Proverbs 2

Chewa Bible (BL) 1992 - Buku Lopatulika

← Chapter 1 Jump to: Chapter 3 →

1Mwananga, ukalandira mau anga, Ndi kusunga malamulo anga;

2Kucherera makutu ako kunzeru, Kulozetsa mtima wako kukuzindikira;

3Ukaitananso luntha, Ndi kupfuulira kuti ukazindikire;

4Ukaifunafuna ngati siliva, Ndi kuipwaira ngati cuma cobisika;

5Pompo udzazindikira kuopa Yehova Ndi kumdziwadi Mulungu.

6Pakuti Yehova apatsa nzeru; Kudziwa ndi kuzindikira kuturuka m'kamwa mwace;

7Iye asungira oongoka mtima nzeru yeniyeni; Ndiye cikopa ca oyenda molunjika;

8Kuti acinjirize njira za ciweruzo, Nadikire khwalala la opatulidwa ace.

9Pamenepo udzazindikira cilungamo ndi ciweruzo, Zolunjika ndi mayendedwe onse abwino.

10Pakuti nzeru idzalowa m'mtima mwako, Moyo wako udzakondwera ndi kudziwa,

11Kulingalira kudzakudikira, Kuzindikira kudzakucinjiriza;

12Kukupulumutsa ku njira yoipa, Kwa anthu onena zokhota;

13Akusiya mayendedwe olungama, Akayende m'njira za mdima;

14Omwe asangalala pocita zoipa, Nakondwera ndi zokhota zoipa;

15Amene apotoza njira zao, Nakhotetsa mayendedwe ao;

16Nzeru idzakupulumutsa kwa mkazi waciwerewere, Kwa mkazi wacilendo wosyasyalika ndi mau ace;

17Wosiya bwenzi la ubwana wace, Naiwala cipangano ca Mulungu wace;

18Nyumba yace itsikira kuimfa, Ndi mayendedwe ace kwa akufa;

19Onse akunka kwa iye sabweranso, Safika ku njira za moyo;

20Nzeru idzakuyendetsa m'njira ya anthu abwino, Kuti usunge mayendedwe a olungama.

21Pakuti oongoka mtima adzakhala m'dziko, Angwiro nadzatsalamo.

22Koma oipa adzalikhidwa m'dziko, Aciwembu adzazulidwamo.

← Chapter 1 Jump to: Chapter 3 →