˍ Zeˍdaˍkiˆ lehˬ, sho yuˬ te taˍ ve awˬ hkaw teˇ hpaˍ yuˬ laˬ leh, Gʼuiˬsha chi hkʼe kʼoˆ ve yoˬ. Awˬ hkaw chi teˇ hpaˍ hta‸ nawˬ yuˬ leh ma‸ ca bawˆ ve kʼo, nawˬ gʼaˇ tuˬ yoˬ, teh‸ Aˍhaˆ hta‸ kʼoˆ piˇ ve yoˬ.

11Awˬ nu ve tcuh kaˍ paˍ hkʼa peu-eˬ htawˇ, yawˇ kʼoˆ ve hkʼe kʼoˆ ve yoˬ. Raˍmoˆ venˇ hta‸ ca bawˆ-e loˬ. Nawˬ gʼaˇ tuˬ yoˬ, teh‸ yawˇ hta‸ kʼoˆ piˇ ve yoˬ.

12Miˆhkaˍ hta‸ ca kuˬ kʼai ve ma‸ poˍ oˇ ve Miˆhkaˍ hta‸ mawˬ htaˇ, Tcuh kaˍ paˍ hkʼa peu-eˬ jawˇmawˇ ma‸ bawˆ gʼaˇ tuˬ ve awˬ lawn kʼoˆ chehˇ taˍ ve yoˬ. Nawˬ ka‸ jawˇmawˇ hta‸ oˇ hkʼe kʼoˆ piˇ-oˆ, teh‸ yawˇ hta‸ kʼoˆ piˇ ve yoˬ.

13Oˇ htaˇ Miˆhkaˍ lehˬ, Gʼuiˬsha ngaˬ hta‸ kʼoˆ tcuh laˇ ve hkʼe ceh ngaˬ kʼoˆ tuˬ yoˬ, teh‸ yawˇ hta‸ kʼaw‸ kʼoˆ piˇ ve yoˬ.

14Yawˇ jawˇmawˇ geh gaˬ la ve teˇ yanˇ, Miˆhkaˍ-oˬ, jawˇmawˇ Yawˇshaˍhpaˆ ngaˬ huiˉ maˬ Raˍmoˆ venˇ hta‸ ca bawˆ cawˇ laˇ, teh‸ Aˍhaˆ yawˇ hta‸ na nyi ve yoˬ. Ca bawˆ-e loˬ. Gʼuiˬsha nawˬ hui hta‸ gʼaˇ tcuh laˇ tuˬ yoˬ hehˉ, teh‸ Miˆhkaˍ yawˇ hta‸ kʼaw‸ yaw hkʼaw‸ piˇ ve yoˬ.

15Oˇ htaˇ jawˇmawˇ Aˍhaˆ lehˬ, Nawˬ ngaˬ hta‸ tawˇ yaw laˇ ve kʼo, cawˇ ve tawˇ hta‸ ceh yaw laˇ-oˆ, teh‸ ngaˬ nawˬ hta‸ hkʼaˬ nyiˇ pawˆ gʼa kʼoˆ piˇ tuˬ sheˍ ve le, teh‸ Miˆhkaˍ hta‸ kʼoˆ piˇ ve yoˬ.

16Miˆhkaˍ kʼaw‸ yaw hkʼaw‸ leh kʼoˆ ve, Iˉsaˍreˍlaˆ chaw hui lehˬ, yawˬ hawˉ paˍ maˇ cawˬ ve yawˬ hkʼe, hkʼaw hkʼoˆ lo gʼuiˇ hpaw toˇ chehˇ ve hta‸ ngaˬ gʼa mawˬ ve yoˬ. Gʼuiˬsha kʼoˆ ve, Chaw chi teˇ hpaˍ lehˬ, awˬ hoˉ awˬ naˬ maˇ cawˬ. Chi hta‸ pa taw, yawˇ hui hta‸ a shu yawˇ ve yehˬ lo kʼaw‸ kʼo‸-e tcuh-o, teh‸ kʼoˆ ve yoˬ, teh‸ Aˍhaˆ hta‸ kʼoˆ piˇ ve yoˬ.

17Oˇ htaˇ Aˍhaˆ lehˬ, Chaw chi hpaˇ ngaˬ hta‸ da‸ ve tawˇ teˇ pawˆ ka‸ maˇ yaw laˇ jaw, teh‸ ngaˬ nawˬ hta‸ kʼoˆ piˇ taˍ peuˬ ve maˇ heˆ laˇ, teh‸ Yawˇshaˍhpa‸ hta‸ kʼoˆ piˇ ve yoˬ.

18Miˆhkaˍ kʼaw‸ caˉ leh kʼoˆ ve, Gʼuiˬsha kʼoˆ ve tawˇ hta‸ na sheˍ. Gʼuiˬsha kʼaw jaw hkʼoˆ mui taˍ leh, yawˇ ve mvuhˇ naw ma tcuh yaˇ teˇ hpaˍ yawˇ paˇ lo hpoˆ chehˇ taˍ ve hta‸ ngaˬ gʼa mawˬ ve yoˬ.

19Oˇ htaˇ Gʼuiˬsha lehˬ, Aˍhaˆ Raˍmoˆ venˇ hta‸ ca bawˆ leh oˇ kaˬ lo suh-e piˇ tuˬ, a shu teˇ gʼaˇ yawˇ ve nyi ma hta‸ ca gu piˇ tuˬ le, teh‸ yawˇ ve mvuhˇ naw ma tcuh yaˇ teˇ hpaˍ hta‸ na nyi ve yoˬ. Mvuhˇ naw ma tcuh yaˇ oˇ ve teˇ hpaˍ teˇ gʼaˇ teˇ ceuˬ kʼoˆ ve yoˬ.

20Oˇ htaˇ awˬ ha teˇ maˬ Gʼuiˬsha paˇ lo jiˆ kʼai leh, Ngaˬ ca te piˇ tuˬ yoˬ, teh‸ Gʼuiˬsha hta‸ kʼoˆ piˇ ve yoˬ.

21Nawˬ hkʼaˬ hkʼe ca te piˇ tuˬ le, teh‸ Gʼuiˬsha kʼaw‸ na nyi ve teˇ yanˇ, Aˍhaˆ ve tcuh kaˍ paˍ teˇ hpaˍ hta‸ ngaˬ heˍ ve tawˇ yaw tcuh tuˬ yoˬ, teh‸ Gʼuiˬsha hta‸ kʼaw‸ yaw hkʼaw‸ piˇ ve yoˬ. Oˇ htaˇ Gʼuiˬsha lehˬ, Kʼai leh yawˇ ve nyi ma hta‸ ca gu piˇ-oˆ, teh‸ yawˇ hta‸ kʼoˆ piˇ ve yoˬ.

22Awˬ tehˬ awˬ na chi hkʼe hpeh‸ la taˍ peuˬ ve yoˬ. Tcuh kaˍ paˍ chi teˇ hpaˍ nawˬ hta‸ heˍ laˇ chehˇ ve yoˬ. Ya‸ hkʼaˇ, nawˬ ma‸ ca bawˆ ve kʼo gʼa luˬ gʼa sheˆ tuˬ Gʼuiˬsha kʼoˆ taˍ peuˬ ve yoˬ, teh‸ Aˍhaˆ hta‸ kʼoˆ piˇ ve yoˬ.

23Oˇ htaˇ tcuh kaˍ paˍ Zeˍdaˍkiˆ Miˆhkaˍ ve mehˆ hpfuhˇ hta‸ hta hpehˇ sheˬ leh, Gʼuiˬsha ve awˬ ha ngaˬ geh tawˆ kʼai leh, nawˬ hta‸ hkʼaˬ htaˆ tawˇ ca yaw la ve le, teh‸ yawˇ hta‸ kʼoˆ piˇ ve yoˬ.

24Nawˬ na nyi laˇ ve tawˇ chi hta‸ nawˬ bawehˇ teˇ maˬ hkʼaw ca va‸ toˇ chehˇ htaˇ shiˍ la tuˬ yoˬ, teh‸ Miˆhkaˍ kʼaw‸ yaw hkʼaw‸ piˇ ve yoˬ.

25Oˇ ve hkʼaw‸ nawˉ, jawˇmawˇ Aˍhaˆ lehˬ, Miˆhkaˍ hta‸ hpeh yuˬ leh venˇ chi hta‸ uˉ peunˍ chehˇ ve Aˍmonˍ leh ngaˬ yaˇ paˍ Yawˇshaˆ geh shiˍ kʼai piˇ-oˆ.

26Yawˇ hta‸ htawnˍ hkʼaw haw taˍ leh, ngaˬ ma‸ ca bawˆ kʼaw‸ la htaˇ hkʼa gaˬ, hkaoˍmonˇ leh iˉ kaˆ taw piˇ tuˬ yawˇ huiˉ maˬ hta‸ kʼoˆ piˇ-oˆ, teh‸ yawˇ ve ma‸ poˍ teˇ hpaˍ hta‸ kʼoˆ piˇ ve yoˬ.

27Oˇ htaˇ Miˆhkaˍ lehˬ, Nawˬ gʼa kʼaw‸ la sheˍ ve kʼo, Gʼuiˬsha ngaˬ hta‸ tawˇ yaw laˇ taˍ ve maˇ heˆ. Nawˬ hui hkʼa peu-eˬ ngaˬ kʼoˆ ve tawˇ hta‸ hkʼa deh‸ na yuˬ-o‸, teh‸ Aˍhaˆ hta‸ kʼoˆ piˇ ve yoˬ.

28Oˇ ve hkʼaw‸ nawˉ, Iˉsaˍreˍlaˆ jawˇmawˇ Aˍhaˆ leh Yuˇda‸ jawˇmawˇ Yawˇshaˍhpaˆ hui Giˇlaˆ mvuhˇmiˬ hkʼaw cawˬ ve Raˍmoˆ venˇ hta‸ ca bawˆ kʼai ve yoˬ.

29Oˇ htaˇ Aˍhaˆ lehˬ, Ngaˬ hui ma‸ bawˆ kʼai htaˇ, ngaˬ lehˬ jawˇmawˇ ve veu‸ kʼaˇ hta‸ kʼehˆ baˬ taˉ leh kʼai tuˬ yoˬ. Nawˬ-awˍ hkʼe jawˇmawˇ ve veu‸ kʼaˇ hta‸ veu‸ deh taˍ-o‸, teh‸ Yawˇshaˍhpaˆ hta‸ kʼoˆ piˇ ve yoˬ. Hkʼe te leh Aˍhaˆ veu‸ kʼaˇ pa leh ma‸ bawˆ kuiˬ lo kʼai ve yoˬ.

30Suˇriˆ jawˇmawˇ lehˬ, Iˉsaˍreˍlaˆ jawˇmawˇ hta‸ maˇ heˆ kʼo, awˬ nu ve chaw teˇ gʼaˇ hta‸ ka‸ taˇ bawˆ, teh‸ yawˇ ve iˉ mvuhˇ lawˬ gʼa‸ paˍ awˬ hoˉ teˇ hpaˍ hta‸ tawˇ piˇ taˍ ve yoˬ.

31Hkʼe te leh, yawˇ hui jawˇmawˇ Yawˇshaˍhpaˆ hta‸ mawˬ ve yeˇ yanˇ, yawˇ lehˬ Iˉsaˍreˍlaˆ jawˇmawˇ yoˬ teh‸ dawˇ leh, yawˇ hta‸ gʼa‸ bawˆ ve yoˬ. Ya‸ hkʼaˇ, Yawˇshaˍhpaˆ gʼaˇ hte‸ kuˬ leh, Gʼuiˬsha yawˇ hta‸ htaiˍ hkʼaw‸ piˇ ve yoˬ.

32Iˉ mvuhˇ lawˬ gʼa‸ paˍ teˇ hpaˍ lehˬ, yawˇ Iˉsaˍreˍlaˆ jawˇmawˇ maˇ heˆ ve hta‸ shiˍ ve teˇ yanˇ, yawˇ hui yawˇ hta‸ maˇ kʼaw‸ gʼa‸ yuˬ ve yoˬ.

33Ya‸ hkʼaˇ, Suˇriˆ ma‸ yaˇ teˇ gʼaˇ bawˆ peu ve hkaˆ ce teˇ maˬ lehˬ, Aˍhaˆ veu‸ deh taˍ ve sho veu‸ kʼaˇ caˉ da‸ taˍ kuiˬ nyiˇ maˬ awˬ kaˍ lo lo‸-e ve yoˬ. Ngaˬ hta‸ hkaˆ ce heuˆ peuˬ. Choˬ ka‸ lo tawˆ kʼai-o, teh‸ yawˇ ve iˉ mvuhˇ lawˬ gʼa‸ paˍ hta‸ kʼoˆ piˇ ve yoˬ.

34Ma‸ gʼaˇ hte‸ bawˆ da‸ chehˇ ve teˇ yanˇ, Aˍhaˆ lehˬ iˉ mvuhˇ lawˬ hkʼaw lo mui taˍ leh, Suˇriˆ chaw hui hpawˇ lo nyi peu chehˇ ve yoˬ. Mvuhˇ nyi kʼehˬ la htaˇ, yawˇ suh-e ve yoˬ.

← Chapter 17 Jump to: Chapter 19 →